1Eme Agripazi Paulo ʒiŋuc âzâcnewec: “Gahac fuŋnege mutec mananaŋ.” Eme Paulozi meticne sicnerâ dâŋ ʒiŋuc jazawec:
2“Judaŋic dâŋzi dâŋ enarehuc jueŋgopieŋ irec ŋifecne ŋicwofuŋ Agripa miŋecgac gore maio mupemurâ bunane biaŋkekac.
3Go hâcne Judaŋic mitire hehefaric‐nâŋecte â wiac eenâŋecte fuŋne manaekic. Irec go mana uruehaŋtec dâŋnane mupe.
4“No motec ɋie‐naneoa Jerusalem haeo ŋic âgofâc‐nane jaŋere ŋondeŋko juku sokapo.
5Irec Judaŋic mârâc honecnumbiŋzi juju‐nanere fuŋne manaeŋgopieŋ. No farisaio ŋic mitire neŋgocne embiŋ jaŋere guruo hâcne jupo. Eme fuŋne‐nane hone manac embiŋzi muzo murâ munʒapiŋ.
6No kâpâcwâru ficko foekopac i wiac mocte mâcne, Anutuzi mimiŋnefâc‐nâŋec biŋedâŋ jazawec,
7eme dâŋ i fârinehec eocte Israe ŋicguru 12 jaŋe ŋafe ʒoaŋ qâqâtiri Anutu tiwâ bâzi rikecnehuc mai ecneeŋgopieŋ, ŋicwofuŋ‐nane, biŋedâŋ irec hâcne Judaŋic jaŋe dâŋgie nareeŋgopieŋ.
8Anutu e hâmokicne bâɋârec‐jopaekac, i ŋoŋe wemocte manapie mi eene tinac eekac?
9Erâ no nahacnere mupe, no Jesu Nazarete haeonec ere ʒâŋe biŋe imackepe sifuckeocte gie‐nane ewec.
10Jerusalem haeo iŋuc hâcne epo, ehuc taha bapa micne jaŋerao mupe pasi narepie opâ ruac wemo afecne kâpâcwâru ficne ficne râec‐jopahuc jupo. Erâ ʒika kirâ hâmoniŋte mujarepie dâŋjeŋic dopecke jupac wâc.
11Judaŋic jaŋere mitificne ficne opâ ruac jopahuc jaŋe Jesure ʒâŋe musoriŋkeniŋte wiac qacne gâpâcne ejare jupac. Erâ no momori wânʒâŋ erâ hae ʒoricko ra jopa jâpec ejare jupac wâc.
12“Ekupe taha bapa micne jaŋe papia narehuc munarepie Damasko haeo rapemurâ rapo.
13Rakuhape qâqâtâc bembeŋkeha sambâŋkonec ʒoc tatamac bâricnehuc waha no â ŋicfâc‐nane âke tamaec‐nâpowec. Opoŋ, ŋicwofuŋ‐nane, ʒoaŋ tatamacne i weweaŋne, â honepo tatamac izi hâhâwicne jâmbâŋ.
14Eme nâŋe mâreŋko rândiŋke qarâ fohuc dâŋ wiwira moc Judadâŋko ʒiŋuc manambeŋ: ‘Saulo, Saulo, go wemocte nu jâpec enarehuc juekic? Go ʒârâ hewâcnetec âkecgume ʒâic manacmu.’
15Eme no ʒiŋuc mupo: ‘Wofuŋ go mo?’ Mupe ʒiŋuc nazawec: ‘Nu jâpec enarehuc jukomec Jesu no hâcne.
16Go fahare domac, no ʒi kiŋaŋ qaqa‐nane bacgupemurâ fua‐garekopac, irec go ʒi wiac honekomec â juku gowatupe honecmu irec biŋe mumu‐nane erâ juzemec.
17No ŋicguru ʒi â ŋic qâpuc jaŋere meonec bataracguhuc jupemu.
18Erâ jaŋerao sorecgupe ʒâŋe‐jeŋic bâtâcnetec dapâc honerâ râpeckerâ tatamac maickenʒepieŋ, erâ wâc Sataŋte gie beherâ Anuture enʒepieŋ. Eme sâqocne‐jeŋic tâmirehame no manasiŋnuhuc ɋaɋackembiŋ jaŋere guruo raʒirâ sambâŋ kâdoc‐jeŋic rauckenʒepieŋ.’
19“Ŋicwofuŋ‐nane Agripa, no sambâŋkonec dâŋ mana rereŋ ehuc
20ine qanaŋ Damasko haeonec ŋic â Jerusalem haeonec ŋic erâ wâc Juda mâreŋ rune sasawa â ŋic qâpuc mâmâc maŋjeŋic bârisierâ Anuturao qohotahuc maŋ bâbârisiere fârine bâfuaniŋte irec miti jazahuc jupo.
21Eme iŋuc epore Judaŋic jaŋe taha ufuŋko rocnurâ qâhâmocnuzo embiŋ.
22Eme Anutu e ŋezicnu warehame miti mupozi muekopac, ehuc ŋic fekicne â wahakicne mâmâc jazaekopac. Erâ dâŋ furune mâcne, porofete â Mose findaŋdâŋ muhuc qâreŋkembiŋ ijaha muekopac.
23Kristo e ʒâic manaku hâmoocte mucnekicne erâ hâmokicne jaŋeraonec micne barâ faharerâ Judaŋic â ŋic qâpuc ʒâziriŋ dâŋ bâfua‐jareocte mucnekicne, dâŋ i hâcne dopeckeekopac.”
24Paulo e fuŋne‐ticne mutiŋnehuc dâŋ iŋuc jazame Festozi dâŋ hahaŋne bahuc muwec, “Paulo go maŋge sifuckekac i! Papia bocjaha wose qâreŋ ekutec maŋge sifuckewec hâcne.”
25Mume Paulozi dâŋ ʒiŋuc bâtikiecnewec: “Ŋicbomboŋ‐nane Festo, no maŋsifuc dâŋ mâcne, no dâŋ tiŋne â fârine mukopac.
26Dâŋ mukopac irec fuŋne ŋicwofuŋzi sâcne manakac, erao hâcne afeckehuc mukopac. Wiac mukopac i soŋsoŋko mi fuawec, irec ŋicwofuŋzi wemocko kâuc baocmu.
27Ŋicwofuŋ Agripa, go porofete jaŋere dâŋ mana ʒakieekic me? No manakopac, go mana ʒakieekic.”
28Mume Agripazi Paulo ʒiŋuc âzâcnewec: “Enarekutec mi ʒoraha Kristoŋic ezipohec ine.”
29Eme Paulozi muwec, “Go â ŋic gâcne miŋecgac dâŋ ʒi mupe manaŋgopieŋ, ŋoŋe Wofuŋzi bafic‐ŋopame mi ʒoraha no iŋucne ejâmbâŋkeniŋte mukopac, kâpâcwâru ŋic jukopac irec mâcne, mitire mukopac.”
30Iŋuc mume ŋicwofuŋ â kia â Beanike â ŋic gâcne faharerâ râwiŋnembiŋ.
31Râwiŋnehuc nazaŋ gazaŋ erâ ʒiŋuc mumbiŋ: “Ŋic e ʒika me kâpâcwâru mi hotâckewec.”
32Â Agripazi Festo ʒiŋuc âzâcnewec: “Ŋic e Roma ŋicwofuŋzi dâŋticne mutaraocte mi mume muzac, go sâcne firuetec ra juzac.”
