1. King 6:1-19

¹Iwe, lon ewe föpükü waliken ier mürin än ekewe aramasen Israel towu seni ewe fanü Isip, lon arüanün ierin än Salomon nemeni Israel, fän ewe maram Sif, iei aruuen maram, Salomon a popuetä le aüetä imwen ewe Samol mi Lapalap.

²Ewe imwenfel ewe king Salomon a aüetä fän iten ewe Samol mi Lapalap ükükün langataman tiue fiit, chölapan ilik fiit me tekian faik me limu fiit.

³Iwe, ewe kengkang mi nom mesen ewe imwenfel ükükün chölapan ilik fiit, a nönnöfengen me chölapen ewe imwenfel, nge langataman ükükün engol me limu fiit.

⁴A föri asamwachon ewe imwenfel mi wattelong lon o ti ngeni mächä.

⁵A pwal föri pwalangen lepekin me lükisökürün ewe imw won ülüngat sässärin o föri rumwen lor.

⁶Iwe, aeuin sässär ükükün chölapan fisu esop fiit, ewe aruuen sässär ükükün chölapan tiu fiit, nge ewe aülüngatin sässär ükükün chölapan engol esop fiit. Pun Salomon a föri along mi iti seni pwelin ünükün etippen ewe imwenfel, pwe ekewe irälap resap tolong lon etippan.

⁷Nge lupwen ra aüetä ewe imwenfel, ra aea fau mi fen fal me lon ewe lenien för fau. Iei mine esap wor eman a rong chopuchopun ama ika kouk ika och pisekin angang seni mächä, lupwen ewe imwenfel a kaütä.

⁸Iwe, ewe asamen tolong lon ewe aeuin sässär a nom peliörün ewe imwenfel. A wor eu latö seni ewe aeuin sässär tori ewe aruuen sässär, pwal seni ewe aruuen sässär tori ewe aülüngatin.

⁹Iei usun Salomon a aüetä ewe imwenfel o awesala. A aea irälap me pap seni ewe irä setar le tenchoni ewe imw.

¹⁰Iwe, ükükün tekian lefilen eu me eu kewe ülüngat sässärin ewe pwalang mi nom ünükün ewe imwenfel fisu esop fiit, ra pach ngeni ewe imwenfel ren irälap seni ewe irä setar.

¹¹Iwe, ewe Samol mi Lapalap a üreni Salomon,

¹²“Are kopwe aleasochisi ai kewe allük me pwüüng, pwe kopwe apwönüretä o föri pwüngür, mürin üpwe apwönüetä ngonuk ai pwon üa fen pwon ngeni Tafit semom we.

¹³Iwe, üpwe imweimw lon ei imwenfel ka aüetä lein nei kewe aramasen Israel, nge üsap likitirela.”

¹⁴Iei usun Salomon a aüetä ewe imwenfel o awesala.

¹⁵A ccheni etippen lon ewe imwenfel ngeni pap seni ewe irä setar, seni fan tori tenchon. Nge lon ewe imwenfel a aea pap seni ewe irä saipires.

¹⁶Nge lesopuchikin ewe imw me lon a refiela eu rum ükükün langataman ilik fiit o ccheni seni fan tori tenchon ngeni pap seni ewe irä setar. Ei rum a iteni rum mi unusen pin.

¹⁷Iwe, ewe rum sosowun ewe rum mi unusen pin ükükün langataman wone fiit.

¹⁸Nge ekewe pappen lon ewe imwenfel seni ewe irä setar a rup wor liosun pamkin me pön irä mi mas. Unusen lon ewe imwenfel a cchech ngeni pap seni ewe irä setar, pwe esap wor eföü fau a pwäwu.

¹⁹Salomon a amolätä ewe rum mi unusen pin sosolong, pwe epwe iseis lon än ewe Samol mi Lapalap we pworofel.