1Eme nâŋe jaŋe hetarac‐joparâ fâretiŋ jaha raku Ko nucko fisimbeŋ. Hae fureme Rodo nucko raʒirâ raku Patara haeo fisimbeŋ.
2Ira woke moc Foinike mâreŋko raocte ʒawiehame bâfuarâ ira ferâ rambeŋ.
3Raku Kipiro nuc honerâ qanaopec ŋehame mâc jâurumbeŋ. Erâ Siria mâreŋkopec raku Tiro haeo fisimbeŋ. Ira wokezi mafa hesie‐fârehame
4nâŋe haeo ferâ mitiŋic bâfuac‐joparâ jaŋehec ʒoaŋ 7 jumbeŋ. Eme Mârozi ejareme jaŋe Paulo Jerusalem haeo mi raocte mu hezuc ecnembiŋ.
5Ira juhapene rara dameŋ maickeme ŋic ŋokac naru motec mâmâc sasawa moŋgeŋko jowac‐nâpopie humbeŋ. Erâ moŋgeŋko dieŋzi herâ numumbeŋ.
6Numurâ mâmâzoc erâ wokeo fehapene jaŋe haeo risiembiŋ.
7Eme Tiro haeonec raku Tolemai haeo fisipene wokeo rara i tarawec. Eme ira mitiŋic iqic‐joparâ ŋafe mocjaha jaŋehec fombeŋ.
8Hae fureme raku Kaisarea haeo fisirâ Filipo bâfuambeŋ. Filipo e babafic 7 râec‐jopakicne jaŋere guruonec. Ere ficko hâcne fembeŋ.
9E otâfâcne 4 ʒeŋoŋ jumbiŋ jaŋe findaŋdâŋ mujumbieŋ.
10Eme ira ʒuhuckerâ juhapene Judaia mâreŋkonec porofete moc ʒâŋene Agabo e nâŋerao fâ fisiwec.
11Fisirâ Paulo umbika‐ticne rorâ izi jahacne me kike qarâ muwec, “Tiri Mâro e kecʒiŋuc mukac: ‘Umbika rune e Jerusalem haeo ra fisime Judaŋic jaŋe ʒiŋuc hâcne ecnerâ qâpuc jaŋere meo râeniŋmu.’”
12Dâŋ iŋuc mume nâŋe mecne â hae fâri mecne Paulo Jerusalem haeo mi feocte bâmâckehuc âzâcnembeŋ.
13Âzâcnepene ʒiŋuc muwec: “Wemocte boc kiohuc bu heheric enareŋgopieŋ? No Jerusalem haeo kâpâcwâruo fepere sawa mâcne, Wofuŋ Jesure erâ hâmopere wâc ʒawiekopac.”
14Dâŋ âzâcnepene mi maname beherâ ʒiŋuc mumbeŋ: “Wofuŋte dâŋ sanaŋkezejec.”
15Ʒoaŋ gie bapa gâcne tarame Jerusalem haeo fenaŋte ʒawiembeŋ.
16Eme Kaisarea haeonec mitiŋic gâcne jaŋe jowac‐nâporâ ŋic moc ʒâŋene Ŋasoŋ, e mitiŋic raŋɋane Kipiro nucko fuawec, ere ficko hâcne râec‐nâpombiŋ.
17Eme raku Jerusalem haeo fisipene irecnec mitiŋic jaŋe âgo jauŋ enârembiŋ.
18Eme hae fureme Paulozi Jakobore ficko jowac‐nâpome fembeŋ. Ferâ juhapene mitire micne bapa gâcne fisi‐fârembiŋ.
19Fisipie Paulozi mejeŋicko barâ, Anutuzi neŋgoc ŋesiŋ ŋecnehame qâpuc jaŋerao miti gie bame fârine fuawec, irec dâŋ binaŋ ninic jaha ejarewec.
20Paulozi dâŋ binaŋ ejare tarame Anutu muteŋkerâ Paulo ʒiŋuc âzâcnembiŋ: “Manakic, qomâ‐nâŋec Paulo, Judaŋic tauseŋ guru wemo afecnezi Jesure kikefuŋ embiŋ juŋgopieŋ. Eme jaŋe mâmâc sasawa sâcmutâc dâŋ ʒoɋac erâ dopeckeeŋgopieŋ.
21Ehame gore dâŋ ʒiŋuc wareme manaeŋgopieŋ: ‘Judaŋic qâpuc jaŋere ŋondeŋko juraŋgopieŋ jaŋe Mosere dâŋ qikiŋneniŋte jazaekac, ehuc ɋiefâc‐jeŋic jaŋere sahacko ma mi bajareniŋte muac‐jopaekac, â Judaŋic juju hata‐nâŋec beheniŋte qafeŋ‐jopaekac.’
22Hae ʒirec ŋic jaŋe gore iŋuc manaeŋgopieŋte weniŋuc ezo? Go Jerusalem haeo waremec irec biŋe mana‐fâreniŋmu.
