1Vania na tinoni gehe linge: linge kolua na lei ghalo ni gougonu. Na linge nina Asaph A God tara ghilala i Judah. Mara holohabaa na ahana rana Israel.
2Na komuna i Jerusalem. Me ghahaa tana ghotu i Zion.
3Agaia te goat sodui didira na lei kuali rana ghana levunimate. maia didira tako mana isi mana lei totobo ni veitotoghoni.
4God, Ighoe to rongoragha, mo vunaghi haba! tana bona to oli mai tana lei ghotu. Iga to laga vulera ghamua na kana.
5Ma didira na lei malaghai laga tara sagu keha kolui didira na totobo: Mara matera tua me taho tua siki sakai ke ghoi kokoe vanighai mai taeni.
6Ighoe God ta Jacob tana bona to pasara: A gaira tara haehaghe i vuvungadira na horse tara tumu horu mara mate.
7Ma keri te vaghaa ge subo tara mataghu nigho ighoe Lord, me taho siki sakai ke tughuru tana matamu tana bona to rutu.
8Mi ghoe to ladavaghinia nimua na bosa ni dete mai kokou, vania ghamua na kana, Mana maramana te mataghu me beto tana matamu.
9Tana bona to detera tara tangohahi hahi mo hangara tara vahaghitaili tana maramana.
10Na rutu ni tinoni te liliu ni holohaba vanigho ighoe Ma gaira tara vola tana kisumate kara pangotia nimua na bongi ni savukolu.
11Kau va hea na Lord nimiu God na hava tau nia baubahu kau dolovia nia ma kau vaa hea nimiu na hevei oli, ighau na lei kema tau dutuvia.
12God te nera na lei tinoni ge kara talumava; Me nera na lei dalei vunaghi haba ge ra talumurira mara mataghunia na lei vunaghi haba ni maramana talighu.
