ⲚⲒⲔⲞⲢⲒⲚⲐⲒⲞⲤ ̅Ⲁ 9

1

2

3

4

5

6

7

8

9

10

11

12

13

14

15

16

¹ⲘⲎ ⲀⲚⲄ ⲞⲨⲢⲘϨⲈ ⲀⲚ ⲘⲎ ⲀⲚⲄ ⲞⲨⲀⲠⲞⲤⲦⲞⲖⲞⲤ ⲀⲚ ⲘⲎ ⲘⲠⲒⲚⲀⲨ ⲈⲒⲎⲤⲞⲨⲤ ⲠⲈⲚϪⲞⲈⲒⲤ ⲘⲎ ⲚⲦⲰⲦⲚ ⲀⲚ ⲠⲈ ⲠⲀϨⲰⲂ ϨⲘ ⲠϪⲞⲈⲒⲤ.

²ⲈϢϪⲈ ⲀⲚⲄ ⲞⲨⲀⲠⲞⲤⲦⲞⲖⲞⲤ ⲀⲚ ⲚϨⲈⲚⲔⲞⲞⲨⲈ. ⲀⲖⲖⲀ ⲀⲚⲄ ⲞⲨⲀ ⲚⲎⲦⲚ. ⲦⲈⲤⲪⲢⲀⲄⲒⲤ ⲄⲀⲢ ⲚⲦⲀⲘⲚⲦⲀⲠⲞⲤⲦⲞⲖⲞⲤ ⲚⲦⲰⲦⲚ ⲠⲈ ϨⲘ ⲠϪⲞⲈⲒⲤ.

³ⲦⲀⲒ ⲦⲈ ⲦⲀⲀⲠⲞⲖⲞⲄⲒⲀ ⲚⲚⲈⲦⲀⲚⲀⲔⲢⲒⲚⲈ ⲘⲘⲞⲒ.

⁴ⲘⲎ ⲘⲚⲦⲀⲚ ⲦⲈⲜⲞⲨⲤⲒⲀ ⲚⲞⲨⲰⲘ ϨⲒ ⲤⲰ.

⁵ⲘⲎ ⲘⲚⲦⲀⲚ ⲦⲈⲜⲞⲨⲤⲒⲀ ⲈⲦⲢⲈⲨⲤⲰⲚⲈ ⲚⲤϨⲒ ⲘⲈ ⲞⲨⲀϨⲤ ⲚⲤⲰⲚ ⲚⲐⲈ ⲚⲚⲔⲈⲀⲠⲞⲤⲦⲞⲖⲞⲤ ⲘⲚ ⲚⲈⲤⲚⲎⲨ ⲘⲠϪⲞⲈⲒⲤ ⲀⲨⲰ ⲔⲎⲪⲀⲤ.

⁶ϪⲚ ⲘⲘⲞⲚ ⲀⲚⲞⲔ ⲘⲀⲨⲀⲀⲦ ⲘⲚ ⲂⲀⲢⲚⲀⲂⲀⲤ ⲘⲚⲦⲀⲚ ⲦⲈⲜⲞⲨⲤⲒⲀ ⲘⲘⲀⲨ ⲈⲦⲘⲢϨⲰⲂ.

⁷ⲚⲒⲘ ⲠⲈ ⲈϢⲀϤⲢⲘⲀⲦⲞⲒ ϨⲚ ⲚⲈϤⲞⲮⲰⲚⲒⲞⲚ ⲘⲘⲒⲚ ⲘⲘⲞϤ ⲈⲚⲈϨ. ⲚⲒⲘ ⲠⲈϢⲀϤⲦⲰϬⲈ ⲚⲞⲨⲘⲀ ⲚⲈⲖⲞⲞⲖⲈ ⲚϤⲦⲘⲞⲨⲰⲘ ⲘⲠⲈϤⲔⲀⲢⲠⲞⲤ. ⲚⲒⲘ ⲠⲈϢⲀϤⲘⲞⲞⲚⲈ ⲚⲞⲨⲞϨⲈ ⲚϤⲦⲘⲞⲨⲰⲘ ⲘⲠⲈϤⲈⲢⲰⲦⲈ.

⁸ⲘⲎ ⲔⲀⲦⲀ ⲢⲰⲘⲈ ⲈⲒϪⲰ ⲚⲚⲀⲒ. ⲎⲘⲈⲢⲈ ⲠⲔⲈⲚⲞⲘⲞⲤ ϪⲈ ⲚⲀⲒ.

⁹ϤⲤⲎϨ ⲄⲀⲢ ϨⲘ ⲠⲚⲞⲘⲞⲤ ⲘⲘⲰⲨⲤⲎⲤ ϪⲈ ⲚⲚⲈⲔϢⲂⲦ ⲞⲨⲘⲀⲤⲈ ⲈϤϨⲒ. ⲘⲎ ⲠⲢⲞⲞⲨϢ ⲘⲠⲚⲞⲨⲦⲈ ⲠⲈ ϨⲀⲚⲈϨⲞⲞⲨ

¹⁰ϪⲚ ⲈϤϪⲰ ⲘⲘⲞⲤ ⲈⲦⲂⲎⲎⲦⲚ. ⲚⲦⲀⲨⲤⲀϨϤ ⲄⲀⲢ ⲈⲦⲂⲎⲎⲦⲚ ϪⲈ ϢϢⲈ ⲈⲠⲈⲦⲤⲔⲀⲒ ⲈⲤⲔⲀⲒ ⲈϪⲚ ⲞⲨϨⲈⲖⲠⲒⲤ. ⲀⲨⲰ ⲠⲈⲦϨⲒ ⲈϪⲚ ⲞⲨϨⲈⲖⲠⲒⲤ ⲈⲦⲢⲈϤⲘⲈⲦⲈⲬⲈ.

¹¹ⲈϢϪⲈ ⲀⲚⲞⲚ ⲀⲚϪⲞ ⲚⲎⲦⲚ ⲚⲚⲈⲠⲚⲈⲨⲘⲀⲦⲒⲔⲞⲚ ⲞⲨⲚⲞϬ ⲠⲈ. ⲈϢϪⲈ ⲀⲚⲞⲚ ⲠⲈⲦⲚⲀⲰϨⲤ ⲚⲚⲈⲦⲚⲤⲀⲢⲔⲒⲔⲞⲚ.

¹²ⲈϢϪⲈ ⲞⲨⲚ ