1Eme ŋic moc juwec ʒâŋene Anania, e ŋonâŋ‐ticne Safira ehec muc manac ehuc hae mâreŋ‐ticne qikiŋneme moneŋ fua‐jacteme
2mamanac erâ tucne hefackepire fojactewec â tucne sawa ŋiczi aposolo jaŋerao râewec.
3Râeme Petorozi ʒiŋuc âzâcnewec: “Anania, go wemocte Sataŋzi maŋge bâsifuckeme Tiri Mâro eatuckehuc hae mâreŋgere furi tucne hefackekomec?
4Hae mâreŋge fogarezo murâ fogarezac, me qikiŋnerâ furine moneŋ rorâ izi iŋuc me iŋuc ezo murâ enʒaŋ. Go weniŋuc erâ maŋgezi surucgume iŋuc emec? Go ŋic nâŋe mâcne, go Anutu eatuckekomec.”
5Iŋuc mume Anania e dâŋ mana manahuc rândiŋke qarâ hâmowec. Eme hone manac embiŋ jaŋe hâhâwic sâko fua‐jarewec.
6Eme ŋicmotec domambiŋ jaŋe qâŋɋâŋ‐ticne qoruczi râpâckerâ bara duckembiŋ.
7Eme aua 3 tarame ŋonâŋ‐ticne biŋe mi mamana, mâc fokac muhuc fisiwec.
8Fisime Petorozi ʒiŋuc wiocnewec: “Hae mâreŋte furine ine mac hâcne warejec?” Eme eki muwec, “Ine mac sawa hâcne.”
9Mume Petorozi ʒiŋuc âzâcnewec: “Ŋohe wemocte Wofuŋte Mâro eatuckenicte mamanac epirec? Manakic, ŋowege duckembieŋ motâc râpeo domaŋgopieŋ, jaŋe go iŋuc jaha bacgu ra ducguniŋmu.”
10Iŋuc mume izia kikefuŋnao rândiŋke ɋarâ hâmowec. Eme ŋicmotec jaŋe ficmaŋko ferâ qâŋɋâŋ‐ticne honerâ bara ŋowe‐ticne duckembiŋko ijaha duckembiŋ.
11Eme opâ ruac guru â ŋic gâcne biŋe‐jekic manambiŋ jaŋerao hâhâwic sâko fuawec.
12Aposolo jaŋe mâsi fuŋne fuŋne bocjaha ŋic jaŋerao bambiŋ. Eme Jesure kikefuŋ jaŋe taha ufuŋ maŋne moc ʒâŋene Salomo ira maŋ mocjaha erâ tumaŋne jumbieŋ.
13Tumaŋnehapie ŋic gâcnezi araŋ bajarehuc enʒaŋauc kosa mi ejare jumbieŋ. Jaŋe opâ ruac jaŋere manapie bipinehec ewec.
14Erâ ŋic â ŋokac gurune gurune miti mana ʒakiehuc Wofuŋtao ʒuhucke jumbieŋ.
15Erâ wâc âgofâc‐jeŋic huc ʒâichec hatao fofo â kanʒe faio kecʒiŋuc muhuc râec‐jopambiŋ: Petorozi rac warec eme nâkumuc‐ticnezi foninipec‐jopazejec.
16Erâ Jerusalem hae rârec rârec ŋic jurambiŋ jaŋe orâŋ bârâŋ fisihuc jumbiŋ. Ehuc huchec â demoŋhecfâc‐jeŋic mâmâc amec‐jopa fisipie biaŋke‐fârembiŋ.
17Eme wiac iŋucne fuame taha bapa sâko e â qaŋeŋfâc‐ticne, sadukaio ŋic hâcne, jaŋe maŋzi ruc bahuc
18aposolo mana sâqore‐jarerâ rocjoparâ kâpâcwâru fic sâkoo râec‐jopambiŋ.
19Eme ira fohapie ŋafeo Wofuŋte aŋelozi motâc rojarerâ jowac‐jopa hurâ ʒiŋuc jazawec:
20“Ŋoŋe taha ufuŋko ferâ ŋic sasawa juju hata kecʒirec biŋedâŋ jazahuc domanʒepieŋ.”
21Iŋuc jazame jaŋe manarâ furicte taha ufuŋko ferâ miti mumbiŋ. Ehame taha bapa sâko e â qaŋeŋfâcne jaŋe qâturerâ ŋic fekicne â Israe ŋic micne guru‐jeŋic hefârec‐jopapie furu fisimbiŋ. Erâ polisman jaŋe kâpâcwâru ficko ra aposolo rocjopapie fisiniŋte mumbiŋ.
