1Holoutora gaira tara tughuru kakai, mara taonighi nina lei vetena Lord.
2Holoutora gaira ahei tara pangotighi nina vetena, mara kene taonia nia na tobadira udolu.
3Agaira tara mua lavipangotia na dika, mara sakusaku tua vamua tana puku ni halautuna.
4Ighoe to vetena ghai ge kai pangoti utoi nimua na lei vetena.
5Na lei nilabugu kara tughunitatei na lei nimua puku ni ghanaghana.
6Ge ku bei mamahaghi gea, tana bona ku righi talu kolua na volagu nia nimua na vetena.
7Tana bona inau tu naunaui nimua na vetena maemane, inau holoutogho nia na volagu te vagha tu ghaghua tua igaa.
8Inau ku pangotighi nimua na lei puku ni ghanaghana, mu kurutigho ko bei lubatiu gea.
9Na lei tinoni vaolu, ivei kara ghaghua ge kara kabu maemane? kara pangotia mughua na bosamu na nimua na lei vetena.
10Inau tu tabotabo na kene taoniamu, mo ko vei lubatiu gea ge ku sagauvia na bosamu.
11Na lei bosamu te kabu polo tana tobagu, ge ku bei kabalaghi savugho gea.
12Holoutogho ighoe, Lord, mo ko taraiu nia nimua na puku ni ghanaghana.
13Na pukuna inau tu bosa tatei na lei nimua na lei vetena to vaheu mai tua.
14Inau tu nighi togotogo nimua na lei vetena, vagha ghua tana lei hala ni sosodo.
15Inau ku naunaui nimua na vetena, te tughunitatei na halautumu.
16Inau ku nighi rivurivu nimua na lei puku ni ghanaghana, mu ku bei nia ponolio gea na bosamu.
17Ko utoutora nimua na lei tinoni ni lutu, ge ko vola ma ka pangotighi na bosagu.
18Ko davorai na matagu, ge ku vaevanei nimua na vetena haeharegha te utuni.
19Inau na tinoni haghe mai vamua iani maramana. U liona nimua na vetena ke huliu, ko bei talu taluravighi vaniu gea.
20Na pukuna na lei bongigu te mavatia na ghanaghanani nimua na lei vetena.
21Ighoe to tughuru pungisira gaira arahei tara kanahaghi mai a talu maghora heghedira, mara nighi murilio nimua na lei vetena.
22Ko bei lubatira gea ge kara bosa dika tau, na pukuna inau tu pangotia nimua na lei vetena.
23Na lei vinahogho tara sopou mara kokoe hughuhughu. Mi nau tu ghanaghana vaovarongo nimua na lei puku ni ghanaghana.
24Nimua na vetena te vaheu na togotogo, me vaheu na bosa patupatu ni manaha.
25Na huligu te koli tana pari, me hughuhughu polo ko ghoi vola oliu mai ghua nia na bosamu.
26Inau tu bosa vatei vanigho tua nigua na lei arelavaghi, mo bosa tughui, ko taraiu mai nia nimua na lei puku ni ghanaghana.
27Ko hangau ge ku ghilala manahani na ghanaghana i lokana nimua na lei vetena, ge ku ghanaghana vaovarongoi nimua na lei butuli te haeharegha.
28Inau tu nia tangi na dikalio, mo ko patupatu mai nia na bosamu.
29Ko pilupungisiu mai ge ku bei pego oliu gea, ko vaheu mai na maana ni ghilala manahani nimua na vetena.
30Inau tu liona na pangotiani mara kabu taoniani nimua na lei vetena.
31Mu ku vavaravaghi nigua igaa, Lord, ko bei neu ge ku ghoi nighi maa oli.
32Ke vagha ko hangau ke, inau ku sama maemane taonia nimua na lei vetena.
33Lord, ko taraiu mai, ge na lei tinoni kara taonighi lei nimua na puku ni ghanaghana.
34Kova heu mai na manaha ni ghilala, mu ku taonighi nimua na lei vetena, Inau ku naunaui nia na tabagu udolu.
35Ko neu inau ge ku sakutua taonia na halautuna nimua na vetena, iga ku sodoa na puku ni togotogo.
