Isaias 58

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Migkaǥi is Nengazen te, “Habet kew pengulahì; iringa niw te kezaǥing te vudyung! Kenè niw heini eǥena! Ipetueni niw te menge etew ku he menge kevuwazan ni Jacob is menge salè dan wey menge kedrapas.

²Andew-andew is kedangep dan kayi te kediey, henduen be te egkesuat dan he metueni zan is menge paaǥi ku. Emun ed-ahaan, henduen be te metazeng sikandan he menge etew, ne henduen be te wazè dan iselikwey is menge suǥù ku. Ibpeehè dan he henduen te egkesuat dan he ed-uvey kayi te kediey is ebuyù te metazeng he kukuman.

³Egkeǥiyan e zan pa te, ‘Mibpuasa key, piru wazè ka medseǥipà. Midrasey zey is keugelingen dey, piru wazè nu heini beliya.’ “Midtavak a te: Iyan tutuu is, dutun te kebpuasa niw keugelingen niw zà he kelipey is ed-isipen niw, ne edèdaaǥen niw is menge terebahanti niw.

⁴Ebpuasa kew iyan piru ebpetebtebekà wey ebpelewlewanè kew, wey ebpesumsumbaǥè kew pa ganì. Kenè niw isipa he is puasa he ebeelan niw ǥuntaan ebpeketavang wey ku pemineǥa is menge kebpengemuyù niw.

⁵Emun ebpuasa kew, edresayan niw is keugelingen niw. Idungul niw is menge ulu niw he henduen be te sagbet, ne edhizeǥè kew ziyà te avu is bivisti te saku. Iyan be heeyan egngezanan niw te puasa? Kunaan niw vuwa ke ebpekelipey en kediey heeyan?

⁶Is kelasi te puasa he egkesuatan ku iyan is puasa he egkezumahan te metazeng he ulaula: Engkezi niw is kebpendaagdaag wey kebpepirisu te menge wazà mekesalà, wey libriya niw is menge edèdaaǥen.

⁷Beǥayi niw te keenen is egkengevitil, ipeubpè niw ziyà te menge valey niw is menge wazà egkeubpaan, bistiyi niw is menge wazà bisti, wey tevangi niw is menge kezuzumahi niw he ebpenginahanglan.

⁸Emun ebeelan niw heini, ebpekeuma ziyà te keniyu is kelibriyanan he iring te edsilà he andew, ne segugunè ku sikiyu ebewii wey kew meulii. Siak is metazeng he Megbevayè niw, ebpetelihuna a keniyu ne ebpengelangan ku sikiyu pinaaǥi te mekeǥeǥehem he kebpekiduma ku.

⁹Emun ed-umawen a keniyu su ebpetavang kew, edtevaken ku sikiyu. “Emun ed-engkezan niw is kebpendaagdaag, is kebpemesangil te binèbeelan dà, wey is kegkaǥi te mezaat,

¹⁰wey emun ibpekaan niw is menge egkengevitil wey ebeǥayan niw is menge pubri te menge kinahanglan dan, ebpekeuma ziyà te keniyu is kelibriyanan he edsiǥa ziyà te merusirem he kebpekesavuk niw ne egkeiring heini te meudtu.

¹¹Layun ku sikiyu egiyahi, ne edhimuwen ku he mekuntintu kew en minsan mereǥen is kebpekesavuk niw. Ebbeǥayan ku sikiyu te meupiya he kedlelawa, ne egkeiring kew te pemuleey he kenà egkekurang is wahig etawa serebseb he kenà egkemezahan.

¹²Ed-umanan ebenguna te menge kevuwazan niw is menge inged niw he neuǥet en he nevengkag, ne ebpurungan dan is daan en he menge pundasyun. Egngezanan kew he menge etew he memumurung te nerundus he menge verengbeng wey menge valey.

¹³“Kinahanglan he edtumanen niw is menge ebpeveelan ku zutun te Andew te Kedhimeley. Kenè niw veeli is menge vaal he para zà te keugelingen niw he kelipey zutun te segradu he andew. Ikelipey niw is Andew te Kedhimeley, ne pekeveǥata niw heini pinaaǥi te kenà kebpetuyang te egkesuatan niw, wey ked-engked kegkaǥi te menge lalag he wazè din pulus. Emun ebeelan niw heini,

¹⁴ebmelipayen kew te kebpenilbi niw kedì. Ebeǥayan ku sikiyu te zengeg kayi te tivuuk he kelibutan, ne ebpezaharan ku sikiyu te menge abut te tanè he nepengevilin niw ziyà te kepuun niw he si Jacob. Egkehitavù heini, su iyan a, is Nengazen, is migkaǥi kayi.”