22Eme polisman jaŋe ra kâpâcwâru ficko basac‐joparâ risierâ mumbiŋ,
23“Nâŋe ra fisirâ motâc kine sanaŋne bakicne honembeneŋ, erâ soŋaŋ jaŋe motâcko domambieŋ wâc. Erâ motâc rorâ ferâ ŋic ine basac‐jopambeneŋ.”
24Dâŋ i mupie ufuŋte polisman micne â taha bapa micne jaŋe manapie quŋkewec.
25Ehapie ŋic moczi fisirâ muwec, “Manaŋgopieŋ, kâpâcwâru ficko râec‐jopambieŋ jaŋe ufuŋko ŋic miti jazahuc domaŋgopieŋ.”
26Mume polisman micne eki soŋaŋfâcne rocjopame ra aposolo urucko jowac‐jopa warembiŋ. Ŋic jaŋe qânâzi hecjopanʒipiŋte hâwic‐jopame wânʒâŋnehec ʒame kirac mi ejarembiŋ.
27Eme micne bapa tutumaŋko râec‐jopapie domahapie taha bapa sâkozi dâŋ ʒiŋuc jazawec:
28“Nâŋe ŋic hâcne ʒâŋe biŋe‐ticne mi mupie haŋ baocte mic muac mi eŋarembeŋ me? Eme ŋoŋe sifu dâŋ i Jerusalem haeo mocwâc muiŋneŋgopieŋ, ehuc ŋic hâcne ere kiŋ nâŋere faio râezo muŋgopieŋ.”
29Mume Petoro â aposolo gâcne jaŋe dâŋ ʒiŋuc bâtikiecnembiŋ: “Ŋicdâŋ reŋkehuc Anuture dâŋ qiqikiŋ i mi fokac.
30Ŋoŋe Jesu maripoŋko qarâ qâhâmopie mimiŋnefâc‐nâŋec jaŋere Anutuzi bâɋâreme faharewec.
31Fahareme Anutuzi e jahacne mefâreo râerâ micne sâko â bâbâpiaŋ‐nâŋec âkendâŋnewec. Eme ʒi Israe ŋic ŋoŋe maŋŋeŋic bârisiepie sâqocne‐ŋeŋic ʒureocte muekac.
32Eme irec biŋe hâcne Tiri Mâro â nâŋe mueŋgopeneŋ. Tiri Mâro e Anutuzi micrereŋfâc‐ticne jareekac.”
33Dâŋ iŋuc jazame bujeŋic henʒaŋneme mana hâtâwerâ aposolo jopaniŋte mumbiŋ.
34Eme tutumaŋ‐jeŋicko farisaio ŋic moc ŋewec, ʒâŋene Gamalie, e sâcmutâc dâŋ qaqazu‐jeŋic fekicne. Eki hâcne mume aposolo jaŋe hae ʒoŋao hurâ juhapie
35micne bapa âgofâcne ʒiŋuc jazawec: “Israe ŋicbureŋ, ŋoŋe ŋic i wiac mana wosâehuc ejarenʒepieŋ.
36Mârâc ŋic moc ʒâŋene Teuda eki, no ŋicbomboŋ micne‐ŋeŋic, iŋuc mume ŋic 400 erao qohotambiŋ. Eme e jahacne ʒika kime ŋicfâc‐ticne tâtiepie gie‐jeŋic omatac fuawec.
37Erâ ʒâhec Galilaia mâreŋko ŋic moc ʒâŋene Juda, e wose qâreŋ enârembiŋ dameŋ ira ŋic gâcne qafeŋ‐jopame bâjâpembiŋ. Eme e jahacne qahuc ŋicfâc‐ticne jopa qâtâtiec ejarembiŋ.
38Irec ʒi dâŋ ŋazape mananiŋ: Ŋoŋe ŋic ʒi behec‐jopapie juniŋ. Jaŋe dâŋ â gie i maŋjeŋicte mu bac eeŋgopieŋko sifuckerâ arictac eocmu.
39Me Anutuzi neŋgoc ŋesiŋ ejarehame mu bac eeŋgopieŋko bâipiec‐jopaniŋmu. Ŋoŋe gie‐jeŋic ima bahuc Anutu e jahacne râsi ecnenʒipiŋkohec.”
40Iŋuc jazame jaŋe manapie sâckeme aposolo ejarepie tutumaŋko fepie kâcbiŋzi jopambiŋ. Joparâ ŋic Jesure ʒâŋe biŋe mi jazaniŋte muac‐joparâ sorec‐jopambiŋ.
41Sorec‐jopapie Wofuŋ e jaŋere maname sâckeha ʒâŋe‐ticnere erâ ʒika kimbiŋte bubiaŋ manahuc ŋic tutumaŋkonec waharâ rambiŋ.
42Erâ ʒoaŋne ʒoaŋne taha ufuŋko â ŋicficko Jesu Kristo ere Biŋebiaŋ jaza qazuc erâ mi behembiŋ.
