1“Âgofâc‐nane â kâcɋenefâc‐nane, no nahacne fuŋne ŋazape mananiŋ.”
2Paulo e iŋuc muhuc Judaŋic jaŋacne dâŋko dâŋeme manarâ qiriŋ niniŋ jâmbâŋ efârembiŋ.
3Eme ʒuhuckerâ jazawec: “No Judaŋic, Kilikia mâreŋko Taso haeo fuapo. Erâ hae ʒira mamana ficko juku sokapo. Qaqazu Gamalie ere maŋfuŋko juhape miti qazu‐nareme kâcɋenefâc‐nâŋec jaŋere dâŋ aimuŋ anonocke‐fârepo. Ehuc ŋoŋe miŋecgac eeŋgopieŋ noni iŋuc jaha Anuture erâ hume kikiŋ faio juhuc sasanaŋ epo.
4Ehuc miti ɋâricne ʒi omaeocte no râsi ecnehuc ŋic mecne ŋokac mecne mâmâc jaha niŋgiŋ‐joparâ kâpâcwâru ficko râec‐jopahuc jupo.
5Taha bapa sâko â micne bapa guru jaŋe nore fuŋne manaeŋgopieŋ. Jaŋe hâcne âgofâc‐nâŋec Damasko haeo jueŋgopieŋ jaŋere papia qâreŋkerâ narepie kecʒiŋuc muhuc barapo: No ocna ŋic ŋokac iŋucne bâfuac‐joparâ niŋgiŋ‐joparâ Jerusalem haeo bacjopa warepe okacne jarenʒepieŋ.
6Iŋuc muhuc hata raku ʒoaŋ ʒâʒâŋiŋko Damasko hae bâqiŋkehape sambâŋkonec ʒoc tatamac sâkozi uŋ herâ waha âkecnuwec.
7Âkecnuhuc herândiŋnume mâreŋko fohuc dâŋ wiwira kecʒiŋuc manapo: ‘Saulo, Saulo, go wemocte nu jâpec enarehuc jukomec?’
8Eme noni mupo, ‘Wofuŋ go mo?’ Mupe ʒiŋuc nazawec: ‘Nu jâpec enareekic Jesu Nazarete haeonec no hâcne.’
9Ŋic nohec jumbiŋ jaŋe ʒoc tatamac sawa honembiŋ, dâŋ nazawec ine mi manambiŋ.
10Eme no wiohuc mupo, ‘Wofuŋ, no wemo epemurâ munarekomec?’ Mupe Wofuŋzi ʒiŋuc nazawec: ‘Go faharerâ Damasko haeo ratec wiac ecmurâ mugarekicne i gazaniŋmu.’
11Eme ʒoc tatamaczi ʒâŋe‐nane âke hâpowecte fipe dapâc eme ŋicfâc‐nane jaŋe menaneo rorâ Damasko haeo bacnu rambiŋ.
12“Hae ira ŋic moc juwec ʒâŋene Anania, e sâcmutâc dâŋ aimuŋ bâninipehuc jume Judaŋic hae ijaha jumbiŋ jaŋe ʒeŋgoma ere manapie biaŋkewec.
13Ŋic izi hâcne norao fâ fisirâ ʒiŋuc nazawec: ‘Qomâ‐nane Saulo, go ʒâŋe fitâcnec.’ Mume izia fitâcnerâ e honepo.
14Eme dâŋ ʒiŋuc nazawec: ‘Mimiŋnefâc‐nâŋec jaŋere Anutu eki fuŋne‐ticne gaza gowatuc eme tiŋne rune honehuc micticnaonec dâŋ manacmurâ rowosâecguwec.
15Eme go wiac hone manac emeŋ irec biŋe mâreŋ sâc ŋic jaza razemec.
16Eme ʒi weniŋuc mâc jutec ʒoraocmu? Go faharerâ Jesure ʒâŋe riwasecketec Miti Opâ rua‐garepe sâqocnege tâmirezejec.’
17“Eme no Jerusalem haeo risierâ taha ufuŋko ferâ numupe maŋnane ŋerisieme Jesu honepo.
18Honepe ʒiŋuc nazawec: ‘Hae ʒirec ŋic jaŋe gore mickonec dâŋnane manarâ qikiŋneniŋmu, irec go picpac Jerusalem‐konec wiserâ rac.’
19Mume no dâŋ ʒiŋuc bâtikiecnepo: ‘Wofuŋ, no ŋicfâcge kâpâcwâru bacjoparâ mitificne ficne bacjopa ferâ kâcbiŋzi jopahuc jupo,
20erâ biŋe mumuge Stefano qaniŋte ŋaqi‐jeŋic guruckepie soŋaŋke‐jarehape qapie manape sâckewec, i hae ʒirec ŋic mana‐fâreŋgopieŋte gore biŋe sâcne jazapemu.’
21Iŋuc mupe Wofuŋzi ʒiŋuc nazawec: ‘Go ʒawietec no mâreŋ wiwicko qâpuc jaŋerao sorecgupe razemec.’”
22Ŋic jaŋe hazec‐jeŋic râehapie Paulozi dâŋ gâcne jazawec. Izi miŋecne dâŋ iŋuc mume ɋeŋɋeŋnea owa ruruckerâ mumbiŋ, “Ŋic iŋucnezi arictac eoc, jume mamakâcne ekac.”
23Iŋuc owackehuc ŋaqi‐jeŋic ʒoricne hetararâ rufe tiepie feme
24soŋaŋ sâkozi mume momori jaŋe Paulo ficjeŋicko bafembiŋ. Erâ ŋic jaŋe wemo wiacte boc owackecnembieŋ irec fuŋne mufuame manazore kâcbiŋzi qaniŋte mujarewec.
25Eme jaŋe kâcbiŋzi qaniŋte fâretiŋkerâ becsahaczi bândeŋnezo epie Paulozi micne‐jeŋic ʒiŋuc muhuc wiocnewec: “Ŋoŋe Romaŋic fârine dâŋticne mi mutarahuc kâcbiŋzi qapie sâckeocmu me?”
26Iŋuc mume micne‐jeŋiczi soŋaŋ sâkorao rarâ âzâcnerâ muwec, “Weniŋuc ezo? Ŋic e Romaŋic fârine.”
27Mume soŋaŋ sâkozi Paulorao rarâ wiocnerâ muwec, “Go muc, go jâmbomac Romaŋic fârine?” Eme Paulozi muwec, “I jâmbomac.”
28Mume soŋaŋ sâkozi ʒiŋuc muwec: “No ŋic jabanezi moneŋ bocjaha rope kitâcnume Romaŋic jâmbâŋ epo.” Eme Paulozi muwec, “No ine fufua‐nane Romaŋic fuapo.”
29Eme izia Paulo wiac ecnezo mumbiŋ i behembiŋ. Momori soŋaŋ e ine, Paulo e Romaŋic, iŋuc manarâ, no wemocte ŋic iŋucne kâpâcwâru bapac muhuc fâfârewec.
30Hae fureme momori soŋaŋ sâko e Judaŋic jaŋe Paulo wemo wiacte mana sâqorecnembiŋ irec fuŋne jâmbâŋ manaocte taha bapa micne â micne guru furu jaha ejareme tumaŋnembiŋ. Ehame Paulo jowa hurâ tutumaŋ‐jeŋicko râewec.
