1Alatala yi a fala n xa, a naxa, “Siga, i sa taa dugi tagi xidina nde sara, i yi i tagi xidi a ra. Koni, i nama a sin igeni de.”
2N yi tagi xidin sara alo Alatala a falaxi kii naxan yi, n yi a xidi n tagi.
3Alatala mɔn yi falan ti n xa, a naxa,
4“I tagi xidin naxan saraxi i yi a xidi i tagi, a tongo i siga Efirati baan binni, i sa a luxun fanye yinla ra mɛnni.”
5Nayi, n yi siga, n sa a luxun Efirati baan dɛxɔn, alo Alatala a yamari n ma kii naxan yi.
6Na waxati xunkuyen to dangu, Alatala mɔn yi a fala n xa, a naxa, “Keli, i siga Efirati baan binni, i sa tagi xidin tongo, n na i yamari naxan luxun fe ra.”
7Nayi, n yi siga Efirati baan binni, n sa na yiwulen, n tagi xidin sa dɛnaxan yi, n yi a tongo mɛnni, koni tagi xidin bata yi kala, a tɔnɔ mi yi fa na sɔnɔn.
8Alatala yi falan ti n xa iki,
9“N tan Alatala ito nan falaxi, n naxa, ‘N Yuda kaane wason kalama na kii nin e nun Yerusalɛn kaane waso gbeena.
10Yama ɲaxini ito naxan tondima n ma falan namɛ, naxanye biraxi e bɔɲɛ yi feene fɔxɔ ra e tengbesenyani, e nun ala gbɛtɛne, e yi e batu, e yi e xinbi sin e bun, ne luma nɛn alo tagi xidini ito, naxan tɔnɔ mi fa na!
11Awa, n bata yi Isirayila yamaan nun Yuda yamaan birin tugun n na alo tagi xidin xidima muxun tagi kii naxan yi alogo e xa findi n ma yamaan na, e yi n xinla matɔxɔ, e n tantun, e n binya. Koni e mi e tuli mati.’ ” Alatalaa falan nan na ra.
12“Yeremi, sa ito fala e xa, i naxa, ‘Alatala, Isirayilaa Ala ito nan falaxi, a naxa, a manpa kundine birin lanma nɛn e xa rafe manpaan na.’ E i yabima nɛn, e naxa, ‘Alo nxu mi na kolon ba, a manpa kundine lan nɛn e rafe manpaan na?’
13Nayi, i yi a fala e xa, i naxa, ‘Alatala ito nan falaxi, a naxa: n yamanani ito muxune birin luma nɛn alo dɔlɔ minna naxanye lugoxi dɔlɔn na, hali a mangan naxanye dɔxi Dawudaa mangaya gbɛdɛni, e nun a saraxaraline nun a nabine, e nun Yerusalɛn kaane birin.
14N na e xusinma nɛn e bode ra, e yi kala alo kundine, diine nun fafane birin. N mi muxu yo ratangɛ, n mi kininkininma, n mi hinanɲɛ e ra, sese mi a ligɛ n tagan e halagɛ.’ Alatalaa falan nan na ra.”
15Ɛ n xuiin namɛ, ɛ tuli mati! Ɛ nama fa ɛ yɛtɛ yite, bayo Alatala nan falan tima.
16Ɛ binyen fi Alatala ma, ɛ Ala, benun a xa dimin naso, ɛ yi ɛ sanne radin geya yidimixine yi. Ɛ yengi kɛnɛnna nan ma, koni Ala yi a masara sayaan dimin na, a yi findi dimi gbeen na.
17Xa ɛ mi ɛ tuli mati, n wugama nɛn wundoni ɛ wasona fe ra. N yɛɛgen minima nɛn han, n yɛɛn xɔnna yi rafe yɛɛgen na, bayo Alatalaa yamaan sigama nɛn konyiyani.
18A fala mangan nun ɲaxalan mangan xa, i naxa, “Ɛ dɔxɔ bɔxɔni, bayo ɛ mangaya taxamaseri kɔmɔti nɔrɔxin bata bira.”
19Negewi yamanan taane balanma nɛn, muxu yo mi fa na naxan e rabiyɛ. Yuda kaane birin sigama konyiyani, e birin bata xali.
20I yɛɛn nakeli, i muxune mato naxanye fama sa keli sogeteden kɔmɛnna ma. Xuruse kurun minɛn naxan taxu i ra, i yi i kanbama xuruseen naxanye yi?
21Ɛ bata naxanye radari e xa findi ɛ xɔyine ra, ɛ nanse falama, ne na keli ɛ xili ma e dɔxɔ ɛ xun na. I mi tɔrɛ nayi ba alo ɲaxanla naxan diin barima?
22Xa ɛ na fala, ɛ naxa, “Nanfera ito n sɔtɔma?” Ɛ xa a kolon, a muxune fuma ɛ ma nɛn, e yi ɛ rayagi ɛ hakɛ wuyaxi saranna ra.
23Fati fɔrɛn nɔɛ a fatin masarɛ ba, hanma burunna ɲarin yi a fatin makatunxi yirene maxɛtɛ a ma? Na ma, ɛ fan mi nɔɛ fe faɲin ligɛ, ɛ to darixi fe ɲaxin na.
24N na ɛ raxuyama ayi nɛn alo foyen se dagin naxan xalima tonbonni.
25Alatalaa falan ni ito ra, a naxa, “N bata ito nan nagidi ɛ ma bayo ɛ bata ɲinan n xɔn, ɛ yi ɛ yigi sa wule alane yi.
26N na ɛ rayagima nɛn alo ɲaxanla dugin na mate a ra han a yɛtagi, alogo a ragenla xa to.
27N bata ɛ yalunyaan nun ɛ kunfa feene to, ɛ tɔnɔn fenma yalunyani yagitareyani! N bata ɛ fe xɔsixine to geyane fari e nun burunna ra. Gbalona ɛ xa Yerusalɛn kaane! Ɛ mɔn luma nɛn sariɲantareyani han waxatin mundun?”
