1Ne hein nezineg ni Hadì Hezekia is tudtul zan diyà te kandin, mibindas din is bisti zin ne midseluub sikandin te saku su ibpetuusan din is kedlalew zin, ne midhendiyà sikandin te valey te Nengazen.
2Ne impehendiyè din te ki Isaias he anak ni Amoz ensi Eliakim he edumala te turuǥan, si Shebna he sikritaryu, wey is lavew he menge memumuhat. Pudu sikandan mibivisti te saku.
3Ne hein nekeuma zan diyà te ki Isaias, migkaǥi sikandan diyà te kandin te, “Iyan heini egkeǥiyen ni Hezekia: ‘Menge andew heini te zekelà he samuk! Edsilutan kiw wey ebpeel-elezan. Iring kiw te vahi he ed-anak he wazè din en desen te ked-ineǥed para ilusad is anak din.’
4Midsuǥù te hadì te Asiria is peremandar te menge sundaru zin te ked-undaunda te uuyag he Megbevayà. Kela ke seǥipaa te Nengazen he Megbevayè nu is mibpengaǥi zuen te peremandar te menge sundaru ne edsilutan sikandin tenged dutun, umbe pengemuyù ka para kenitew te nengesamà.”
5Ne hein nekepasad he egkaǥi haazà is menge upisyal he midsuǥù ni Hadì Hezekia,
6migkaǥi si Isaias diyà te kandan te, “Keǥiyi niw is egalen niw he si Hadì Hezekia he iyan heini egkeǥiyen te Nengazen: Kenè ka mahandek te nezineg nu he ked-un-undaha kedì duen te menge sakup te hadì te Asiria.
7Pemineg ka! Edtezinen ku is hadì te Asiria. Ebpekezineg sikandin te tudtul he ebpekepelikù kandin diyà te nasyun din. Ne zutun ibpehimetayan ku sikandin pinaaǥi te ispada.”
8Ne hein nezineg duen te peremandar te menge sundaru te Asiria he mid-awè en diyà te Lakish is hadì dan, ne nekidtebek diyà te Libna, midtelukun sikandin diyà.
9Ne si Hadì Senakerib he hadì te Asiria, duen nezineg din he tudtul he si Hadì Tirhaka he hadì te Etiopia, migenat en te kebpekidtebek kandin. Ne zutun, midsuǥù sikandin te menge menunudtulà diyà te ki Hezekia te kegkaǥi kayi he menge lalag:
10“Kenè ka petuntu te ed-ezapen he edseriǥan nu emun egkaǥi sikandin te, ‘Kenè ku ibeǥey ziyà te hadì te Asiria is Jerusalem.’
11Pemineg ka! Iyan ka mismu nekezineg ke hengkey is mibeelan te menge hadì te Asiria ziyà te hapit langun he menge nasyun. Mibpendezeetan dan heini purungi. Ne sikew, egkeisip nu ve he egkelibri ka mulà?
12Mibpendezeetan dengan te menge kepuun ku is menge inged he Gosan, Haran, Resef, wey is menge etew ziyà te Eden he ziyà te Telasar. Ne wazà mekelibri kandan is menge ed-ezapen dan?
13Duen be nehimu te menge hadì diyà te Hamat, Arpad, Sefarvaim, Hena, wey Iva?”
14Ne hein nepasad ni Hezekia te ebasa is surat he imbeǥey kandin duen te menge menunudtulà, midhendiyà sikandin te valey te Nengazen ne mibekar zin haazà is surat diyà te etuvangan te Nengazen.
15Ne nengemuyù sikandin te,
16“Nengazen he Mekeǥeǥehem, he Megbevayà te Israel he ebpimpinuu ziyà te pinuuwè din te kedhadì diyà te teliwazà te menge kirubin, iyan ke zà Megbevayà he edumala te langun he menge ginhedian kayi te kelibutan. Mibeelan nu is langit wey is kelibutan.
17Nengazen, pemineg ka, ne tengtengi nu is langun he nehitavù. Pemineǥa nu is langun he migkaǥi ni Senakerib te ked-undaunda kenikew te uuyag he Megbevayà.
18Tutuu, Nengazen, he mibpendezeetan te menge hadì diyà te Asiria is mahabet he menge nasyun,
19wey is menge ed-ezapen dan pinaaǥi te kebpenimbaǥa zan kayi ziyà te hapuy. Su kenà heini tutuu he menge Megbevayà, kekenà, menge vatu zà wey menge kayu he vineelan te etew.
20Umbe ǥuntaan, Nengazen he Megbevayè dey, libriya key puun te ǥehem te menge tig-Asiria, su para metueni te langun he ginhedian kayi te kelibutan he iyan ke zà Nengazen he Megbevayà.”
21Ne mibpeuwit te lalag si Isaias he anak ni Amoz diyà te ki Hezekia he edhenduen te: Iyan heini egkeǥiyen te Nengazen he Megbevayà te Israel: Geina te nengemuyù ka mehitenged ki Hadì Senakerib he hadì te Asiria,
22iyan heini egkeǥiyen te Nengazen he ebpekesuǥat diyà te kandin: “Ed-engitan ka wey edsudien ka te menge meǥinged diyà te Zion, he inged he Jerusalem. Ebpemengelengkeleng sikandan is ed-undaunda kenikew zutun te kebpelaǥuy nu.
