ᤛᤣ᤺ᤰᤕᤢᤰᤔᤡᤒᤠᤜᤠ᤹ 24:15-26

¹⁵ᤀᤡᤱᤃᤠ᤹ ᤂᤢᤏᤡ᤹ ᤜᤧᤰᤁᤣᤀᤣ ᤛᤠᤶᤕᤥᤏᤡᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤛᤠᤱ ᤆᤥᤃᤢᤱᤗᤥ॥

¹⁶ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ᤃ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤋᤃᤡ ᤛᤣᤛᤣ ᤂᤠᤛᤡᤱ ᤁᤵᤔᤠ ᤋᤶᤛᤡᤴ ᤆᤥ᤺ᤰᤁᤠᤖᤥ॥

¹⁷ᤕᤖᤢᤛᤗᤧᤶᤔᤥᤏᤢ ᤗᤠ᤺ᤰᤁᤠᤳ ᤘᤕᤠᤱᤒᤠ ᤕᤖᤡᤰ ᤋᤱᤒᤣ ᤐᤥ᤺ᤰᤂᤧᤀᤠᤱ ᤂᤠᤖᤰ ᤀᤡᤱᤃᤠ᤹ ᤕᤠᤱᤃᤧᤛᤠ᤹ᤒᤠ ᤕᤜᤢᤍᤡᤕᤠᤛ᤻ᤔᤠ ᤀᤠᤔᤏᤠᤜᤠ᤹ ᤀᤣᤴᤋᤡᤀᤥᤰᤗᤠᤶ ᤛᤢᤶᤔᤏᤠᤒᤠ ᤜᤢᤰᤛᤥ ᤕᤠᤱ ᤜᤢ᤹ᤔᤠᤛᤡ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤵᤔᤥ ᤋᤩᤠᤱᤗᤥ॥

¹⁸ᤀᤡᤱᤃᤠ᤹ ᤂᤠᤖᤰ ᤔᤠᤱᤜᤡᤶᤔᤥ ᤛᤣᤛᤣ ᤐᤥ᤺ᤱᤔᤠ ᤌᤡᤶ ᤆᤥᤃᤢᤱ ᤛᤢᤖᤢᤱᤅᤠᤱ ᤘᤕᤠᤱᤅᤡᤸᤗᤧ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤀᤡᤱᤃᤠ᤹ ᤔᤧᤏᤡ᤺ᤛᤠᤱ॥ ᤀᤡᤱᤃᤠ᤹ᤏᤢ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤜᤥ᤺ᤵᤋᤧ. ᤜᤕᤱᤁᤡᤸᤗᤡᤱᤅᤠᤱ ᤜᤥ᤺ᤵᤋᤧ॥

¹⁹ᤁᤖ ᤂᤧᤵᤔᤥ ᤀᤣᤛᤡᤕᤠ ᤋᤧᤱᤃᤵᤗᤠᤶ ᤁᤧᤍᤠ᤺ᤒᤠ ᤁᤢᤓᤠ ᤕᤜᤢᤍᤡᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤀᤠᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤏᤧ ᤑᤠ᤹ᤃᤪ ᤜᤠᤖᤠ᤹ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤀᤠᤵᤋᤡᤰ ᤋᤥ᤺ᤴᤇᤧ ᤔᤧᤍᤠᤖᤖᤥ॥

²⁰ᤔᤧ᤺ᤴᤏᤧ ᤑᤠ᤹ᤃᤪ ᤜᤠᤖᤠ᤹ ᤁᤵᤔᤥ ᤁᤧᤘᤠ᤹ᤒᤠᤜᤠ᤹ᤖᤧᤀᤠᤱ ᤕᤧᤈᤢᤶᤓᤥᤀᤥ ᤏᤠᤱᤛᤡᤱᤛᤧ ᤕᤧᤒᤠᤱᤅᤡᤸᤗᤧ ᤀᤠᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤔᤧᤄᤥ᤺ᤛᤢᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤔᤧᤍᤠᤖᤢᤸᤗᤧ ᤐᤥ᤺ᤱᤗᤥ.

²¹ᤁᤖ ᤀᤡᤱᤃᤠ᤹ᤃ ᤂᤢᤏᤡ᤹ ᤋᤃᤠᤱ ᤀᤰᤂᤣᤗ᤹ᤖᤡᤰᤗᤰ ᤀ᤺ᤰᤋᤠᤱᤗ ᤕᤧᤒᤠᤱᤗᤥ. ‘ᤀᤡᤱᤃᤠ᤹ᤃ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠᤜᤠ᤹ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤀᤡᤴ ᤀᤠᤄᤠᤛᤧᤴ ᤁᤧᤗᤥ᤺ᤴᤍᤡᤖ ᤁᤧᤒᤳᤇᤡᤖᤥ॥’”

