15Erâ juku ŋic biaŋne â sâqocne hâmockonec fafahare maickeocmu, irec ŋic keci jaŋe â no mâmâc mamanac jueŋgopeneŋ.
16Iŋuc ehuc Anuture maio â ŋicmaio bahacmâc jupemurâ rucnane bahuc jaha juekopac.
17“Eme no jara bocjaha mâreŋ wiwicko juhuc mitire moneŋ qânusuckeku Jerusalem haeo ŋic âgofâc‐nâŋec jaŋerao warepo.
18Erâ bâzi ririkere baʒawierâ taha ufuŋko ferâ juhape bâfuacnumbiŋ. Ira ŋicguruo juju me dâŋfânâŋ sâkohec juju ine arictac.
19Asia mâreŋkonec Judaŋic gâcne jaŋe ine iŋuc embiŋ. Jaŋe hâcne nore bahac moc manaŋgopieŋko gorao fisirâ mutaniŋkenʒapiŋ.
20Me micne bapa tutumaŋko domahape nore bahac moc bâfuambiŋko ŋic domaŋgopieŋ ʒizi gazaniŋ.
21Jaŋe no dâŋ mocjaha sawa ŋondeŋ‐jeŋicko domahuc mupe manapie mi mecne sâckewec, ine hahaŋne bahuc kecʒiŋuc jazapo: ‘Hâmockonec fafahare fokac, dâŋ i dopeckeekopacte gâcnezi dâŋko râecnupie mai‐ŋeŋicko domakopac ʒi.’”
22Kia Feliki e Paulore dâŋ i mi mutarahuc mâc râeme fowec. E miti ɋâricnere biŋe mana‐hâmowecte ʒiŋuc sawa jazawec: “Momori soŋaŋ Lisiazi Jerusalem haeonec wahame dâŋŋeŋic mutarapemu.”
23Iŋuc murâ momori micne ʒiŋuc âzâcnewec: “Ŋoŋe Paulo soŋaŋkehuc râsi ʒâŋe mi ecnenʒepieŋ, â âgofâcne fisirâ jauŋ bazo mupie mi qatara‐jarenʒepieŋ.”
24Ʒoaŋ gie bapa tucne jurâ Feliki e Juda guruonec ŋonâŋ‐ticne Drusila ehec mâmâc ŋehuc Paulo ecneme hefârâ Kristo Jesu manasiŋkembiŋ irec fuŋne jasawec.
25Ehuc tiŋke biaŋ eere â sasecte sowa jujure â okac dameŋte mume Felikizi weaŋkerâ Paulo ʒiŋuc âzâcnewec: “Sâcne rac, juku nacnere dameŋ sawane moc fua‐nareme mocwâc hefârecgupemu.”
26Kia e Paulozi moneŋ narezejec muhuc dameŋ sâc hefârerâ ehec dâŋ muc manac ejujec.
Aposolo Jaŋere Binaŋ 24
Aposolo Jaŋere Binaŋ 24:15-26