1Italia mâreŋko ranaŋte dameŋ maickeme kiazi mume Roma momori jaŋere soŋaŋ moc ʒâŋene Julio, eki Paulo â kâpâcwâru ŋic gâcne rocjopame wokeo fembiŋ.
2Woke i Adramiteŋ haeonec, erâ Asia masunao hae biri ŋerawec ira raʒi‐fâreocte mucnekicne. Woke ira hâcne ferâ Makedonia ŋic moc ʒâŋene Aristako, Tesalonike haeonec, ehec mâmâc rambeŋ.
3Hae fureme woke Sidoŋ haeo raʒime Juliozi Paulo âgo ecnehuc manacneme haeo raferâ âgofâcne iqic‐jopame hata nâsiŋ wiac râcnembiŋ:
4Eme mâŋâŋ rambeŋkonec warewecte ine Kipiro nuc â Asia mâreŋ ŋondeŋ‐jekicko rambeŋ.
5Ehuc Kilikia â Pamfilia mâreŋ hecne hecne raku Mira haeo Likia mâreŋko fisimbeŋ.
6Ira Alesandria haeonec woke moc ŋewec. Izi Italia mâreŋko razo ewecte momori soŋaŋzi rocnâpome ira fembeŋ.
7Ferâ uneŋ uneŋ ŋe qatarac raku Kinido hae ŋeweckopec fisimbeŋ. Eme mâŋâŋzi bârisiec‐nâpome hae i râpeckerâ Kreta nuckopec rambeŋ.
8Raku nuc irec masune moc ʒâŋene Salimone i qatararâ Lasaia hae ramicnao hâwec motec moc fowec, ʒâŋene Woke Haebiaŋ, ira neneŋ gie baku raʒimbeŋ.
9Hâwecko dameŋ ʒora rahuc jumbeŋ erâ wâc hoemaŋ biac maickewec, irec Paulozi uŋdâŋ jazarâ muwec,
10“Ŋicbureŋ, ʒi mocwâc ranaŋmu i manape fâsâcne rarane mi ekac, woke herickeme mafa sawa mâcne, ŋic mâmâc hâwecko hunʒipeŋte manabâc erâ mukopac.”
11Iŋuc mume momori soŋaŋ eki Paulore dâŋ mana takirehuc kapiteŋ â woke rune jahere dâŋ manawec.
12Eme hâwec motec honepie wokezi ira hoemaŋko sâcne ŋeŋene mi ewec. Irec Kreta nuc irec hâwec motec moc fowec ʒâŋene Foiniki, ira raʒirâ ŋehapie hoemaŋ taraocte mumbiŋ. Hâwec motec irec masunezi mula â jowarec mâmâc sâoc‐jofawec.
13Eme râpefuŋ‐nâŋeckonec mâŋâŋ burec burec mac qame wokeŋic raniŋte murâ aŋga fârepie wefume Kreta nuc heririŋkerâ rambeŋ.
14Raha rahapene nuckonec mâŋâŋ hâhâwicne ʒâŋene kagu,
15izi qahuc woke qâtuŋkeme bâpieku behepie qâso bâsoriewec.
16Eku nuc piticne moc ʒâŋene Kauda, irec ŋifecnao rahapene woke gombazi hâwecko huzo eme
17gie sâko baku fârepene woke faio fewec. Erâ woke fâuckezacte repazi rowaŋauckehuc bândeŋnembeŋ. Eme haroŋaŋ moc ʒâŋene Siriti, ira fenʒipeŋte rac fârepie wahame mâŋâŋzi qâsoriec‐nâpome rambeŋ.
18Eme mâŋâŋ tâpirinehec qahuc fowecte hae fureme mafa gâcne hâwecko behepie huwec.
19Eme hae mocwâc fureme wokere wâcwiac gâcne iŋuc jaha ropie huwec.
20Ŋafe ʒoaŋ gâcnao mâŋâŋ hâhâwicnehec qahuc domahame ʒoaŋ me bâpiŋ moc mi fuame honerâ maŋ mamanasu‐nâŋec ʒickeme ʒi ine mi junaŋmu mumbeŋ.
21Eme ŋic jaŋe nânâ qikiŋne‐fârerâ juhapie Paulozi ra ŋondeŋ‐jeŋicko domahuc ʒiŋuc jazawec: “Ŋicbureŋ, ŋoŋe dâŋnane manapie muzac, ine Kreta nucko junʒapeŋ. Eme wiac hâhâwicne â mafa sisipiric ine mi fua‐nârezac.
