1Zanezar Tuweharupi Wiko Ma'e umuzàg kar zegar haw hezemumikahy haw hexak kar har a'e kury, mokoz Izaew wanuwihawete rehe har a'e kury.
2Nehy wiko zàwàruhu iriàw kuzà ikàg ma'e romo a'e. Wata amogwer iriàw wanupi. Umugakwaw kar umemyr iriàw wainuinuromo wà.
3Umugakwaw kar umemyr. Umu'e miar zuka haw rehe no. Imemyr wiko teko i'u har romo.
4Teko tetea'u umume'u heko haw uzeupeupe wà. Na'e upyhyk ywykwar pupe wà. Ukutuk ixi iapu'a ma'e imono pà hehe wà. Umutyk heraha Ezit pe wà.
5Iriàw kuzà upytu'u uzepyro àwàm hàro re. Na'e umuzehu kar amo umemyr a'e pe. Imemyr wiko iriàw ipuruzukaiwahy ma'e romo.
6Itua'u mehe wata amo iriàw wanupi. Uzemu'e miar izuka haw rehe. Wiko teko i'u har romo a'e no.
7Weityk tàpuzuhutàtà tetea'u. Umumew tawhu tetea'u no. Ikororo mehe tuweharupi teko izywyr har uryryryryz wà.
8Teko uzemono'og iàmàtyry'ym pà wà. Teko ywy nànànar ur a'e pe wà. Umuzaiko kyhapari miar pyhykaw wà. Upyhyk ipupe wà.
9Ukutuk ixi iapu'a ma'e imono pà hehe wà. Umutyk imunehew paw imupari pyrer pupe wà no. Na'e weraha Mawiron ywy rehe har wanuwihawete pe wà kury. A'e pe har wezar imunehew paw pupe wà. — Nezewe mehe naxinu pixik kwaw ikororo mehe ywytyr Izaew ywy rehe har rehe zane nehe, i'i wà.
10Izaew izuapyapyr wà. Pehy nuzawy kwaw uwà 'yw. Amo utym i'yw yrykaw huwake. Hàkà tetea'u. I'a katu no. Ta'e heta tetea'u 'y izupe xe.
11Hàkà ikàg. Ipukua'u. Te uzeapo tuwihawete ipokokaw romo. I'yw aiha katu. Te hàkà uhem ywak rehe. Teko paw wexak iaiha katu haw wà. Wexak hàkà katu haw wà no.
12Nezewe rehe we wikwahy ma'e ozo'ok i'yw oho wà. Weityk ywy rehe wà. Ywytu kwarahy heixe haw wi ur ma'e umuxinig i'a kwer. Amo omonohok hàkàgwer wà. Uxinig. Na'e teko wapy tata pupe wà.
13Ko 'ar rehe i'yw upyta ywyxiguhu rehe kury. Uxinig a'e 'y. Naheta kwaw 'y a'e pe.
14I'yw ukaz. Tata umumaw hàkàgwer uwà rehe we. Hàkà na'ikàg wi pixik kwaw nehe. Nuzeapo pixik kwaw tuwihawete pokokaw romo nehe. Teko umuzàg tetea'u a'e zegar haw uzemumikahy haw hexak kar haw wà.
