Átus 24:15-26

¹⁵Nah iha ke igkisbe ku aysawnemenek ig Uhokri kannikase madikte hiyeg ariw gimiremnikisnek, hiyeg kibeynepwi payebitak akak hiyeg ku pariye kane kibeynepwima.

¹⁶Inneki keh nah battukaw adahan nupithu adahan nuhiyakemni barewbet ariw taraksaki gikak Uhokri gikakkis hiyeg amadgayapu inin.

¹⁷Kibite kamukri kuwis nah ka danuh atere Jerusalém. Ayteke metakwa nah atere. Nah atere adahan ewkne karukri ta gitkis nukebyupwi judeyenepwi madiptapye. Adahan nah kehne ofan ta git Uhokri.

¹⁸Ku samah nah kehnete ini, nah utepka ayge agiku Uhokri Gipin. Nah ka keh mbaykama ayge. Nah kuwis barewpithaw ku samah usuh hiyeg judeyenepwi uhiyakemni. Yuma hiyeg kabubuknama nukakhu. Yuma dakuhwaki.

¹⁹Henneme aynessa judeyenepwi ariwntak Ásiyamnaw ayge. Igkis yuma ay ku apim inin. Ke nuthube amawka igkisnewa danuh atan pit adahan kamiyepun. Ku igkis hiyapun nah kehne mbayka, nikwe amawka igkiswa nukamyehpitni.

²⁰Igkisme nerras hiyeg ku pariye ay ku apim inin igkis ka hiyapun ayge. Inenewa igkis hiyapun ku aysaw nah ayhté gipetunkis ukipara usuh hiyeg judeyenepwi ku samah igkis kehnes gipandukawnikis. Ayánaba gitkis nikwe ku pariye mbayka igkis utí nupithu apim ini.

²¹Pahatwowa mbayka nah keh ayge. Nah tabir ayge nah awna gitkis: “Nah ay ku apim inin adahan yis hiyapun ba nah wadityewatma awaku ku samah nah iha ku hiyeg kannikaw ariw gimiremnikis.” Ininewa mbayka nah keh.

²²Pisenwa inakni kiyapwiye Pol gawnhan ig kiyapwiye Félix awna ta gitkis: ―Uyay mseke akak inakni inetit adahan apim inin. Ig kiyapwiye Félix kuwis timé gak Kiyapwiye Jesus gihiyakemni kaayhsima. Nikwe ig awna gitkis: ―Hawkuwanek nah timap yiwn akiw ku aysaw ig suwtat gikiparakis kiyapwiye Lísyas danuh atan.

²³Ayteke ig awna ta git pahapwi suwtat: ―Apuriwkisnaba kiyapwiye Pol ta git pahapwi suwtat. Ka ba wanakisri. Isaksa gikagmadapu adahan igkis danuhpa git. Isaksigkis adahan igkis hiyak gikak. Pisenwa ig tipik danuhpene ta apitit nawenéwa paytwempu.

²⁴Ayteke ariwnteke ini kibite hawkri akiw ig kiyapwiye Félix diyuh akiw. Ig danuh payak gukak gihayo Drusíla. Egme judeyano. Ig danuh atere, ig iwapkis kiyapwiye Pol ta gimkat. Ayteke nikwe igkis kinetihwa pawtak amin ku samah hiyeg kamaxwa ta gipitit Cristo Jesus.

²⁵Ig kiyapwiye Pol awna git: ―Amawka wis wew wadit giwtrik Uhokri. Amawka wis apuriw uhiyakemni kabayhtiwa. Hiyapnaba. Aysawnemenek ig Uhokri uhiypetniwiynek baki wixwiy kibeynewatma giwtrik. Igme kiyapwiye Félix timapni henne, ig apisasew ig segke. Ig awna: ―Hiyawa pis tipik aterewata parakseket. Ku aysaw nah kahawkannek nah watihpep akiw.

²⁶Ig kiyapwiye Félix gipewkan ku nawenétke kiyapwiye Pol katiwnihgi kahadbe ig isahkiswig. Awaku ini ig watihpig kibereput adahan ig kinetihwa gikak. Igme ka katiwnihgi.