22Ʒi ine sifu hâhâwic qamaseniŋ, ŋiczi mi sipirickenaŋmu, wokezi ine jâmbomac sipirickeocmu.
23Jacne ŋafeo runane Anutu eki kiŋaŋ qaqa‐ticne norao aŋelo moc soreme fua‐narerâ
24ʒiŋuc nazajec: ‘Paulo go mi hâwicguoc, go Roma ŋicwofuŋtao fisi‐jâmbâŋkecmu, erâ manakic, Anutuzi go ŋezicguhuc ŋic gohec wokeo juŋgopieŋ jaŋe mâmâc gore erâ ŋezic‐jopa‐fâreocmu.’
25Irec, âgofâc‐nane, ŋoŋe buŋeŋic biaŋkezejec. No Anuture maŋjahec mi ekopac, dâŋ nazajec i sanaŋkeocmu.
26Wokezi ine nuc mocko ferâ henʒaŋneocmu.”
27Eme Adria hâwecko qac qâsoric ehuc juhapene ŋafe ʒoaŋ 14 eme wokeŋic jaŋe manapie mâreŋ bâqiŋkeŋgopeneŋ tinac ewec.
28Iŋuc manahuc sâc behepie hume 30 meta ewec. Erâ ipec rarâ sâc mocwâc râepie hume 22 meta sawa ewec.
29Eme haroŋaŋko fenʒipeŋ muhuc hâwic‐jopame woke ʒâhecnao aŋga 4 behepie hume hae fureocte hejâpehuc ŋembiŋ.
30Ŋeku wokeŋic jaŋe woke beherâ wiseniŋte manasuhuc woke gomba râepie hume burec ehuc kecʒiŋuc mumbiŋ: “Nâŋe woke masunao aŋga moc behepene huocmu.”
31Iŋuc epie Paulozi momori soŋaŋ â ŋicfâc‐ticne ʒiŋuc jazawec: “Wokeŋic jaŋe wisepie ŋoŋe hâwecko hufâreniŋmu.”
32Jazame momori jaŋe woke gombare niŋgiŋ hetâcnepie gomba hâwecko hume behembiŋ.
33Eme hae fureocte woŋec juhuc Paulozi ŋic mâmâc sasawa ʒiŋuc jazawec: “Ŋoŋe maŋ sahac‐ŋeŋic soka fâkic eme nânâ mi nâhuc mâc juhapie miŋecgac ʒoaŋ 14 ekac.
34Irec ʒi nânâ nâniŋte ŋazape mi qataraniŋ. Nânâ nâqiŋnerâ sâcne tiŋko ferâ juniŋmu. Qizec susuc‐ŋeŋic moc mi waharâ sifuckeocmu.”
35Iŋuc murâ hone‐fârehapie poroŋ moc rorâ Anutu dâŋge âzâcnehuc bazurâ nâwec.
36Nâme honerâ maŋjeŋic firieme iŋuc jaha nâfârembiŋ.
37Ŋic wokeo jumbeŋ ʒare‐nâŋec 276.
38Nânâ nâ gapec erâ wokemaŋkonec padi hâwecko behepie hume woke afeckerâ wefuwec.
39Hae fure‐fâreme mâreŋ ʒâŋitaniŋte hone‐bipiembiŋ. Ehuc hâwec kenʒuŋne moc haroŋaŋ tâmiric honerâ wokezi ira raʒirâ moŋgeŋko feocte
40ŋic jaŋe aŋga niŋgiŋne hetâcnepie hâwecko hume rac fârepie feme guriŋ goroŋkerâ moŋgeŋkopec ma bahuc rambiŋ.
41Guriŋ bâipiehapie woke mâreŋ masunao fewec. Ehuc woke masune kindeŋnerâ sanaŋkehame hâwec siri sâkozi woke ʒâhecne qanʒaŋnewec.
42Woke ʒaŋkeme kâpâcwâru ŋic jaŋe fifia bahuc wisenʒipiŋte momori jaŋe qâhâmoc‐jopazo mumbiŋ.
43Soŋaŋ‐jeŋiczi ine Paulore erâ qatara‐jarewec. Erâ mume fifia bapa jaŋe qanaŋ hâwecko rucnerâ fifia bahuc tiŋko fembiŋ,
44â gâcne jaŋe palaŋ faio â wokere dâkâ faio ferâ rambiŋ. Iŋuczi iŋuc ehuc furu jaha tiŋko fefârembiŋ.
