1 Timoteo 2

1

2

3

4

5

6

¹Kantzꞌonoj kꞌu chawe chabꞌiꞌij waꞌ che rutinamit ri Dios: Lik chirajawaxik wi kaqaꞌan orar chwach ri Dios. Echiriꞌ kojchꞌaꞌt rukꞌ, e chojelaj chwach Rire pakiwi konoje ri tikawex chaꞌ kuya chike ri lik kajawax che ri kibꞌinik kisilabꞌik, yey qatioxij ronoje che.

²Qaꞌana orar pakiwi taq ri e taqanelabꞌ y pakiwi konoje taq ri e aj wach che ruwachulew chaꞌ jelaꞌ utz koj-jeqiꞌ chi utzil chomal y kojbꞌin jusukꞌ rukꞌ jun saqil bꞌinik silabꞌik chwach ri Dios.

³Lik kꞌu qaꞌana orar ma waꞌ e lik utz y e kukꞌul ukꞌuꞌx ri Dios Qakolobꞌenel,

⁴ma ri karaj Rire e kekolobꞌetaj konoje ri tikawex y kaketaꞌmaj chi utz ri Qꞌijsaq.

⁵Ma xa jun ri Dios kꞌolik yey xa jun ri kꞌo puqꞌabꞌ kachꞌaw paqawiꞌ chwach ri Dios; waꞌ e ri Qanimajawal Jesucristo, Ralaxel Chikixoꞌl Tikawex.

⁶Rire xuya ribꞌ pa kamik quma riꞌoj oj tikawex chaꞌ kutoj ri qamak y kojresaj puqꞌabꞌ Ritzel; yey waꞌ xqꞌalajisax pa ruqꞌijol uchꞌobꞌom chi lo ri Dios.

⁷E ruma waꞌ, riꞌin in chaꞌtal lo ruma ri Dios re kantzijoj ri Utzilaj Tzij y kinuꞌan kꞌu in taqoꞌn yey in kꞌutunel chikiwach ri na e ta aj Israel chaꞌ jelaꞌ kakubꞌiꞌ kikꞌuꞌx rike rukꞌ ri Cristo y kakikoj ri Qꞌijsaq. Lik qatzij wa kambꞌiꞌij che alaq, ma in re ri Cristo y na kanꞌan ta raqꞌubꞌal.

⁸Ri kuaj riꞌin e konoje taq rachijabꞌ, tobꞌ pa e kꞌo wi, xaqi kiꞌana orar chwach ri Dios. Yey echiriꞌ kakiyak kꞌu ri kiqꞌabꞌ re kakiꞌan orar, ri lik chirajawaxik wi e jusukꞌ ri kibꞌinik kisilabꞌik, na jinta oyowal pa kanimaꞌ y na kechꞌoꞌjin ta chikiwach.

⁹Ri nupixabꞌanik chike taq rixoqibꞌ e kiwiqa kibꞌ chi usukꞌlikil. Makikꞌut kꞌu ri kicuerpo yey makiwiq kibꞌ xa re yakbꞌal kiqꞌij. Ma ¿saꞌ ri kuꞌan chom che rixoq? ¿E nawi ri wiqital rukꞌ oro y rukꞌ perlas? ¿E nawi uchomalil laꞌ ri kiwiqibꞌal? Na e taj,

¹⁰ma ri kichomalil e ri chomilaj chak kakiꞌan chwach ri Dios, jelaꞌ pachaꞌ ri taqal chike rixoqibꞌ kakiloqꞌnimaj uqꞌij Rire.

¹¹Echiriꞌ kakꞌut Rutzij Upixabꞌ ri Dios chikiwach rixoqibꞌ, lik chirajawaxik rike xew kakito y makikꞌul uwach.

¹²Riꞌin na kanya ta luwar chike rixoqibꞌ kebꞌuꞌan e aj kꞌutunel chikiwach rachijabꞌ o ketaqan pakiwiꞌ; ma ri lik ubꞌe e xa kakito.

¹³Ma ri Dios nabꞌe e xuꞌan ri Adán, tekꞌuchiriꞌ xuꞌan ri Eva.

¹⁴Yey na e ta ri Adán ri xsokotaj nabꞌe ruma ritzel, e ri Eva; y echiriꞌ xsokotajik, e xupalajij rutzij ri Dios.

¹⁵Na rukꞌ ta kꞌu riꞌ, ri Dios kebꞌukolobꞌej rixoqibꞌ y kuya kalkꞌoꞌal chaꞌ kekikꞌiyisaj. Kekolobꞌetaj kꞌu riꞌ we ketikiꞌ chi utz rukꞌ ri kubꞌulibꞌal kikꞌuꞌx, ri rutzil kikꞌuꞌx y ri santowilaj kibꞌinik.