Yum̃aena Lala 24:15-26

¹⁵Ana taveve suri la nene, in na nep̃asine ga Ntewa, maran taaga sa ke ga nap̃a la m̃ena ga apisu ga naga, asape p̃isi na naga kila yaru la make ga am̃al ke sina ga e marena, naga nene na la nap̃a la amesmesu e marana, a la nap̃a la pe amesmesu re e marana poli.

¹⁶Ana komin nap̃a nekilia m̃a nesape p̃isi na Ntewa kila sanene, in na pe nesitom re nena nesape nekila p̃elaga viowa tai sanene poli, ana e pogos punu ga, in na nop̃aryo pap̃isi vena narin suri tai ve yur inu re pogos tai visave in na nekila ke piowa e marana ne Ntewa pona e mara yeririna lala.

¹⁷“Ana kas lap̃asia p̃aro pa rui, in na nepa nesike e purvanua tap̃ena lala, ana siraunia, nanagane ga ne, in na nep̃asup̃e inu ke sina ga nepimi Yerusalem. Ana yaru nae gare lala, la akuwan nalaena tai vena iilaen kiamimi yeririna lala nae Yerusalem, ana in na nop̃ar nalaena nene nepimi, nep̃ar pan la, a in na sineun nesape neva nekila ke m̃ena ga kup̃ap̃aena lap̃asia e Yum̃a Wa m̃ana ne Ntewa.

¹⁸Ana pogos nap̃a nesike e Yum̃a Wa, nekila kup̃ap̃aena na ikikiena rui, ana la nene la apimi apisu inu. E pogos nene, pe yaru tap̃ena re la asike amio inu poli, a pe visena re poli pona m̃aagena re nena poli, peraga, ana siraunia, le Yu lap̃asia nae Esia apimi, ana la ke nene narui nap̃a asiar veveyuena nene.

¹⁹Ana la nene nap̃a ape purp̃es nen sur nene, visae la asitom asape in na nekila sur tai piowa, ana popon visae la m̃ena asike amio ita e nini nanagane vena la avisawal li van ko, ana pe nom̃al la re poli.

²⁰Visae peraga, popon oviunli tan yaru tap̃ena la ne asike ne, ovisave pogos nap̃a la ap̃ere inu nepa e kiela kumali, am̃al sane in na nekila ya. ?In na nekila ya ne pe mesmesu re poli, pona nepisa visena ya nap̃a piowa? In na pe nom̃al re poli.

²¹Ana visena taaga ga nap̃a nepisa, nepisa sanini, nesape: Inu na nepisu sane sinemiun asape avis van inu p̃ane, komin ga kiau nalelagaena nene, nap̃a pisape pogos nap̃a yaru mare, p̃isi na, naga kilia mali ke sina ga. Nepisa visena nene p̃isi, ana kila la ga asum̃a apeveyu ke sina ga pan la.”

²²Ana P̃arin Sup̃e Pilikis nene, naga kilia towe m̃a sur moki rui e lepas na Mrapa Viu nene, ana pogos nap̃a naga pisu sane veveyuena nene, le Yu lala amio Pol akila vanon ga sur nena ga la nene, ana naga kalo nena visena, pisape “Poga ga, p̃isi na ita tesum̃a e nini sumo wa. P̃isi na nesum̃ate ke ga yerkawa kiena ne yaru na kilaen mara la nene Lisias vena kom ma Yerusalem vitomi neloge ruru kiena visena nene wa, p̃isi na nela kiau nalip̃ereena van amiu.”

²³Ana naga pisa pan kiena yaru na kilaen mara lala, pisape la atarar ga Pol, apisuar naga, ana naga pisape ve akila manene re m̃arera vania, la monar atam̃an naga yaloro m̃aga, a ve avisalup̃ar re kiena erau lala vena aimi ayaliali naga avisuaria.

²⁴Ana P̃arin Sup̃e Pilikis, naga wona sira re Yu tai, kiena kia Trusila, ana lalua nene la sinelan asape asun re amio Pol wa. Ana legiena lap̃as p̃arovia, ana lalua apimi e yo nap̃a Pol sike ea, ana ap̃ere Pol pimi pula, ana Pol pisi amio lalua, naga pisayu kiena nalelagaena nap̃a e Kristo Yesu.

²⁵Ana Pol mligan visena la moki la sane pan lalua, naga sitom p̃ele la ga, naga pisayu sanape nap̃a yaru monar kila p̃elaga mesmesu, a nap̃a yaru naga monar kawe ruru kiena malena mesmesu, a pisayu m̃ena ga nalip̃ereena kiena ne Ntewa nap̃a p̃isi na imi e Legiena Maro. Ana pogos nap̃a Pilikis mloge visena la nene, naga mloge sane miyur manene kiena sitomena pap̃isi, kila narui naga marau towe laa sane, ana naga pisa pa Pol, pisape “Poga ga, toroki narui. Ko ova si loyum̃a e nene sumo wa, ana visae nelual si kiau pogos tai, p̃isi na neligan si visena vim̃asun ko.”

²⁶Ana pogos nap̃a Pilikis pisa visena nene, naga kiena sitomena viowa m̃ena ga tai tom̃a ga, nap̃a naga sitom ke pisape p̃isi na Pol naga war kilavaru keviu tai vania, vena kilia visa va Pol visave Pol kilia molue sina. Ana kiena sitomena nene kila narui naga mligan luen ga visena panon Pol, a naga sum̃a sun amio naga yam mokliu.