Aposel 24:15-26

¹⁵Anung a nurnur un o God i elar nama taro ri. Iau kai a kis langlang nama nurnur lena o God in ukatutur melet pas a wakak na taro ma a laulau na taro gusun a minat.

¹⁶Lenkutkai ra, a dekdek doko sur anung a nilaun in tokodos umatan o God, ma umatan a taro kai.

¹⁷“A kabano kilalo, a kis gisen gusun o Jerusalem, ra numur a milet melet usapat sur an los tar a mani na etabor torom anung a taro ra det sibo, ma sur an pitari kai a kum wewegua sur din tun det elar nama etabor torom o God.

¹⁸Numugu ra ka ruk utmakai ubalan in noworo ina rumu na etabor, a sa pam rop tar a kum warkurai sur an talapor umatan o God. Ra a ruk sur an pam a pinapam na etabor, ka det pastorom iau nam lako susut na taro, ma ka pam tu purpuruon kai.

¹⁹Ikut a ramano taro Juda tagitong una papor Asia, det kis una rumu na etabor una bung ra di pam ukai pas iau. Ra tu utna din takun iau nami, in wakak sur det ut det in nan urin ma det in takun iau umatam.

²⁰Ma i wakak sur det ra kuri det, det in watung tu sakino ra det sa sio pasi un iau, ra a tur umatan a taro na kiwung sapat o Jerusalem.

²¹Kutiro, det takun iau una nung ara wasiso kut. Ra a tur umatandet, a kakabo lena, ‘A tur una warkurai umatamot uniri, uni a nurnur una nilaun melet gusun a minat.’”

²²O Peliks i talapor wakak ut una lotu ri di watungi nama Kisapi anun o Karisito, ra i umana tar a warkurai munung, ma i watungi lena, “Ra o Lisias, a labino mugumugu anun a taro na inaim in nanpat, an ubeki maragom a warkurai una etakun ri.”

²³Ra i inanos a mugumugu anun a kum tene inaim lena, “O Pol in kis na karabus una num a warkurai. Un tamtamabati nama marmaris, ma gong u turbat a kum paspasano sur det in waruti.”

²⁴A kabano bung bat tari, o Peliks i wanpat melet, der nama nun a ino o Darusila, a ino Juda. O Peliks i itula sur o Pol, ra i longoro anun a wasiso una nurnur un o Karisito Iesu.

²⁵O Pol i wasiso una tokodos na petutna, ma una petutna ra taio in tamtamabat wakak anun a nilaun, ma una bung na warkurai kai anun o God ra numur in nanpat, ra o Peliks i ngara, ra i watungi lena, “Pol, un nan munung. Un tu bung ra an langolango, an itula melet sur ui.”

²⁶Ra i ititula liklik suri, ra der ser wasiso tomo, uni i nemi utkai lena o Pol in ukodosi nam tu mani, sur in palos ru i.