Amɔsu 1

1

2

3

4

5

6

7

8

9

¹Amɔsu u sɑ̃ɑwɑ yɑ̃ɑ kpɑro Tekoɑɔ. Wiyɑ Yinni Gusunɔ u kɑ ɡɑri kuɑ Isirelibɑn sɔ̃, n kuɑ wɔ̃ɔ yiru tem mu sere yĩirɑ. Sɑɑ ye sɔɔ, Osiɑsiwɑ u bɑndu dii Yudɑɔ, mɑ Yeroboɑmu, Yoɑsin bii u mɑɑ bɑndu dii Isireliɔ.

²Amɔsu u nɛɛ, Yinni Gusunɔn nɔɔ ɡɑ nɔɔrɑmɔ Siɔnin ɡuurɔ Yerusɑlɛmuɔ. Yɑkɑsu mɑɑ sɑri kpɑrɑ yenɔ, mɑ ɡuu te bɑ mɔ̀ Kɑɑmɛli, ten wii kpiirɑ ɡberɑ.

³Nɛ, Yinni Gusunɔ nɑ nɛɛ, Dɑmɑsiɡibun torɑnu nu kpɛ̃ɑ. Yen sɔ̃, nɑ ǹ nɛn himbɑ ɡɔsiɑmɔ. Domi bɑ Gɑlɑdiɡibu tɑɑkɑ bɑ munkɑ.

⁴Tɛ̃, kon de dɔ̃ɔ u nɑ u sinɑ boko Hɑsɑɛlin yɛnu wɔri, kpɑ u Bɛni Hɑdɑdin sinɑ kpɑɑru di mɑm mɑm.

⁵Kon ben wuu Dɑmɑsin ɡbɑ̃rɑrun ɡɑmbobɑ kɔsuku, kpɑ n Bikɑti Afɛnin tɔmbu kpeerɑsiɑ. Kpɑ n Bɛti Edɛnin sunɔ ɡo. Kpɑ n de bu Siriɡibu yoru mwɛɛri bu kɑ dɑ Kiriɔ. Nɛ, Yinni Gusunɔwɑ nɑ yeni ɡeruɑ.

⁶Nɛ, Yinni Gusunɔ nɑ nɛɛ, Filisitibɑn torɑnu nu kpɛ̃ɑ. Yen sɔ̃, nɑ ǹ nɛn himbɑ ɡɔsiɑmɔ. Domi bɑ Isireli dɑbi dɑbinu yoru mwɛɛrɑ bɑ Edɔmubɑ nɔmu bɛriɑ.

⁷Mɛyɑ kon de bu ben wuu Gɑsɑ dɔ̃ɔ sɔku, kpɑ u yen dii ɡeenu di.

⁸Kon Asidɔdun tɔmbu kɑ Asikɑlonin sunɔ kpeerɑsiɑ. Kon Ekoroniɡibu wɔri. Kpɑ Filisiti be bɑ tie mi kpuro bu kɑm ko. Nɛ, Yinni Gusunɔwɑ nɑ yeni ɡeruɑ.

⁹Nɛ, Yinni Gusunɔ nɑ nɛɛ, Fenisibɑn torɑnu nu kpɛ̃ɑ. Yen sɔ̃, nɑ ǹ nɛn himbɑ ɡɔsiɑmɔ. Domi bɑ Isireli dɑbi dɑbinu yoru mwɛɛrɑ bɑ Edɔmubɑ nɔmu bɛriɑ. Bɑ ǹ ben ɑrukɑwɑni yibie ye bɑ rɑɑ kɑ bu bɔkuɑ.

¹⁰Yen sɔ̃, kon de bu ben wuu Tiri dɔ̃ɔ sɔku, kpɑ u yen dii ɡeenu di.

¹¹Nɛ, Yinni Gusunɔ nɑ nɛɛ, Edɔmubɑn torɑnu nu kpɛ̃ɑ. Yen sɔ̃, nɑ ǹ nɛn himbɑ ɡɔsiɑmɔ. Domi bɑ ben mɛro bisibu Isirelibɑ nɑɑ swĩi kɑ tɑkobi. Bɑ ǹ bu wɔnwɔndu kue. Ben mɔru kun mɑɑ sure. Mɑ bɑ kɑ bu wɛrɛru sɑ̃ɑ dim dim sɑɑ kpuro.

¹²Yen sɔ̃, kon de bu ben wuu Temɑ dɔ̃ɔ sɔku kpɑ u Botisirɑn dii ɡeenu di.

¹³Nɛ, Yinni Gusunɔ nɑ nɛɛ, Amɔnibɑn torɑnu nu kpɛ̃ɑ. Yen sɔ̃, nɑ ǹ nɛn himbɑ ɡɔsiɑmɔ. Domi bɑ ɡuriɡibun nukunu bɛsukɑ Gɑlɑdiɔ, sɑɑ ye bɑ Gɑlɑdiɡii ben tem mwɑɑmɔ beɡim mu kɑ yɑsiɑn sɔ̃.

¹⁴Yen sɔ̃, kon de bu ben wuu Rɑbɑ tɑbu wɔri bu ye dɔ̃ɔ sɔku, kpɑ u yen dii ɡeenu di mɑm mɑm. Sɑɑ ye sɔɔ, tɑbun wurenu koo nɔɔrɑ nɡe woo bɔkɔ.

¹⁵Kpɑ bu ben sinɑ boko kɑ win tɑbu sinɑmbu yoru mwɛɛri. Nɛ, Yinni Gusunɔwɑ nɑ yeni ɡeruɑ.