36Ko vaheu mai na puku ni ghanaghana mava, taoniani nimua na vetena mo ko bei taghalaghiniu gea nia na doloviana na rongo.
37Ko riu keha na matagu tana lei totobo toposo, ge nia na bosamu ke vaheu na vola.
38Ko patupatu mai nia nimua na baubahu, ma vanira ahei tara tahi mavagho.
39Ko hangau, ge ku nighi murilio, na nilabugu tu nighi maa, na pukuna nimua na vetena vamua tu liona tana volagu.
40U liona na pangotiana nimua na vetena, mo ko maumauri olia mai na volagu nia nimua na uto.
41Lord, ko vaheu mai nimua na dolo ke mua soko, na vola te vagha to nia baubahu tua.
42Mi nau ku hera na bosa tughu, gaira rahei tara ghanaghana ruarua, na pukuna inau tu varava tana bosamu.
43Ko bei lavi keha gea na bosa ni utuni itagua ta nimua na vetena vamua te ghaha nigua na pitudilaa.
44Inau ku pangotighi haia nimua na lei vetena ke va me va.
45Inau ku sakutua tatavahale, mu nia hevei oli na volagu, na pukuna nimua na vetena.
46Inau ku kokoe vanira na lei vunaghi nia na bosamu, mu ku mua ghoi maa ghua.
47Nimua na lei vetena, tu dolovighi mai tua.
48Inau tu ghanaghana mavai mu dolovighi nimua na lei vetena, mi nau tu ghanaghana vaovarongoi na lei nimua puku ni ghanaghana.
49Ko ghanaghana olia nimua na baubahu itagua keri vamua tu ghanaghau dilaa.
50Nimua na baubahu te togholuvu inau, me va patupatu ta nigua na vahola.
51rana talunagho tara pasapasau mara mua ghanaghana mavau. Hauva inau tu mua nia murilio nimua na vetena.
52Inau tu ghanaghana haia nimua na vetena haulaghi, Lord, ge gaira kara patupatu.
53Nau tu rutu papara vanira tana tangohahi, na pukuna tara mua pangotighi nimua na lei vetena.
54Nimua na puku ni ghanaghana te vagha na lei linge lokana na vola ni volagu, lokana nigua na niulu ni vinano.
55Tana lei bona ni bongi, Inau tu talu tatea ahei, Ighoe Lord, Mi nau tu taonighi nimua na lei vetena na pukuna eni.
56Eni na halautuna na volagu, tu nia togotogo, ge ku pangotighi nimua na lei vetena.
57Lord, Ighoe nigua! Inau tu baubahu ku pangotighi na lei bosamu!
58Na tobagu udolu te liona nimua na vauto. Mo ko aroviu te vagha to nia baubahu.
59Inau tu kene ghanaghanana na halautuna na volagu, mi nau tu ririu ge ku taonia nimua na lei vetena.
60Inau tu lio mina, mua kiki na taoniani nimua na vetena.
61Na lei tinoni dika tara ghora hagheu ge ku kabalaghi, hauva, mi nau tu kau ngasi so ta nimua na lei vetena.
62Tana bongi hau inau tu tapatughuru mu holoutogho nia nimua na vetena maemane.
63Ahei tua ke nigho kikinima gaia keri na kulagu, maia ghua ahei ke pangotighi nimua na lei vetena.
64Lord, na maramana udolu te vonughia nimua na dolo ke mua soko, ko taraiu mai nia nimua na lei puku ni ghanaghana.
65Lord, e subo na totobo uto to gonighi vaniu te vagha to nia baubahu.
66Inau tu taluutunighi nimua na vetena, mi taeni ko taraiu nia na dete maemane mana manaha.
67Idania Inau tu tona hahi ritini na bona to va maemaneu, mi taeni inau tu taoni maemanea tua na bosamu.
68Ighoe to uto mate to gehegehe uto, to taraiu nia nimua na lei puku ni ghanaghana.
69Agaira ra talunagho tara huru kikou,, mi tana utuni nau tu pangotighi nimua na vetena tana tobagu.
70Na tobadira te kutu vatu mara bule, ma nigua na togotogo te ghaha so ta nimua na vetena.