²²ᤑᤧᤗᤡᤰᤛᤖᤧ ᤁᤴ ᤕᤧᤛᤢᤖᤧ ᤁᤢᤛᤱ ᤁᤢᤗᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ᤺ᤖᤡᤰᤁᤠᤱ ᤗᤧᤛ᤻ᤛᤢᤀᤠᤱ ᤘᤕᤧᤀᤠᤱ ᤒᤠ ᤂᤧᤴ ᤕᤧᤶᤔᤥᤀᤣ ᤂᤠᤛᤧᤴ ᤗᤥ᤺ᤶᤔᤠᤀᤠᤱ ᤁᤧᤛᤢᤰᤐᤠ ᤆᤥᤃᤧ. ᤁᤖ ᤂᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤆᤢᤶᤗᤢᤱᤅᤡᤴ ᤏᤢᤵᤛᤢ. “ᤀᤠᤸᤗ ᤌᤰᤋᤢᤶᤒᤠ ᤗᤢᤛᤡᤕᤛᤧᤴ ᤕᤢ᤺ᤀᤠᤱ ᤂᤠᤛᤧᤴ ᤗᤥ᤺ᤴᤍᤢᤱ ᤐᤡᤏᤡᤱᤗᤥ॥”

²³ᤜᤧᤰᤁᤩᤠᤱ ᤑᤧᤗᤡᤰᤛᤖᤧ ᤐᤠᤘᤗᤧᤴ ᤁᤥᤔᤠ ᤌᤰᤛᤢᤒᤠᤜᤠ᤹ ᤕᤢᤱᤔᤠᤛᤡ ᤜᤧᤰᤁᤩᤠᤱ ᤘᤠ᤹ᤔᤠ ᤐᤣ᤺ᤰᤔᤠ ᤛᤠ᤹ᤖᤡᤰ ᤛᤠᤰᤔᤠ ᤔᤧ᤺ᤴᤏᤠᤱ ᤁᤢᤴᤈᤢᤶ ᤁᤢᤴᤍᤣ᤺ᤱᤜᤠ᤹ᤖᤧ ᤂᤢᤏᤧ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠᤜᤠ᤹ ᤔᤧᤍᤠᤖᤢ ᤔᤧᤒᤡᤖᤢᤏᤡ ᤑᤠ᤹ᤀᤠᤱ ᤌᤰᤋᤢᤶᤒᤠᤴ ᤀᤡᤱᤈᤠ᤺ᤱ ᤐᤡᤖᤢᤖᤥ॥

²⁴ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤣᤃᤠᤱ ᤑᤧᤗᤡᤰᤛᤧᤴ ᤁᤢᤔᤣ᤺ᤳ ᤍᤪᤢᤛᤡᤸᤗᤠ᤺ᤴᤏᤢ ᤋᤩᤧᤳᤇᤡ॥ ᤍᤪᤢᤛᤡᤸᤗᤠ᤺ᤴ ᤕᤜᤢᤍᤡ ᤘᤕᤧᤖᤥ॥ ᤑᤧᤗᤡᤰᤛᤖᤧ ᤐᤠᤘᤗᤧᤴ ᤀᤢ᤺ᤳᤋᤢᤀᤠᤱ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰᤔᤏᤠᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ᤗᤠᤶ ᤂᤧᤵᤛᤢ॥

²⁵ᤐᤠᤘᤗᤖᤧ ᤋᤠ᤹ᤎᤰᤋᤢᤖ ᤋᤣ᤹ᤖᤢᤸᤗᤧ ᤛᤠᤶᤕᤥᤏᤡᤒᤠ. ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠ ᤏᤢ ᤋᤠ᤺ᤴᤍᤡ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤐᤕᤶ ᤂᤢᤶᤍᤡᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥᤀᤠᤱ ᤐᤥᤎᤰ ᤆᤥᤃᤢᤖᤥ॥ ᤁᤖ ᤑᤧᤗᤡᤰᤛᤧᤴ ᤁᤡ᤺ᤛᤧᤀᤠᤱ ᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤐᤣᤃᤧ᤹. ᤀᤡᤱᤃᤠ᤹ ᤕᤠ᤺ᤴᤍᤡᤰ ᤋᤠᤀᤠᤸᤗᤧ ᤕᤠᤶᤔᤥ ᤀᤢ᤺ᤳᤏᤧᤀᤠᤱ ᤁᤧᤒᤠ᤺ᤴᤏᤡᤴ ᤂᤧᤵᤛᤢᤱᤗᤥ॥”

²⁶ᤂᤢᤏᤧ᤹ᤃ ᤐᤠᤘᤗᤗᤠᤶ ᤛᤢᤖᤢᤳ-ᤕᤠᤱ ᤂᤥ᤺ᤛᤢᤱᤒᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤧᤳᤗᤧᤱ ᤀᤢ᤺ᤳᤋᤢᤖ ᤋᤠ᤹ᤈᤧᤰᤂᤧᤛᤠᤱ ᤐᤠᤘᤗᤖᤧ ᤌᤣᤀᤠᤱ ᤔᤧᤒᤡᤖᤢᤴᤗᤥ॥