23Hentei is mid-insultuwan nu wey edwelwelien? Hentei is midhenggeran nu wey mibpehembuǥan? Kenè be iyan a is Waǥas he Megbevayà te Israel?
24Pinaaǥi te menge suluǥuen nu, midsudì a kenikew. Migkaǥi ke pa te, ‘Pinaaǥi te mahabet he menge kerwahi ku netekezeg ku is metikang he menge vuntud, is puntur te menge vuntud he Lebanon. Mibpemiley ku is kinetewisan he menge kayu he sidru kayi wey is kinemeupiyahan he menge sipris. Nekeuma a ziyà te puntur kayi he zuen duen merapung he menge kayu.
25Nekepekalut a te menge teheb diyà te zuma he menge lugar, ne nekeinum a puun dutun he menge teheb. Tenged te kedsaǥad ku, nemezahan is menge wahig diyà te Ehipto.’
26“Tutuu iyan he mibpemengkag nu is binerengbeng he menge inged. Piru wazè nu ve metueni he siak, is Megbevayà, neuǥet en he imbanglis ku is kegkeul-ulaha kayi? Neuǥet en diyà te pelanu ku is kegkeul-ulaha kayi ne ǥuntaan edtumanen ku en heini.
27Is menge meǥinged diyà te menge inged he mibpemengkag nu, naawè en is desen dan; nahandek sikandan wey nepeel-elezan. Neiring sikandan te menge sagbet diyà te pemuleey he meǥaan dà egkeǥangu dutun te kedtuvù dan etawa iring te menge sagbet he nenuvù diyà te atep he seǥuǥunè dà egkeǥangu zutun te kedtuvù dan.
28“Piru netuenan ku is langun mehitenged kenikew, ke hendei ka ed-ubpàubpà, etawa hendei ka ebpuun wey ebpevayà, wey ke hengkey is igkepeuki nu kediey.
29Su nezineg ku is kegkepeuki nu kedì wey is kebpehambug nu, egkew-itan ku is izung nu wey ebusalan ku is bèbè nu, ne eguyuzen ku sikew ziyà te zalan he mibeyaan nu, su wey ka mekelikù diyà te ebpuunan nu.”
30Ne migkeǥiyan ni Isaias si Hezekia te: Iyan heini tuus he edipinsahan te Nengazen is Jerusalem te kedezaat te menge tig-Asiria: Guntaan he tuig is egkekaan niw, iyan is menge veǥas te pinemula he nenuvù dà, ne ed-ilis he tuig iyan is beǥas te menge pinemula he nenuvù diyà te midtuvuan duen te nehuna. Piru te iketelu he tuig, ebpekepemula kew en te trigu ne ebpekeraǥun kew en. Ebpekepemula kew en daan te paras ne ebpekekaan kew te veǥas kayi.
31Ne ziyà te Juda, sikiyu is nengesamà he uuyag ed-uswag kew iring te pinemula he mibpurung mebpendalid ne ebpemeǥas.
32Su zuen egkengesamà he uuyag he ebpekepeyapat he ebpuun te Jerusalem, diyà te Buvungan he Zion. Ne kenà duwazuwa is kedtumana kayi te Nengazen he Mekeǥeǥehem.
33“Ne iyan heini egkeǥiyen te Nengazen mehitenged te hadì te Asiria: Kenà sikandin ebpekeseled diyà te inged he Jerusalem wey kenè din heini egkepanà. Kenà sikandin ebpekeuvey kayi he kekelasag etawa kenà sikandin ebpekesurung kayi zuma te menge etew zin he edliǥuy kayi.
34Edlikù sikandin diyà te mibpuunan din, he ed-uman ed-ikul ziyà te zalan he mid-ikul zin. Kenà sikandin ebpekeseled kayi he inged. Iyan a, is Nengazen, is migkaǥi kayi.
35Edipinsahan ku wey edlibriyen ku heini he inged para meveǥayi a te zengeg wey tenged te penaad ku ki David he suluǥuen ku.”
36Ne zutun midhendiyà is belinsuǥuen te Nengazen te kampu te menge tig-Asiria ne migerè din is 185,000 he menge sundaru. Ne hein meselem en, ked-enew zuen te nesamà he menge uuyag, neehè dan is utew mahabet he nemematey.
37Tenged kayi mid-ulì si Senakerib diyà te Nineve ne zutun med-ubpàubpà.
38Ne sevaha he andew, zutun te edsimba si Senakerib diyà te simbahan te ed-ezapen din he si Nisroc, midhimetayan sikandin te zezuwa he anak din he maama he si Adramilec wey si Sharezer pinaaǥi te ispada. Ne mibpelaǥuy sikandan diyà te Ararat. Ne is anak din he si Esarhadon iyan mid-ilis kandin te kedhadì.