71Na vahaghitaili to nia vetena vaniu mai te uto, me tarai manahau ge ku kabu taonighi nimua na lei puku ni ghanaghana.
72Nimua na vetena te mava vulea na mola ni gold, mana silver tagua!
73Ighoe to goniu mo talu titinoniu, mo vaheu na manaha, ge ku taonighi nimua na vetena.
74Agaira kara nigho kikinima itagua kara topoa na togotogo, na pukuna inau tu talua nigua na ghanaghana dilaa tana bosamu.
75Lord, inau tu ghilala, nimua na lei dete tara maemane, me ulaghana ge ko dete maemaneu.
76Lubatia nimua na dolo te mua soko ge ke patupatu inau. Te vagha to bahuu nia, nimua na tinoni ni lutu.
77Lubatia vaniu mai nimua na dolo veiarovi ge ku vola, na pukuna nimua na vetena to nia togotogo.
78Lubatira tara talunagho ge kara nira sika, na pukuna tara vuhavuhau, mi nau tu varava ngasi so ta nimua na lei vetena.
79Lubatiu ge ku sakai sonikolu itadira, tara nigho kikinima, tara ghilalai nimua na lei vetena.
80Kara bei huru kaleu gea na pangotiani nimua na vetena ge ku bei maa gea.
81Na lokagu te pitu dilaa nimua na maana ni vola, na pukuna tu ghanaghana dilaa na bosamu.
82Na matagu tara arehia na righiana nimua na bosa ni baubahu ke mai utuni. ke ghua nigha ko togholuvu?
83Inau tu pororodi vagha na madoke tana ahu ni lake, tu pitu lugu tua. Hauva Inau tu varava ngasi so ta nimua na vetena ge ku pangotighi.
84Vei ke vagha na darona na bona ku pitu? ke ghua nigha ke vahaghitailira gaira tana kanahaghiniu?
85Na vure talunagho raini tara nia sika nimua na vetena, tara gheli gilugu ge ku kutu haghe ilokana.
86Nimua na lei vetena udolu tara utuni. Mara huru kikou, mi ghoe vamua ko hangau.
87Gaira tara dutu ni mateagu, mi nau tu mua sanighi nimua na lei vetena.
88Ta nimua na dolo te mua mautu, ko volau ge ku tangomana na taoniani nimua na vetena.
89Lord, kasila, na bosamu ke kabu kasila kokou.
90Nimua na kikinima ke horavia na lei vavata, ma nimua na talu puku te berea na maramana to gonia.
91Nimua na vetena itaeni te utuni, mana lei totobo soko tona kalea nimua arelavaghi.
92Nigua na togotogo ke mua sabea nimua na vetena ke, nigua na dikalio vamua ke mateu.
93Inau ku mua nighi ponolio nimua na lei vetena, na pukuna gaira ge u lavi olia na vola mana laga.
94Inau nimua, ko volau! Inau heghegu tu kenea ge ku taonighi nimua na vetena.
95Na lei tinoni dika tara polo inagho na matagu, mana bosamu vamua tu pangotighi.
96Mana lei totobo maemane soko tara sosokogha, ma nimua na vetena tara mua sosokogha.
97Inau tu dolovia nimua na vetena. Mu kene ghanaghana haia tughu bongi.
98Nimua na vetena te va manahau, vulera na ghagua na levunimate, na pukuna nimua na vetena te huliu.
99Eo, inau tu manaha vulera, gaira tara taraiu, na pukuna tu ghanaghana olighi haia nimua na bosa ni tarai.
100Inau tu manaha vulera na lei tonikama. Mu pangotighi nimua na vetena.
101- Inau tu hove ge ku bei sakutua ge tana haba te dika, ge mu ku pangotighi vaso na bosamu.
103E manilu ngangata na bosamu tana ghidugu, te manilu vulea na kokolo ni midua.
104Nimua na lei vetena te vaheu na manaha, vagha keri ge u nighi sika na lei hala kiko ni vola.
105Na bosamu ke uhulighi na marevogu, me ke va mararai na lei halautugu.
106Inau tu diki nia baubahu tua, mu ku ghoi baubahu so, nimua na lei vetena inau tu pangotighi.
