Amosi 1

1

2

3

4

5

6

7

8

9

¹Tekoa haeonec lama soŋaŋ jumbiŋ jaŋeraonec ŋic moc ʒâŋene Amosi ere dâŋ ʒiŋe hâcne. E maŋʒâŋene tâcneme Israe ŋic jaŋerao wiac fuaocmu i honewec. Eme jufehapie jara 2 tarame homeŋ sâko bawec. Ine Uʒijazi Judaŋic jaŋere ŋicwofuŋ juwec, â Jeroboam, Jehoasire ŋokâ hâcne, eki Israere ŋicwofuŋ juwec dameŋ ira wiac i honewec.

²Ehuc kecʒiŋuc muwec: “Wofuŋ owa‐ticnere fânâŋ Zioŋkonec warekac, â Jerusalem haeonec marac fânâŋ‐ticne fisikac; ehame lama jaŋere kecɋaŋzi ɋaŋa ururuc ekac, â Karamele tiki botâŋnao jâc wiac sasawa hâmo qanʒaraŋ efârekac.”

³Wofuŋzi kecʒiŋuc mukac: “Damasko hae rune jaŋe sindaŋnezi sindaŋne bâfuambiŋte no okacne bazu‐jarezo mupo, dâŋ i mi hetâtiepemu, jaŋe aeŋ keretac sâqe micneheczi Gileade mâreŋ rune sipiric‐jopambiŋte.

⁴No irec hâcne ŋicwofuŋ Haʒaele fic hae‐ticne turuŋkepe ʒazejec, ehuc ŋicwofuŋ Beŋhada ere ficsanaŋ wiac ʒâseŋkezejec.

⁵No Damasko haere motâc babasanaŋ qazupemu, ehuc Aweŋ wâneŋte ŋecjucfâcne qâmiziec‐jopapemu, erâ Bete‐Edeŋkonec ŋicwofuŋ gunu bajuekac e iŋuc jaha qape omaeocmu. Ehame Siria mâreŋ rune jaŋe Kiri mâreŋko kâpâcwâru ficko raniŋmu.” Wofuŋte dâŋ iŋuc.

⁶Wofuŋzi kecʒiŋuc mukac: “Gaza hae rune jaŋe wiac sindaŋnezi sindaŋne bâfuambiŋte no okacne bazu‐jarezo mupo, dâŋ i mi hetâtiepemu, jaŋe ŋic ŋokac naru motec furu jaha Edomŋic jaŋere meo râec‐jopambiŋte kiŋaŋ qaqafâc‐jeŋic bacjopa jumbiŋ hâcne.

⁷Eme no irec hâcne Gaza haere sac turuŋkepe ʒahuc ficsanaŋ‐ticne ŋerakac i ʒâseŋkezejec.

⁸Erâ no Asidode ŋecjucfâc‐ticne jaŋe mecne, â Asikaloŋ haere ŋicwofuŋ gunu bajuekac e mâmâc bâsirowec‐jopapemu. No Ekoroŋ ŋic râsi ejarepemu, ehame Filisa ŋic nâfocne juŋgopieŋ jaŋe wâc siroweniŋmu.” Wofuŋ Anuture dâŋ iŋuc.

⁹Wofuŋzi kecʒiŋuc mukac: “Tiro hae rune jaŋe wiac sindaŋnezi sindaŋne bâfuambiŋte no okacne bazu‐jarezo mupo, dâŋ i mi hetâtiepemu, jaŋe ŋic ŋokac naru motec furu jaha Edomŋic jaŋere meo râec‐jopahuc, âgo ʒâʒâfic‐jeŋic fowec irec mi manasumbiŋ.

¹⁰No irec hâcne Tiro haere sac turuŋkepe ʒahuc ficsanaŋ‐ticne ŋerakac i ʒâseŋkezejec.”

¹¹Wofuŋzi kecʒiŋuc mukac: “Edomŋic jaŋe wiac sindaŋnezi sindaŋne bâfuambiŋte no okacne bazu‐jarezo mupo, dâŋ i mi hetâtiepemu, jaŋe qomâfâc‐jeŋic busâqoc moc mi mana‐jarehuc ʒikazi jopa jâpec ejarembiŋ, ehuc kimbeŋ aaric‐jeŋic sakarehuc raŋɋa raŋɋa bajumbiŋ.

¹²No irec hâcne mupe ʒoczi Temaŋ mâreŋko fuarâ ʒazejec, ehuc Bozera haere ficsanaŋ ʒâseŋke‐fârezejec.”

¹³Wofuŋzi kecʒiŋuc mukac: “Amoŋŋic jaŋe wiac sindaŋnezi sindaŋne bâfuambiŋte no okacne bazu‐jarezo mupo, dâŋ i mi hetâtiepemu, jaŋe mâreŋ‐jeŋicte ma bâsokaniŋte Gileade haeo ŋokac kiwechec jumbiŋ jaŋe mi akic‐jopahuc bujeŋic hefâuckembiŋ.

¹⁴No irec hâcne Raba haere sac turuŋkepe ʒazejec, ehuc ficsanaŋ‐ticne i ʒika qahuc aŋara hehapie ʒâʒâkiriŋ mâŋâŋzi tâpirihec ficneme ʒâseŋke‐fârezejec.

¹⁵Ehame ŋicwofuŋ‐jeŋic e fekicnefâc‐ticne jaŋehec mâmâc kâpâcwâru ficko bacjopa raniŋmu.” Wofuŋtao dâŋ iŋuc.