1 BƐKPÀÀTÌBƐ̀ 6:1-19

¹Okpɑ̀ɑ̀tì Sɑdomɔɔ do yóó ketɛ́ ti Yiɛ̀ nKuyie ncĩ́ɛ̃̀tɛ̀ mumɑrimù, kɛ̀ dɛ̀ mɔ̀kɛ yɛbie nsikɔusìnɑ̀ɑ̀ nɛ̀ sipísìni ndi nɛ̀ bɛ̀ yɛ̀mɛ̀ Esibiti o kpɑ̀tì benni nɑɑnnì, otɑ̃̀nkù odɛ́rì bɛ̀ do tú wè Sifi.

²Sɑdomɔɔ do mɑɑ́ ti Yiɛ̀ nKuyie ntɛ̀ɛ̀ cĩ́ɛ̃̀tɛ̀ okùmɛ̀ do bo mɛ́tìrì sipísìtɑ̃ɑ̃ti ndi, mɛpɛ̃kùmɛ̀ mɛ́tìrì tɛpíítɛ̀, mɛcómmɛ̀ mɛ́tìrì tɛpíítɛ̀ nɛ̀ mɛ̀nùmmù.

³Kòo mɑɑ́ kukpɑ̃́nkpɑ̃́nkù bɛ̀ ɔ̃ɔ̃ tɑ kù kɛ nɛ́ tuɔkɛ kudieku diɛkù, Kuyie ncĩ́ɛ̃̀tɛ̀ kɔku. Kɛ̀ dɛ kó kukpɑ̃́nkpɑ̃́nkù okùmɛ̀ mbo mɛ́tìrì tɛpíítɛ̀, kudieku okùmɛ̀ bíɛ́kɛ̀ mɛ́tìrì mɛ̀nùmmù, kudieku pɛ̃kùmɛ̀ bíɛ́kɛ̀, mɛ́tìrì mɛ̀nùmmù.

⁴Kòo keú sibòo kɛ́ɑ̃nnɛ́ simɑ́tìdìi,

⁵kɛ́mɑɑ́ ditou mɑrì kɛ́kpeénnɛ̀ kudieku diɛkù nɛ̀ dɛ fũ̀ɔ̃̀ kɔku kɛ́ kù mùnnɛ mɛ̀tɑ̃ɑ̃ti.

⁶Kɛ̀ kudieku dɛ fũ̀ɔ̃̀ kɔku mmɔkɛ mɛpɛ̃kùmɛ̀ mɛ́tìrì mɛ̀dɛ́mɛ̀ nɛ̀ dikéè, kɛ̀ dɛ cuokɛ̀ kɔku mɔkɛ mɛ́tìrì mɛ̀tɑ̃ɑ̃ti nɛ̀ dikéè, kutɑ̃ɑ̃́nkù mɛ́tìrì mɛ̀tɑ̃ɑ̃ti nɛ̀ dikéè. Kɛ yɛ̃́ ti Yiɛ̀ nKuyie ncĩ́ɛ̃̀tɛ̀ kó imɑrí cɛ̃́ɛ̃̀ ndo í mɑmɛ̀ imɔu dɛ fũ̀ɔ̃̀ nɛ̀ dɛ ĩ́nkɛ̀. Fɛmɑrifɛ mɑfɛ̀ do í mɑ̀nnɛ̀ fɛtɛfɛ̀ mɛcɛ̃́ɛ̃̀ nnɛ̀ dɛ kpɛ́í mbɛ̀ kpeé nkùù dieku ku kó tipĩ́mpĩ́ntì í nkɑ́ɑ́ nKuyie ncĩ́ɛ̃̀tɛ̀ kó imɑrí.

⁷Bɛ̀ do dɔ̀ɔ̀ yɛtɑ̃́rɛ̀ pɑ́íí nwe, kɛ́deè kɛ nɛ́ nɑ kɛ́ketɛ́ mumɑrimù, bɛ̀ mɑɑ̀ dìì mɔ̀nnì dihenkɛ̀rì yoo tɛtũ̀ũ̀tɛ̀ kó kunɑmpoo í mbo, yoo timɑ́tì kó kutɔ̃nnɛnkù tɛkù mɑkù.

⁸Ditou dìì kpekɛ́ dɛfũ̀ɔ̃̀ kó kudieku kó dibòrì do bo Kuyie ncĩ́ɛ̃̀tɛ̀ bɑkù cɑ̃̀nku nku. Kɛ̀ yɛdɛtìsɑ̀kɛ̀ bo ku miɛkɛ yɛ̀ɛ̀ dèkùnɛ̀ kudɛ́ríkù, kɛ pɛ̃ɛ̃tɛ́ kɛ tùɔ̀kɛ kutɑ̃ɑ̃́nkù.