107Lord, inau tu vahaghitaili sule ngangata, talu oli mai na volagu, te vagha to nia baubahu tua
108Lord, ko lavi pangotighi nigua na puku ni holouto, mo ko tariu nia nimua na vetena.
109Na volagu te mua ghadaru keha tana limagu, mu mua beto na taoniani nimua na vetena.
110Na lei tinoni dika tara talua vaniu na piti ge ku hogho ilokana tana halautu, mu ku mua ririu keha sania nimua na vetena.
111Nimua na arelavaghi te nigua na puku ni nilau, te nighi puku ni togotogo na tobagu.
112Inau u kene ghanaghana ge ku pangotighi nimua na vetena, ritini tana sosoko ke va me va.
113Inau tu nira sika ahei tara mua kene ghanaghanamu ighoe, ma nigua na vilivili te maemane. Mi nau tu dolovighi nimua na lei vetena.
114Ighoe a nigua na vatei puipungisi mana tako ni rerebe, tana bosamu vamua ku varava ngasi.
115Kau tokeha itagua, ghau rana vure dika, ge inau ku righitaonighi na lei nina vetena nigua na God.
116Lord, ko patupatu mai te vagha to nia baubahu, ge ku vola! Ko bei lubatia nigua na ghanaghana dilaa ge ke paruruha.
117Ko sabe datou, ge ku vola, mu ku kene ghanaghana ni haia na lei nimua na vetena.
118Mi ghoe to nira murilio tara sanighi na lei nimua na vetena, na pukuna didira na pegopego.
119Na lei tinoni dika tana maramana eni tara vagha na vuvulogo tara kavulaha, hauva inau tu dolovia so na bosamu.
120Inau tu nigho mataghu kikinima ngangata, mi nau tu mataghunighi nimua na lei dete.
121Ko bei lubatiu vanira ghagua na levunimate, na pukuna inau tu nia kaukauli na totobo te uto mete maemane.
122Tu kurutigho ko nia baubahu vaniu na vauto, ko bei lubatira gaira tara talunagho kara dikalau.
123Na matagu te mua righi kalea na utunina na rughu horuana nimua na baubahu ke mai utuni.
124Inau nimua na tinoni lutu, ko maemane mai nia nimua na dolo te mua mautu, mo ko taraiu nia nimua na lei vetena.
125Ko vaheu mai na manaha ni ghilala, nimua na tinoni ni lutu, ge ku ghilala manahani nimua na lei vetena.
126Lord, te poso tua na bona ni lutu, mana lei tinoni dika tara hurakea nimua na vetena.
127E utuni, inau tu dolovighi nimua na lei vetena, vulea na gold haba vaa na puku ni gold.
128E utuni, na lei nimua na vetena soko tara maemane. Vagha keri, inau tu nighi sika na lei halautu te mua utuni.
129Na lei bosamu tara rongoragha. Keri ge u taonighi.
130Ra ia tarai na bosamu, me nia hevei na marara, mana ghilala vanira rana tovongo.
131Inau tu vukesi dilaa na mangagu, mu pitu dilai tua nimua na vetena.
132Ko tatea vaniu mai nimua na veiarovi, te vagha to nea vanira ahei tara dolovia na ahamu.
133Ko uhulighi nigua na sakutua nia na bosamu, ge ke bei laga vuleu gea na totobo te dika.
134Ko volau tadira na lei tinoni dika, ge inau ku taonighi nimua na lei vetena.
135Ko rei horu mai vuvungagu nia nimua na dolo, mo ko tarai manahau nia nimua na lei puku ni ghanaghana./vetena
136Na kolobu ni daidari te Sali horu mai tana matagu, na pukuna na lei tinoni tara mua taonia nimua na vetena.
137Lord, ighoe to maemane, ma nimua na lei dete te utuni.
138Nimua na lei bosa ni vetena tara uto, te manana ge kai taluutunighi.
139Inau te vonughiu na rutu papara, na pukuna na ghagua na levunimate tara mua taonia na bosamu.
140Ra tabotaboi tua nimua na lei baubahu, vagha keri ge u dolovi ngangatai.
