Isaias 52

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹He Zion, enew ke en, wey mebpekelig-en! Sikew is segradu he inged he Jerusalem, ipeehè nu is kegkemekeǥeǥehem nu! Su is menge kuntada nu he kenà menge Israilihanen he ed-isipen he meremerik, kenè en ebpekeseled diyà te kenikew.

²Kenè ke en meseeng he iring te etew he edungdungerù diyà te tanà, kekenà, hitindeg ka hinuun wey pengandam ka te kedumala. Ne sikiyu is menge meǥinged diyà te Jerusalem, engked kew en he ebpeuripen.

³Su iyan heini egkeǥiyen te Nengazen he MEGBEVAYÀ, “Mibihag kew he henduen te uripen he imbelegyà he wazà beyazi, umbe ebelukasan ku zaan sikiyu te wazà bayad. Dengan midhendiyè kew te Ehipto su zutun kew ed-ubpà, ne midaagdaag kew ziyà. Ne hein neuǥet iyan en maan midaagdaag keniyu is menge tig-Asiria.

⁵Ne ǥuntaan hengkey en maan is nehitavù keniyu? Mibihag kew te menge tig-Babilonia te wazà hustu he hinungdan. Edumelahan kew zan wey edsudien. Ne layun e zan pa edsumpelita.

⁶Piru egkeuma is timpu he zutun egkesayud kew ke hentei a is Megbevayà, su iyan a mismu migkaǥi ziyà te keniyu. Uya, iyan a mismu.”

⁷Utew mekempet he ed-ahaan is menge menunudtulà he ed-abley ziyà te menge vuvungan su wey zan metudtul is meupiya he tudtul he zuen en kelinew ziyà te Jerusalem ne ebmeupiyè en is kebpekesavuk kayi su edlibriyen heini te Megbevayà. Egkeǥiyan dan is menge tig-Jerusalem te, “Midhadì is Megbevayè niw!”

⁸Ebpengulahì tenged te kegkelipey is menge vantey te inged su egkeehè dan is kedlikù te Nengazen diyà te Jerusalem.

⁹Ebpengulahì te kegkelipey is Jerusalem he nevengkag su edlipayen wey edlig-enan te Nengazen is menge etew zin. Edlibriyen din is Jerusalem!

¹⁰Ibpaahà te Nengazen is nekeviza he ǥehem din diyà te langun he menge nasyun, ne egkaahà kayi te tivuuk he kelibutan is kedlibriya kenitew te Megbevayè tew.

¹¹Sikiyu is ed-uwit te menge gelemiten diyà te valey te Nengazen, awè kew en diyà te Babilonia! Gawas kew en keniyan! Kenè kew ǥawed te ed-isipen he meremerik. Gawas kew en diyà te Babilonia, ne mebpekewaǥas kew.

¹²Piru kayi he timpu kenè en kinahanglan he edegdeǥusu kew te ked-awà he iring te ebpelaǥuy kew su ebpetelihuna is Nengazen keniyu. Is Megbevayà te Israel iyan ebpengalang keniyu.

¹³Migkaǥi is Nengazen te, “Pemineg kew! Ebmeuswaǥen is suluǥuen ku, egkevantug sikandin wey ebeǥayan te zengeg.

¹⁴Mahabet is egkeinuinu kandin, su egkezeetan is dagwey zin ne henduen be te kenè en paras te etew is paras din.

¹⁵Minsan is menge meǥinged diyà te menge nasyun ne egkeinuinu zaan kandin. Kenà ebpekekaǥi is menge hadì mehitenged kandin, su egkeehè dan man is wazà keǥiya kandan, wey egkesavut dan is wazè pa keenu metudtul.”