Acts 24:15-26

¹⁵Ma ta’reb rogon e l’agan’ ni gu be tay ngak Got ko l’agan’ ni be tay e pi cha’ney ngak, ni aram e be l’agan’mad ngak Got ni bayi faseg urngin e girdi’ ko yam’, ni tin ni bfel’ nge tin nib kireb.

¹⁶Ere gu ma guy rogon ni gubin ngiyal’ ni ngu’ug par u p’eowchen Got nge girdi’ ndariy ban’en ni be magawonnag lanin’ug u puluwog.

¹⁷“Nga tomuren in e duw ni ug milekag i yan nda gu moy u Jerusalem, mu gu sul nga Jerusalem ni kug fek bogi salpiy ni nggu pi’ ngak e girdi’ ko nam rog ni girdi’en Kristus mu gu pi’ bogi maligach.

¹⁸Ere nap’an ni gu be rin’ e ren’ey miyad pir’egeg u lan e Tempel ni aram e kug mu’ i ngongliy bangbengen e be’ech nigey ni yima tay ni bod nike yog e Motochiyel. Ma da immoy e girdi’ ni pire’ rog u rom, ma danir wagey.

¹⁹Machane immoy boch piyu Israel u rom nrabad ko nug nu Asia; ni ere yad e susun e ngarbad nga p’eowchem ngrogned ngom e tin yad be leamnag nib togopluw ngog, ni fa’anra ba’ ban’en u wun’rad nib togopluw ngog.

²⁰Ara mog ngak e pi cha’ney ngrogned ko mang e n’en nra pir’eged ni ir e kug bucheg ko ngiyal’ ni ba’aram ni gu wan gu sak’iy nga p’eowchen fare ulung rorad —

²¹kemus nta’a ban’en e gog ko ngiyal’ ni ba’aram ni gu sak’iy riy u p’eowcherad ni lungug: ‘Daba’ e kam pufthin niged gag ni bochan e bmich u wun’ug ni pi’in karm’ad e yira fasegrad ko yam’.’”

²²Me Felix ni be’ nri manang murung’agen e re Kanawo’ nem, e yog ni ngan taleg e welthin. Me ga’ar ngorad, “Bayi taw Lysias ni pilungen e salthaw mu gu turguy e n’en ni ngan rin’ ko re pa’ i n’ey.”

²³Me yog ngak e cha’ ni ba’aram ni reb e tolang ko salthaw, ni ir e ke milfan Paul ngak ni ngu’un matanagiy Paul, machane ngu’un pag e pi tafager rok ngu’urbad ra pi’ed ngak e tin nge yag ngak.

²⁴Me in e rran nga tomuren me yib Felix ni yow e bpin rok ni Drusilla, ni be’ u Israel. Me l’oeg e thin ni nge yib Paul ngak me motoyil ngak Paul ni be weliy murung’agen rogon ni nge mich Kristus Jesus u wun’uy.

²⁵Machane nap’an ni ul ul Paul ngay nge weliy murung’agen rogon ni ngan par ni yi ba mat’aw, nge rogon ni ngan t’ar lanin’uy ko tin nde mat’aw, nge murung’agen e Chirofen ni ba’aram ni bayi pufthinnag Got e girdi’ riy, me yib e marus ngak Felix me ga’ar, “Mman e chiney, ma bay puf rogog bangiyal’ mu kugog nga mub.”

²⁶Ma aram rogon ma be finey ni bay pi’ Paul boch e salpiy ngak; ireray fan ni bayi n’en me l’oeg e thin nge yan ngak Paul nge yib ngar nonow.