141Inau tu pile kikia ngangata me vesikagu, mu mua nighi ponolio nimua na lei vetena.
142Nimua na maemane te kasila, ma nimua na vetena te utuni.
143E mavatiu ngangatau na liogu, hauva ku topoa na togho lugu mi ta nimua na vetena vamua.
144Nimua na lei dete te maemane haliu, ko hangau ge ku manahani ge ku vola.
145Inau tu nia kokoeliulivuti na tobagu udolu, Lord, ko bosa tughu. Ge inau ku vatoghai nimua na lei vetena.
146Inau tu tangi ngangaraha ge ko volau ge ku taonia nimua na vivili.
147Inau tu rarai labota, naghona na sogha ni aho, mu tangi ngangaraha ge ko hangau, mi tana bosamu vamua ku talua nigua na ghanaghana dilaa.
148Inau tu daidanihaghi, tu ghanaghana olighi nimua na baubahu.
149Lord, ta nimua na dolo mana maemane tu varava, ko rongovighi nigua na ngangaraha, mo ko volau.
150Na vure tara mua taotaoni tara dutu ni mai labuagu, na pukuna tara mua taoni vetena.
151Lord, Ighoe to mua kabu hau, mana nimua na lei vetena soko tara utuni.
152Idania, tu ghilala te mua tughu nimua na lei ghanaghana.
153Ko rei horu mai vuvungani nigua na dikalio, mo ko volau, inau tu mua nia ponolio nimua na lei vetena.
154Ko niu pala ta nigua na livu, mo ko hughu tughu. Ko pilupungisia na volagu to nia baubahu.
155Rana dika tara sagauvia na vavolamu, gaira tara mua talu koekoeni nimua na lei vetena.
156Lord, E sule ngangata nimua na veiarovi, mana maemane ko hea oliu mai na volagu.
157Subo tara gunaliu mara vaheu na vahola, hauva inau tu mua tabalili keha sagauvi nimua na vetena.
158Inau tu nira sika gaira tara perou, na pukuna tara mua ghanaghana mavai na bosamu.
159Lord, ko righia, u dolovi ngangata nimua na vetena ko vahe oliu mai na volagu, na pukuna nimua na dolo te mua mautu.
160Na lei bosamu tara utuni, ma nimua na lei vetena maemane kara ghaha kasilai.
161Rana haba tara gunali tabou, mana bosamu te nia marate na tobagu.
162Inau tu nia rivurivu na bosamu, te vagha siki sakai te sodoa na puku ni nilau.
163Inau tu nia bati mu nia sika na sorisori, ma nimua na vetena vamua tu dolovia.
164E vitu na tughuru ni holohabaamu ta sakai na dani, na pukuna nimua na vetena tara maemane.
165Gaira tara dolovighi nimua na vetena tara loghoa na puku ni mabo, ma kara mua taitarikiti.
166Lord, inau tu kene taonia nimua na maana ni vola, mu gonitaonighi nimua na lei vetena.
167Inau tu taonighi nimua na lei vetena mu dolovighi.
168Inau tu taonighi nimua na lei puku ni ghanaghana mana vetena, na pukuna ighoe to ghilalai na lei totobo soko tu gonighi.
169Lord, ko rongovighi mai nigua na ngangaraha, mo ko vaheu mai na lio maghora to nia baubahu.
170Ko rongovighi mai nigua na kokoeliulivuti, mo ko volau te vagha to nia baubahu.
171Ko lubatia na ghidugu ge ke tavukesi ge ku holohabagho, na pukuna ighoe to taraiu nia nimua na lei vetena.
172Lubatia na lapigu ge ke lingei na bosamu, na pukuna nimua na lei vetena tara maemane.
173Ko gonidilaa ge ko hangau, na pukuna tu vilia ge ku taonia nimua na vetena.
174Inau tu pitu dilaa haia nimua na maana ni vola, Ghe Lord, mu nia togotogo nimua na lei vetena.
175Ko lubatiu ge ku vola ge ku holohabagho, ma nimua na lei vetena kara hangau inau.
176Inau tu hughi keha te vagha na bolo asi, mai mo ko kene taoniu, Inau tu mua nighi ponolio nimua na lei vetena.
