1Mua tamami, Lord, tamua vamua ke va mai na lei rongoragha, ta nimua kikinima ta nimua na dolo te mua mautu.
2Eghua ge o lubatira na vure ge ra bosa, “ivei didira na God?”
3Ghada na God i kokou, ma gaia te nei na lei totobo te lioni.
4Didira na titinoni na totobo lee vamua, Ma ra gonira nia silver mana gold, te gonighi na lima ni tinoni.
5Ra loghoi na mangadira, mara mua nighi kokoe, mara logho matadira ma kara mua nighi reirei na matadira.
6Na kulidira iga, kara mua nighi rongo, na ihudira iga kara mua nighi uruurumi,
7Na limadira iga kara mua nighi taotavongo, na tuadira iga ma kara mua nighi sakusaku tua, na sosonodira iga ma kara mua nighi kokoe tate.
8Ma gaira tara sarighi, tara vaghara oli heghedira, ma gaira tara varava tadira.
9Ighoe Israel, ko varava i tatana Lord, agaia nimua na tako ni pilupilu.
10Nina mane ni sukaghi Aaron, kau varava ngasi itatana Lord, agaia nimui na tako ni pilupilu.
11Ghau soko, tau nia kikinima Lord, kau varava itatana Lord, agaia nimiu tako ni pilupilu.
12Lord, te ghanaghanaghita, agaia ke vautoghita, gaia ke vautora na vure ni Israel, na lei mane sukaghi ma nina binaboli Aaron.
13Gaia Lord, ke vautora tara nia kikinima, gaira tara sule ma tara pile.
14Ghau, mana lei dalemiu, nina vauto Lord te sule ngangata i vuvungamiu.
15Gaia Lord ke vautoghau, te gonia na parako mana pari.
16Na parako nina Lord, me vahera na lei tinoni ni maramana.
17Na lei tinoni mate kara mua tangomana na linge holoutoana Lord. gaira tara tona mara beto tana gilu.
18Mi ghita ka tangomana na holoutoana Lord, itaeni maia ke va me va. Holoutoa Lord!
