1Dameŋ ira opâ ruac guru sâko embiŋte nânâ bârâwiŋne‐jarehuc Grik opâ ruac jaŋere hozec bâtiric‐jopapie Juda opâ ruac jaŋere manapie mi sâckeme dâŋ bâfuambiŋ.
2Iŋuc epie aposolo 12 jaŋe opâ ruac hetumaŋ‐jopa‐fârerâ ʒiŋuc jazambiŋ: “Nâŋe sahackopec gie i dopeckehuc Anuture dâŋ mumu irec gie behepene wahame mi sâckeocmu.
3Irec ŋic âgofâc, ŋoŋe ŋic 7 ŋaŋacne ŋondeŋko Mâro â mamanahec jupie honec‐jopapie sâckeme rowosâec‐jopanʒepieŋ. Eme nâŋe gie i mujarepene banʒepieŋ.
4Nâŋe ine nunumu â miti mumu irec gie paŋʒâic jaha banʒepeneŋ.”
5Dâŋ iŋuc mupie opâ ruac jaŋe manapie sâcke‐fârewec. Ehuc ŋic ʒiŋuc bâwosâec‐jopambiŋ: Stefano, e maŋnao mamanasiŋ â Tiri Mâro fufusuc fowec, erâ Filipo â Porokoro â Nikano â Timoŋ â Pamena â Nikolao, e Antiokia haeonec ŋic qâpuczi Judaŋic jaŋerao ʒuhuckewec.
6Eme ŋic i hâcne jaŋe aposolo jaŋere maŋfuŋko birickerâ domapie mejeŋic qizec‐jeŋicko râehuc numu jambuŋ ejarembiŋ.
7Eme Anuture dâŋzi haŋ bahuc fome Jesure kikefuŋ jaŋerao denaŋne denaŋne ʒuhuckeme ʒuhuc erambiŋ. Erâ taha bapa jaŋeraonec wâc bocjahazi miti mana rereŋ embiŋ.
8Stefano e miti â tâpiri bocjaha focnewecte ŋic jaŋerao mâsi fuŋne fuŋne bawec.
9Eme Hotâonec mujarembiŋ ŋic i jaŋere mitificko tumaŋne jumbieŋ, jaŋeraonec ŋic gâcne â Kirene ŋic â Alesandria ŋic â Kilikia ŋic â Asia ŋic, iŋuczi qâturerâ Stefano mu qatarac ecnembiŋ.
10Eme e dâŋ mana utuckehuc Mârohec mume jaŋere dâŋzi firorieme eipiecnembiŋ.
11Eipierâ ŋic qafeŋ‐jopapie jaŋe Stefanore ʒiŋuc mumbiŋ: “Ŋic e Mose â Anutu musoriŋ‐jofame manambeŋ.”
12Iŋuc ehuc ŋic omane â soŋaŋ â miti qaqazu mu âke ɋâfoŋ ejarembiŋ. Erâ Stefano somâckerâ hâporâ micne guru tutumaŋko barambiŋ.
13Ehuc dâŋ qanaŋ bâmockerâ âgofâc‐jeŋic jarepie bajumbiŋ jaŋe ejarepie Stefanore burec ehuc ʒiŋuc mumbiŋ: “Ŋic e tiri ufuŋ â sâcmutâc dâŋnâŋec surehuc juekac.
14Nâŋe kecʒiŋuc mume manambeŋ: ‘Jesu Nazarete haeonec eki hâcne ufuŋ ʒi ima qahuc sâcmutâc dâŋ Mosezi mufua‐nârewec i hetâtieocmu.’”
15Eme tutumaŋko ŋembiŋ ŋic i jaŋe Stefanorao firâ râqârehuc ʒâŋe maine honepie aŋelo hawari tinac ewec.
