Föför 24:15-26

¹⁵Üa pwal apilükülük lon ewe Kot ir ra pwal apilükülük ngeni, pwe aramas meinisin, ekewe chon pwüng me ekewe aramas mi ngau, repwe manausefäl seni mäla.

¹⁶Iei mine üa achocho ngeni fansoun meinisin, pwe esap wor mengiringirin letipei me mwen Kot me aramas.

¹⁷“Mürin ai toau seni Jerusalem ekoch ier, üa liwinto ikei ai üpwe uwato moni fän iten alilisin aramasei kewe chon Juta mi osupwang, üpwe pwal uwato ai asor.

¹⁸Lupwen üa föri iei usun, ra künaei lon ewe Imwenfel, mürin ai awesi ai we angangen alimelim. Esap wor eu mwichen aramas a nom rei, esap pwal wor och fitikoko.

¹⁹Nge ekoch chon Juta seni ewe fanü Asia ra nom ikenan. Püsin ir repwe feito mwomw o pwärätä ar kapasen atutur are mi wor mine ra tongeni atipisiei won.

²⁰Ika ekei mwän mi nom ikei repwe pwärätä met sokun föföringau ra küna rei lupwen üa ütä me mwen ewe mwichen soupwüng,

²¹chilon chök ewe eu mettoch üa kökkö lupwen üa ütä me mwer, ‘Ngang üa küna kapwüng me remi ikenai fän iten üa lükü pwe ekewe sotup repwe manausefäl.’”

²²Mürin Feliks mi sileöchü usun ewe Al a aükätiu ewe kapwüng o üreniir, “Lupwen ewe sounemenemen sounfiu Lisias epwe war, üpwe atowu pwüngün ei kapwüng.”

²³Iwe, a allük ngeni ewe meilapen sounfiu mi tümwünü Paulus, pwe epwe mamasaöchü Paulus, nge epwe ekis angasa o mwüt ngeni chiechian kana ar repwe alisi ngeni met a osupwang ren.

²⁴Mürin ekoch rän Feliks a feito fiti pwülüan we itan Trusilla, i eman fin Juta. A titi Paulus o aüseling ngeni lupwen a afalafal usun ach lükülük lon Kraist Jesus.

²⁵Nge lupwen Paulus a sopwela le kakapas usun pwüng, usun ach sipwe tongeni nemeni püsin inisich, pwal usun ewe ränin kapwüng lon ewe fansoun lesopolan, Feliks a niuokus o apasa, “Kopwe feila iei, ngang üpwe kökkörisefäluk lupwen epwe wor ai fansoun mi fich.”

²⁶Lon ena fansoun Feliks a pwal apilükülükü pwe Paulus epwe ngeni moni, iei popun a soun titi i pwe repwe pworausfengen.