1. Kraľengero 6:1-19

¹O Šalamun chudľa te ačhavel o Chramos le RAJESKE štar šel the ochtovardeš (480) berš pal oda, so o Izraeliti gele avri andral o Egipt, akor, sar kraľinelas andro Izrael imar štarto berš, andro dujto čhon Ziv.

²O Chramos, so ačhavelas o Šalamun le RAJESKE, sas 27 metri džinďardo, 9 metri buchlo the 13,5 metri učo.

³E veranda anglo Chramos sas 4,5 metri džinďarďi a sas buchľi 9 metri – ajci keci o Chramos.

⁴Andro Chramos diňa te kerel oblaki, so andral sas buchleder sar avral.

⁵Paš o avrune muri pašal o trin seri le chramoskere ačhaďa učo kher trine poschodenca a sas andre the aver khera.

⁶O teluno poschodos sas buchlo 2,2 metri, o dujto sas buchlo 2,7 metri the o upruno 3,1 metri. Pašal le chramoskero muros mukľa avri schodos pro dojekh poschodos a thovelas o hredi pre ola schodi, hoj te keren e podlaha.

⁷O bara sas imar pririchtimen andro lomos, a vašoda na šunďolas o čokana, o dlati, aňi ňisave trastune sersami, sar ačhavenas o Chramos.

⁸O vudar le telune poschodoskero sas pre južno sera le chramoskeri. Odarik pes džalas upre le garadičenca andro maškaruno the upruno poschodos.

⁹Sar dokerďa o Chramos, kerďa e strecha le hranolendar the le deskendar, so sas le cedrostar.

¹⁰O trin poschodi pašal o chramoskere muri sas dojekh uče 2,2 metri a sas spojimen le Chramoha le cedroskere hranolenca.

¹¹Akor o RAJ prevakerďa ko Šalamun:

¹²“Te džal pal oda Chramos, so ačhaves, te doľikereha savore mire zakoni the prikazaňja a te ľikereha tut pal mire lava, me doľikerava tuke miro lav, so phenďom tire dadeske le Davidoske.

¹³Bešava maškar o Izraeliti a me mire Izraelike manušen na omukava.”

¹⁴Kavke dokerďa o Šalamun e buči pro Chramos.

¹⁵O andrune fali sas obthode le cedroskere deskenca la phuvatar dži ko stropos a e phuv sas kerďi le sosnakere kaštestar.

¹⁶Kerďa prička le cedroskere kaštestar 9 metri le palune murostar andro Chramos a avke pal e prička sas o Neksentneder Than.

¹⁷O baro than anglo Neksentneder Than sas 18 metri džinďardo.

¹⁸O Chramos sas andral obthodo le cedroskere kašteha, so sas avrirandlo le prajtenca the le kvitkenca. Savoro obthode le cedroskere kašteha avke, hoj na dičholas ňisavo bar.

¹⁹Andro Chramos sas paluno than, kaj thoďa le RAJESKERI Zmluvakeri Archa.