عِسِرَيِلَ مَنفّيٍ ١ 6:1-19

¹حّ كّمّ نَانِ حّ تٌنفٌ سٌلٌمَسَشَن تٌ دَنفِ كٍلِقٍ عِسِرَيِلَ مِنِ مِسِرَ بْشِ رَ تّمُي نَشّ، مَنفّ سُلٍمَنِ نَشَ عَلَتَلَ شَ هْرْ مْبَنشِ تِ قْلْ سِوِ كِكٍ كُي. نَ حّ قِندِشِ عَ شَ مَنفّيَ حّ نَانِ ندٍ نَن نَ عِسِرَيِلَ بْشِ شُن مَ.

²سُلٍمَنِ عَلَ شَ بَنشِ تِ يِ مَنِيّ شَسَبِ نَن نَ؛ عَ كُيّ حْنفْن يَ تٌنفٌ سٍننِ، عَ فبٌي حْنفْن يَ مْشْحّن، عَ عِتٍ حْنفْن يَ تٌنفٌ سَشَن.

³عَ يَتَفِ بُنتُنيِ شَ كُيّ نُ لَنشِ حْنفْن يَ مْشْحّن نَن مَ، عَلْ بَنشِ شَ كُيّ نَ كِ نَشّ. عَ فبٌي قَن قِندِ حْنفْن يَ مْشْحّن نَن نَ.

⁴عَ وُندّرِيٍ نُ يَءِلَنشِ بَنشِ شَلّ نَن كُي، وُرِيٍ قَن نُ يَءِلَنشِ عٍ قَرِ.

⁵عَ نَشَ كٌنكٌي قَتُ هْرْ مْبَنشِ شَلّ رَبِلِنيِ.

⁶كٌنكٌي سِنفٍيٍ شَ فبٌي نُ لَنشِ حْنفْن يَ سُولِ نَن مَ. نٍيٍ قَرِ كٌنكٌي فبّتّيٍ نَشَ دْشْ نَشٍيٍ شَ فبٌي نُ لَنشِ حْنفْن يَ سٍننِ مَ. نٍيٍ قَن قَرِ كٌنكٌي فبّتّيٍ نَشَ دْشْ نَشٍيٍ شَ فبٌي نُ لَنشِ حْنفْن يَ سٌلٌقٍرٍ مَ. هْرْ مْبَنشِ شَلّ شَ مَرَبِنيٍ نُ رَشُرُنشِ عَ قُفٍ بِرِ رَ، عَلَكٌ كٌنكٌييٍ مَسَ وُرِيٍ مُ سٌمَ بَنشِ شَلّ كُي كِ نَشّ.

⁷عٍ تٌ نُ هْرْ مْبَنشِ تِمَ، عٍ نُ فّمّيٍ رَوَلِمَ نَشٍيٍ حَن نُ بَرَ مَسٌلِ فٍيَ يِرٍ عٍ تٌنفٌشِ دّننَشّ. نَ كِ وَلِسٍ يٌ شُي مُ نُ مّمَ هْرْ مْبَنشِ يِرٍ، عَلْ دّرّ مَ، بٍرَ، شَ نَ مُ عَ رَ وَلِسٍ فبّتّ نَشَن يَءِلَنشِ وُرٍ رَ.

⁸نَادّ ندٍ نُ نَ بَنشِ يِرٍقَنيِ مَ نَشَن مِنِمَ كٌنكٌييٍ يِرٍ مَ. تٍدٍ سَمّ دَاشِ ندٍ نُ يَءِلَنشِ بَنشِ كُي مَ، نَشَن نُ كٌنكٌييٍ كُي مَسْتْمَ كٌورٍ رَ.

⁹عٍ تٌ فّ بَنشِ تِدٍ، سُلٍمَنِ نَشَ عَ رَشُنمَ سّدِرِ وُرِيٍ رَ.

¹⁰كٌنكٌي نَشٍيٍ نُ تِشِ هْرْ مْبَنشِ سّيتِيٍ مَ، عٍ عِتٍ حْنفْن يَ سُولِ. نَ بِرِن نُ شِرِشِ بَنشِ مَ سّدِرِ وُرِيٍ رَ.

¹¹عَلَتَلَ نَشَ عَ مَسٍن مَنفّ سُلٍمَنِ بّ، عَ نَشّ،

¹²«ﭑ شَ عَ قَلَ عِ بّ يِ بَنشِ تِقٍ شَ قٍ رَ، شَ عِ سَ عِ حّرّ ﭑ مَ كِرَ شْن مَ، شَ عِ سَ ﭑ مَ سّرِيّ رَبَتُ، شَ عِ سَ ﭑ مَ يَامَرِيٍ سُشُ، ﭑ نَن ﭑ مَ لَايِدِ رَكَمَلِمَ نّ عِ بّ، ﭑ نَشَن قَلَ عِ بَبَ دَوُدَ بّ.

¹³نَ كُي ﭑ لُمَ نّ ﭑ مَ حَمَ تَفِ، ﭑ مُ عِ بّحِنمَ عَبَدَن.»

¹⁴سُلٍمَنِ نَشَ عَلَ شَ هْرْ مْبَنشِ تِ، عَ وَلِ رَحْن.

¹⁵عَ نَشَ سّدِرِ وُرِ شٍبٍنيِيٍ مَقَتُ بَنشِ شَلّيٍ مَ عَ كُي، كٍلِقٍ عَ شَلّ قْلّ مَ هَن بَنشِ شُنيِ رَ. عَ نَشَ سِثِرّ وُرِ شٍبٍنيِيٍ مَقَتُ بَنشِ فبَاتَ مَ.

¹⁶عَ نَشَ سّدِرِ وُرِ شٍبٍنيِيٍ مَقَتُ كٌنكٌي حْنفْن يَ مْشْحّن دَاشِ مَ بَنشِ كُي دُنشُي رَ، كٍلِقٍ عَ فبَاتَ مَ هَن قُفٍ. نَ نُ قِندِشِ يِرٍ سّنِيّنشِ قِسَمَنتٍ نَن نَ.

¹⁷بَنشِ ثَلَا دْنشْي نَشَن نُ نَ نَ يَتَفِ، نُ كُيَ حْنفْن يَ تٌنفٌ نَانِ. نَ نُ قِندِشِ يِرٍ سّنِيّنشِ نَن نَ.

¹⁸سّدِرِ وُرِ شٍبٍنيِيٍ نَشٍيٍ نُ قَتُشِ بَنشِ شَلّيٍ مَ ثَلَا مَ، سَنسِ بٌفِيٍ نُن سَنسِ قُفٍيٍ قَن نُ مَسٌلِشِ عٍ مَ. نَ كِ، فّمّ مُ نُ تٌمَ بَنشِ كُي مَ قٍقٍ مَ.

¹⁹سُلٍمَنِ نَشَ يِرٍ سّنِيّنشِ قِسَمَنتٍ يَءِلَن هْرْ مْبَنشِ كُي، عَلَتَلَ شَ سَاتّ كَنكِرَ دْشْمَ دّننَشّ.