Amosi 1

1

2

3

4

5

6

7

8

9

¹Amosi, Tekowa kaana, xuruse kanna a falan ni i ra. A toon naxan tixi Isirayilaa fe yi alo xiyena Yuda Manga Yusiya nun Isirayila Manga Yerobowan, Yowasi a diin waxatini, ɲɛɛ firin benun bɔxɔn xa xuruxurun.

²A naxa, “Alatala xaɲɛ xuiin naminima Siyon ma alo yatana, a galan xuiin kelima Yerusalɛn yi. Balo mi na xuruseen naxanye donma, Karemele geya yati bata xara.”

³Alatala ito nan falaxi, a naxa, “Damasi a hakɛ saxanna, hanma naanin ma fe ra, n mi xɛtɛma n ma fe ragidixin fɔxɔ ra. Bayo e bata Galadi tɔrɔ ɲaxi ra, alo maala bɔnbɔma kii naxan yi.

⁴Nanara, n Xasayele a banxin ganma nɛn. Tɛɛn fama Ben-Hadada yire makantanxin kaladeni nɛn.

⁵N Damasi taan so dɛɛn balan seene girama nɛn. N Aweni lanban yi kaane halagima nɛn, e nun mangan naxan Beti-Eden yi. Arami yamaan xalima nɛn Kiri yi.” Alatala naxa na kiini.

⁶Alatala ito nan falaxi, a naxa, “Gasa taana hakɛ saxanna, hanma naanin ma fe ra, n mi xɛtɛma n ma fe ragidixin fɔxɔ ra. E bata taana ndee muxune birin xali Edɔn yi konyiyani.

⁷Nanara, n Gasa a yinna ganma nɛn. Tɛɛn fama a yire makantanxin kaladeni nɛn.

⁸N na Asadodi kaane halagima nɛn, e nun mangan naxan Asikalɔn yi. N na Ekirɔn ɲaxankatama nɛn, han Filisiti kaan birin yi faxa.” Marigina Alatala naxa na kiini.

⁹Alatala ito nan falaxi, a naxa, “Tire taana hakɛ saxanna, hanma naanin ma fe ra, n mi xɛtɛma n ma fe ragidixin fɔxɔ ra. E bata taana ndee yamaan birin xali Edɔn yi konyiyani, e layirin kala e nun e ngaxakedenne Isirayila kaane tagi.

¹⁰Nanara, n Tire taan yinna ganma nɛn. Tɛɛn fama a yire makantanxin kaladeni nɛn.”

¹¹Alatala ito nan falaxi, a naxa, “Edɔn kaane hakɛ saxanna, hanma naanin ma fe ra, n mi xɛtɛma n ma fe ragidixin fɔxɔ ra. E bata e ngaxakedenne yɛngɛ silanfanna ra. E mi kininkinin e ma, e e xɔlɔn nadangu ayi!

¹²N Teman ganma nɛn. Tɛɛn nan fama Bosara yire makantanxin kaladeni.”

¹³Alatala ito nan falaxi, a naxa, “Amonine hakɛ saxanna, hanma naanin ma fe ra, n mi xɛtɛma n ma fe ragidixin fɔxɔ ra. E bata Galadi ɲaxalan fudikanne kuine yibɔ silanfanna ra, alogo e xa bɔxɔ gbɛtɛ sɔtɔ.

¹⁴Nanara, n tɛɛn soma nɛn Rabaha yinna ra. Tɛɛn nan fama na yire makantanxin kaladeni yɛngɛ sɔnxɔ sɔnxɔ xuini. Na yɛngɛn luma nɛn alo foye gbeena, alo tule gbeena.

¹⁵E mangan xalima nɛn konyiyani, e nun a kuntigine.” Alatala naxa na kiini.