Ŋicwofuŋ I 6:1-19

¹Israe ŋic jaŋe Aigita mâreŋkonec waharâ juwefukupie jara 480 eha Salomozi Israe ŋic jaŋerao ŋicwofuŋ gie bahuc juhame jara 3 â mosa 2 ewec, mosa ʒâŋene Ʒiwi, dameŋ ira hâcne Salomozi fuŋkerâ Wofuŋte ufuŋ bawec.

²Ŋicwofuŋ Salomozi Wofuŋte ufuŋ bawec irec sâc ʒiŋuc: Ʒoricne‐ticnere sâc kubi 60, otecne‐ticnere sâc kubi 20, hâŋ bafekicne ine kubi 30 irec sâc.

³Eme fic fârinao hae gâŋgâŋ moc bawec irec otecnere sâc kubi 20, â fic mainao ʒuhuckewec irec sâc kubi 10.

⁴Eme râreckehuc qâqâtâc kataŋ râewec, râpenao bâpitiwawec â maŋnao ine bâsokawec.

⁵Erâ fic fârine â furufic i orâŋkehuc fic ʒuhucne barâ maŋne maŋne âke tâcne rawec.

⁶Fic ʒuhucne i feŋgaŋne 3. Juwic otec‐ticnere sâc kubi 5, ʒâʒâŋiŋko 6 â feŋgaŋne faicpec irec otecnere sâc kubi 7. Fic sâpenao feŋgaŋne feŋgaŋne raʒi fowec ira jâc otecne mâc iticnehuc râe rakicne.

⁷Eme taha ufuŋ bambiŋko mâsi ʒiŋuc fuawec: Qânâ wiac i qanaŋ ba akic efârekicnere ufuŋ bahapie hama me râric me aeŋ wiacte fânâŋ moc mi fuawec.

⁸Ficʒuhuc juwicnere motâc i fic fâreopec domawec, eme irecnec riri oorâŋ râreckehuc bakicne i feŋgaŋne ʒâʒâŋiŋko fewec, eme irecnec riri moczi feŋgaŋne faicpec fewec.

⁹Salomo e iŋuc ehuc fic baku bafârerâ fic tapane ine jâmâzâc jâczi bawec.

¹⁰Erâ e fic orâŋkehuc ʒuʒuhucne bafârewec wâc, feŋgaŋne moc i hâŋne‐ticne kubi 5, erâ fic i jâmâzâc â wetejâczi basanaŋkewec.

¹¹Eme Wofuŋte dâŋ Salomorao kecʒiŋuc fuawec:

¹²“Ŋoŋe dâŋsanaŋ‐nane bâninipehuc mumutâc â sâcmutâc dâŋnane mana rereŋ erâ hata mutâcne‐ŋarepo sâc wiac ebac efâreniŋmuo ine no go â mamacge Dawidi findaŋdâŋ ŋasapo i mupe fârio qaocmu.

¹³Ehame no Israe ŋicfâc‐nane ŋoŋere ŋondeŋko juhuc moc mi behec‐ŋopapemu.”

¹⁴Eme Salomo e Wofuŋte fic baku bâzickewec.

¹⁵Eme ɋâriŋkonec fuŋkerâ feku faic tapanao fisiwec fic sâpene i jâmâzâc paraŋzi foŋke‐fârerâ ɋâriŋne i wete paraŋzi bârârâŋnewec.

¹⁶Eme ficmaŋne râpenaopec ira jâmâzâc paraŋzi ficmaŋne moc âke tâcnewec, i sâcticne kubi 20. Paraŋ‐ticne i ɋâriŋkonec feku fic tapanao iticnewec. Ficmaŋne izi furu dindiŋ hâcne.

¹⁷Eme ficmaŋne irecnec ficmaŋne fârine ʒuhuckerâ rawec i sâcticne kubi 40.

¹⁸Ficmaŋne i jâmâzâc paraŋzi foŋke‐fârekicnere qânâ hohonene moc mi ewec. Eme jâczi hândâŋ qarâ fâuckeme âri fuaekac irec sâc hawari paraŋko metâ barakicne.

¹⁹Eme Wofuŋte ʒâʒâfic katapa irec ŋeŋe hae fuaocte ficmaŋne râpenaopec furu dindiŋ irec maŋne âke tâcnewec hâcne.