⁹Bɛ̀ mɑɑ́ dìì mɔ̀nnì kɛ́deè, kɛ̀ Sɑdomɔɔ tɛ̀ mùnnɛ nɛ̀ dɛtekperɛ̀ kó imundɛí nɛ̀ dɛ kó tidɑbɛɛtì.

¹⁰Bɛ̀ do mɑɑ́ dìì tou kɛ́kpeénnɛ̀ ti Yiɛ̀ nKuyie ncĩ́ɛ̃̀tɛ̀ kɛ́ dì mùmmu kɛ́sɔɔ́ ntidieti, bɑ́ kùù dieku kɛ̀ ku cómmɛ̀ mbo mɛ́tìrì mɛ̀dɛ́mɛ̀ nɛ̀ dikéè, kɛ̀ bɛ̀ɛ tì mùnnɛ nɛ̀ dɛtekperɛ̀ kó imundɛí, kɛ́tɑunnɛ̀ ti Yiɛ́ nKuyie ncĩ́ɛ̃̀tɛ̀.

¹¹Kɛ̀ ti Yiɛ̀ nKuyie mbɛ́innɛ̀ Sɑdomɔɔ kɛ dɔ̀:

¹²A mɛ̀ nni mmɑɑ́mɛ̀ tɛcĩ́ɛ̃̀tɛ̀, kɑ̀ɑ tũ̀ n kuɔ́ kɛ dɔɔri n dɑ nɑ̀kɛ́ tì kɛ dɑkɛ kɛ yíé n tɑnnɔ̀ yɛmɔu, m bo dɑ dɔɔ̀ n do nɑ̀kɛ́ tì ɑ cicɛ Dɑfiti ɑ kpɛ́í.

¹³M bo mbo n kɔbɛ Isidɑyɛɛribɛ cuokɛ̀, m bɑ́ɑ́ bɛ̀ yóu.

¹⁴Sɑdomɔɔ mɑɑ́ dìì mɔ̀nnì ti Yiɛ̀ nKuyie ncĩ́ɛ̃̀tɛ̀ kɛ́deè,

¹⁵kɛ́cónnɛ́ dɛtekperɛ̀ kó tidɑbɛɛtì kɛ̀ dɛɛ̀ ntú kumɑrí, dɛ miɛkɛ kɛtenkɛ̀ kɛ́tuɔkɛnɛ̀ timùmmùntì, kɛ́deè kɛ́nɛɛ́ ndɛtekperɛ̀ bɛ̀ tu dɛ̀ sìpɛ̀rɛ́sì dɛ kó tidɑbɛɛtì kɛtenkɛ̀,

¹⁶kɛ́dínnɛ́ dɛtekperɛ̀ kó tidɑbɛɛtì dɛ miɛkɛ kó kufɑ̃́ɑ̃́ nkɛ̀ ku okùmɛ̀ ḿbo mɛ́tìrì tɛpíítɛ̀ kɛ̀ bɛ̀ɛ kù dɑ̀ri tidɑɑbɛɛtì dɛ fũ̀ɔ̃̀ nɛ̀ dɛ ĩ́nkɛ̀. Dɛ kó kufɑ̃́ɑ̃́ nku bɛ̀ do túmɛ̀ ikuɔ́ nɛntì dieku.

¹⁷Bɛ̀ do totɛ́ kutempìèti kɛ́deè, kɛ̀ kùù dieku nkpɑɑ́ ku okùmɛ̀ do bo mɛ́tìrì sipísìdɛ́ ndi.

¹⁸Kɛ̀ bɛ̀ɛ kù dɑ̀ri tidɑbɛɛtì, kɛ́kerí tifèntì ti ĩ́nkɛ̀, kɛ̀ tì ndònnɛ̀ yɛyɑɑ̀ nnɛ̀ yɛ póó, tì do dɑ̀ri kufɑ̃́ɑ̃́ nkumɔu ndi bɑ́ kumɑrí í nfeí.

¹⁹Kɛ̀ bɛ̀ɛ dɔɔ̀ kɛ́tũntɛ kufɑ̃́ɑ̃́ nkɛ́ kù wèńkùnnɛ kɛ́tɑnnɛ́ ti Yiɛ̀ nKuyie ntɑummɛ̀ tɔu.