Acts 24:15-26

¹⁵Tau God awarina a vitumaḡana guratana me ravai nanare, da tauna muriai rava anatapui iraḡelei ina vilawana-melei, ravai aiaii ma rava apoapoei.

¹⁶Lamna aubaina a kaukauana guratei da orau ina ai rava ma Bada awarii.

¹⁷Jerusalem a netawanei madeḡa biaḡa i kwa ma pom ota a nememei da molamolakai ata puloi ma pulo ata kauei God awarina.

¹⁸Tau aiaiu, maranaina i nelaḡaiu au Tempol viaina pulona a kaukauei. Eḡa patara maiteni ma eḡa visinaviravira.

¹⁹Wate mai Jew ḡelaui Eisia provinsei i nei kampa. Taui mepa marina! Ita nei au naom da ai viwavu ita terei.

²⁰Bo babada weka ita riweta au apoapoe aiwai maranai boru ḡeḡetelarana au naona a mairi.

²¹Wate mepa da maratagogi awarii a garara a pa, “A vitumaḡana da God rava anatapui iraḡelei ina vovaimairini! Lamna aubaina tau weka a maimairi.”

²²Felix tauna Bada Iesu ana Etanai riwana i aramana-kauei, boru i gudui ma i riwa, “Maranai sorodia ai bada Claudius Lisias ina nei, ma ina paribelem.”

²³Ma sorodia ai bada i egari da Paul ita inana-vaitetei ma ita voterei da ita bababara ma ana rava ita nei da ita raraugenari.

²⁴Aupom biaḡa au murina Felix awana Drusila maiteni i nei. Drusila lamna wavine Jew ei. Ma riwa i paritawanei da Paul i neiai, ma rava ai tumaḡana Iesu Keriso awarina i babaniei ma Felix i rautaniḡana.

²⁵Wate maranai Paul babani i vikarei da God ana ḡoana, da rava lawana aiaina ma jijimanina ina maeni, ma erawa kauai ma ḡoʼapoapoe ina geduaiei, aubaina mara e nenei maranai rava anatapui ina etarei. Felix wei babanina i nonori tauna i rovo ma Paul i riwei, “Ma nae! Ma maranai ana ḡoem lamna ana kwatuem.”

²⁶Ma Felix i ḡoeḡoei da Paul tauna manelei ita gwalai ma lamna aubaina mara i maḡa i raukwatuei ma awarina i babani.