Amos 1

1

2

3

4

5

6

7

8

9

¹Amosnê biŋ tau tonec. Eŋ gejobwaga dombaŋa nêŋ teŋ aŋga malac Tekoa. Ôjô gêjam atomgeŋ ma eŋ gêlic biŋ tau gêdêŋ Judanêŋ kiŋ Usia agêc Israelnêŋ kiŋ Joas latu Jerobeam nêŋ têm e ŋajala luagêc gêja, go ôjô gêjam.

²Ma eŋ kêsôm gebe “Apômtau gêjam wambaŋ aŋga Sion to kêkac awa sa aŋga Jerusalem e gejobwaga dombaŋa nêŋ gamêŋ ŋagêgwaŋ kêsêlic to lôc Karmel ŋatêpôê kêmêliŋ.”

³Apômtau kêsôm biŋ tonec gebe “Aê oc jawi Damaskusnêŋ keso têlêac me aclêŋa ŋagêjô siŋ atom, gebe êsêac sêlêsa Gilead popoc to sêlêsu êsêac.

⁴Amboac tonaŋ aê jakêŋ ja êniŋ Hasaelnê andu ma êndaŋgac Benhadadnê andu kiŋŋa.

⁵Aê gabe jatuc malac Damaskus ŋabalaŋ popoc ma janseŋ lau Bikat Awenŋa to ŋac, taŋ kêmêgôm tôc kiŋŋa gêŋgôŋ Bet-Eden naŋ su. Ma lau Siriaŋa nasêŋgôŋ kapoacwalô aŋga Kir.” Apômtaunê biŋ tau tonec.

⁶Apômtau kêsôm biŋ tonec gebe “Aê jawi Gasanêŋ keso têlêac me aclêŋa ŋagêjô siŋ atom, gebe êsêac sêjaŋgo lau-m samuc teŋ su gebe sêkêŋ êsêac sêsêp lau Edom lemeŋ.

⁷Amboac tonaŋ aê jakêŋ ja êniŋ Gasa ŋatuŋbôm ma êndaŋgac ŋaandu kiŋŋa su.

⁸Aê gabe janseŋ lau Asdodŋa to ŋac, taŋ kêmêgôm tôc kiŋŋa gêŋgôŋ Askalon naŋ su. Aê lemoc ejoŋ malac Ekron e lau Pilisti nêŋ ŋapopoc sênaŋa.” Apômtaunê biŋ tau tonec.

⁹Apômtau kêsôm biŋ tonec gebe “Aê jawi Tirusnêŋ keso têlêac me aclêŋa ŋagêjô siŋ atom, gebe êsêac sêkêŋ lau-m samuc teŋ sêsêp Edom lemeŋ ma taêŋ gêjam poac lasitêwaiŋa atom.

¹⁰Amboac tonaŋ aê jakêŋ ja êniŋ Tirus ŋatuŋbôm ma êndaŋgac ŋaandu kiŋŋa su.”

¹¹Apômtau kêsôm biŋ tonec gebe “Aê jawi Edomnê keso têlêac me aclêŋa ŋagêjô siŋ atom gebe eŋ kêjanda lasi ŋa siŋ ma kêtiŋ nê taê walô lauŋa su. ma têtac ŋandaŋ ŋapaŋ to têtac kêmoatiŋ tôŋ gedeŋ tôŋgeŋ.

¹²Amboac tonaŋ aê jakêŋ ja êniŋ malac Teman ma êndaŋgac malac Bosra ŋaandu kiŋŋa.”

¹³Apômtau kêsôm biŋ tonec gebe “Aê jawi lau Amon nêŋ keso têlêac me aclêŋa ŋagêjô siŋ atom, gebe êsêac sêkac lauo, taŋ sêmoa teŋ naŋ, gêŋgic aŋga Gilead, gebe sêŋgôm tauŋ nêŋ nom ŋamadiŋ êtu kapôêŋ.

¹⁴Amboac tonaŋ jaŋgôm ja elom aŋga malac Rahab ŋatuŋbôm ŋalêlôm ma êndaŋgac ŋaandu kiŋŋa êndêŋ taŋ wali êtaŋ êndêŋ bêc siŋŋa ma êndêŋ taŋ mu êmbuc êndêŋ bêc mulaiŋa.

¹⁵Ma êsêacnêŋ kiŋ to nê kasêga samob sêwiŋ tauŋ nasêŋgôŋ kapoacwalô aŋga gamêŋ jaêc.” Apômtaunê biŋ tau tonec.