Isaias 64

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Tevia nu is langit, Nengazen, ne penaug ka su para mehuyung is menge vuvungan diyà te etuvangan nu.

²Iring te hapuy ebpeketutung te neǥangu he menge subpang wey ebpekepezìdì te wahig, is kebpekeuma nu ebpekehuyung te menge nasyun he menge kuntada nu, ne egkekilala zan ke hentei ka.

³Hein mibpenaug ka zengan is mibaal te egkengein-inuwan he wazè dey peebuta, nehuyung is menge vuvungan diyà te etuvangan nu.

⁴Puun pa zengan wazè pa nekezineg wey nekaahà te Megbevayà he iring kenikew he edtavang te menge edsarig kandin.

⁵Edewaten nu is menge etew he igkelipey zan is kebaal te metazeng, wey ed-ikul te menge paaǥi nu. Piru nepeukan key kenikew su mibpedayun key te kedsupak te menge paaǥi nu. Egkehimu ve ke egkelibri key?

⁶Neiring key is langun te vutang he meremerik, ne is langun he meupiya he menge vaal zey, ne iring dà te meremerik he terapu. Iring key is langun te zahun he neǥangu, ne is kelelalung dey ne iring te keramag he midlayap kenami.

⁷Wazà minsan sevaha kenami he midangep kenikew wey neninguhà he egawed kenikew. Iyan heeyan hinungdan ke maan is mid-iniyuǥan key kenikew, ne mibey-anan key en kenikew is ebpematey tenged te menge salè dey.

⁸Piru minsan pa te iyan heeyan, iyan ka gihapun Amey zey, Nengazen. Iring ka te mendiziyun, ne sikami iring te vasak. Iyan ka mibaal kenami te langun.

⁹Nengazen, kenè nu pesubrahi is kegkepeuki nu kenami; kenè nu tentenuzi taman te taman is menge salè dey. Edhangyù key ziyà te kenikew he seǥipaa key, su menge etew key kenikew is langun.

¹⁰Is segradu he menge inged nu, ragkes en is Jerusalem neiring te sibsivayan he wazà duen ed-ubpa.

¹¹Nevinsulan is segradu wey mekempet he valey nu, he zutun ka ezapa te menge kepuun dey. Neǥevà is langun he menge vutang he utew zey mibmahal.

¹²Ne minsan pa te iyan heini, kenè key pe be ǥihapun kenikew edtevangan, Nengazen? Ebpereremek ke zè be, ne ebpurungan key en be kenikew edsiluti?