23Irec nâŋe dâŋ moc gazapene ezemec. Nâŋerao ŋic 4 juŋgopieŋ, jaŋe Anuturao mumupaŋ‐jeŋic râembiŋte qizec‐jeŋic mi bâbâtâc mâc jueŋgopieŋ.
24Eme nâŋe jaŋerao ʒuhucgupene jaŋere sâcko wiac ehuc tiwâ bâzi furine bajaretec rikerâ qizec‐jeŋic bâtâcnenʒepieŋ. Go iŋuc etecne honecgurâ gore ʒiŋuc mananiŋmu: Dâŋticne wareme manambeŋ i fârimâc, e sâcmutâc dâŋ reŋkehuc juekac wâc.
25Â qâpuckonec opâ ruac jaŋe nemuɋâŋte taha bâzi, qowisoc, qowi bituakicne â sasec boe sau irec sawa bâec baniŋte mupaŋke‐jarembeŋ.”
26Eme Paulo e dâŋjeŋic manarâ ŋic 4 jaŋerao ʒuhuckeme hae fureme sahac ŋaqi wiac‐jeŋic ʒure emasaŋ erâ taha ufuŋko fembiŋ. Ferâ Paulozi mumupaŋ dameŋ tatarare â bâzi ririkere dâŋ taha bapa jaŋe jazawec.
27Ʒoaŋ gie bapa 7 wiac ehuc juniŋte mumbiŋ i tarazo eha Paulozi taha ufuŋko ferâ juhame Asia mâreŋkonec Judaŋic jaŋe e honerâ ŋic mâmâc sasawa maŋjeŋic bâiŋnembiŋ.
28Ehuc Paulo rorâ kuku qajarehuc mumbiŋ, “Oe, Israe ŋicbureŋ, ware bafic‐nâponiŋ! Ŋic ʒizi mâreŋ sâc jurahuc Judaŋic nâŋâc râsi enârehuc sâcmutâc dâŋnâŋec â ufuŋ‐nâŋec ʒi mu qâsuac ehuc juekac. Erâ wâc ufuŋ‐nâŋecko Grikŋic jowac‐jopame wefuhuc furufic ʒi gâc hecneŋgopieŋ.”
29Paulo e Efeso haeonec ŋic Trofimo ehec haeo rac warec eme honerâ mana sifuckehuc mumbiŋ, taha ufuŋko jowa wefujec.
30Paulo e iŋuc ecnepie haeŋic mâmâc sasawa kike saoŋ qajareme ɋuruŋ herâ qâture‐fârembiŋ. Ehuc ŋic gâcnezi Paulo rorâ ufuŋkonec fâre wahambiŋ. Fâre wahapie izia motâc hembiŋ.
31Ŋic jaŋe Paulo rorâ qâhâmozo ehapie biŋe Roma momori jaŋere soŋaŋ sâkorao rame ʒiŋuc manawec: “Jerusalem ŋic jaŋe mâmâc sasawa râsi roroc eŋgopieŋ.”
32Dâŋ iŋuc manarâ izia momori fekicne wahakicne rocjopame ɋuruŋ ɋuruŋ rambiŋ. Eme ŋic jaŋe Paulo qahuc juhapie soŋaŋ sâko â momorifâc‐ticne fisipie honec‐joparâ behembiŋ.
33Eme momori soŋaŋ sâkozi fisirâ Paulo jowac rorâ mume kâpâcwâru jajaheczi bândeŋnembiŋ. Erâ Paulo ʒâŋe‐ticnere â wemo wiac ewec irec iindiŋ gie bawec.
34Eme ŋic jaŋe owage owa‐nane epie qâsifuo dâŋ fuŋne sâcne mi mana‐hâmohuc mume momori jaŋe Paulo ficjeŋicko barambiŋ.
35Eme Paulo e ririo fezo eme ŋic jaŋe orâŋkerâ bâbâzickepie momori jaŋe Paulo hâporâ reŋke fembiŋ.
36Ŋic guru sâko jaŋe bâjâpec‐jopahuc owac owacke rahuc ʒiŋuc mumbiŋ: “Ŋic e arictac eoc!”
37Eme Paulo ficmaŋko bafezo ehapie momori soŋaŋ sâko wiocnerâ muwec, “Manatec dâŋ moc gazape?” Mume soŋaŋzi muwec, “Go Grikdâŋ manaekic?
38Mârâcko Aigita ŋic moczi ʒika bâfuaocte râsi 4 tauseŋ rocjopame mâreŋ tuhuo rambiŋ, go ŋic e me moc?”
39Wiocneme Paulozi ʒiŋuc âzâcnewec: “No Judaŋic, erâ Kilikia mâreŋko Taso hae sâko ŋekac irec rune. Go mana‐naretec ŋic dâŋ piticne jazape.”
40Eme manacneme Paulo e riri botâŋko domahuc ŋic me bazuc ejareme dâŋemâc efârepie Judaŋic jaŋacne dâŋkoa kecʒiŋuc jazawec:
