MII GUN MIINU MO 24:15-26

¹⁵mmota ga ’teŋ kape/ eya Arumgimis mo dhali gwohe si’da/ ki is buni hili ’kup̱ ki yan mo, ki mompinu jin midi di mo gom uni kun mii jasi miiŋḵar/e mo dhali uni si’da/ kun ’koki mii miiŋḵar/e mo be.

¹⁶E mii yansan si’da/ mo tani aha/ pira is pem mo mmota gi isi bwaŋ gana/ mmodiki kol ibwambor ma Arumgimis mo dhali ibwambor gi ’kwani isa yempa/ mo.

¹⁷Dhali ’ko’di yil ka ris mo tani aha/ p̱u’dkina mo mmo’do to kun c̱inu gom ’kwani kun hatha’ko’d e kal pem mo dhali to kun c̱inu ki me’d si’da/ mo.

¹⁸E mii gwansan mo tani uni gamki aha/ mo mmothoson is ki dhelel dhelel e gu’b gi mondheleladhelel mo ki dar ga waambuhany ’kwani mo dhali ki dar gi mo ma dulaṯṯ naskina/ mo. Hili ’Kwani Yahuudan tiya kun ’kon ’peni Pa Asiyya mo

¹⁹kun mini ’taki mii ’ko imahan ibwambori /e mo dhali mmomii mo yan jin yeru is ki gway mo waḵki/ uni ta gi toŋ kamu/ ap̱o/ aha/ mo.

²⁰Walla si’da/ dhalki ’kwani gwansan ki is buni o gwo gom miinthus jana jin gamkina uni mo me’d jin doshka/ ibwambor montul is yan mo,

²¹walla isi kan mo gom ’twan ṯal ’de/ yan jin cuuka/ mo mmodoshi bwaman uni mo ki: Gwo gom mompinu ’peni mowu mo tani aha/ yuḵkunu mo gom gwondoṯ ibwambori /e ka tee yan mo.

²²Hila P̱iliks ki dhal mii e i is mo mmonyiṯẖa a’di ka ji sho’k ki nyanye/ gom Bway yan mo tani a’di si’d uni gwo ’ko’d mo mmo/o gwo mo ki: Ka Lisiyaas jin ta’da mancil ma askar alip̱ midi yayu/ ka ’cesh mo tani aha/ mina mish gwo ki dhegem gom /e mo.

²³Dhali a’di ki c̱i gwoŋḵan eya mancil ma askar iss ’kwanimpa imudhe’d ki a’di minu mii kari mohil mo dhali a’di midi ta gi mo mmoya gi ’kus si’da/ mo dhali minu ’koki non si’da/ ’peni kum pitin tiya mo kun mini iiyu/ i a’di mo.

²⁴Hili ’ko’da tee gwansan tani P̱iliks p̱u’dki’d nyaḵka Durusilla jin ta ashim piti jin ta’da ’Bom Yahuuda/ mo, dhali hashki’da Buulus mo dhali ciḵ gwo ’peni a’di mo gom gwo jin gamu is eya Yesus Ḵrisṯẖos mo.

²⁵Dhali me’dyin ṯorkina a’diya ṯor ka rem ’kup̱ gom mo ma ḵar/e mo dhali mo jin ’timuwa du mo dhali gom gwo miiwaḵ jin midi yayu/ yilaŋ kamu/ mo tani P̱iliks ḵo/ki is mo dhali thoḵki gwo mo ki: Yayi ibway pini shwanetan mo ma dhali ki aha/ mina ta gi embul jin ’boro’d mo tani aha/ mina yuḵ /e i aha/ mo.

²⁶A’di ṯoshki’d si’da/ ka guurush min ma Buulusi ’taki c̱i a’di mo. Gom a’di gi wakan si’da/ mo tani a’di hashki a’di gwo ki ye’th ye’th mo dhali mmobuṯi nyaḵki a’di mo.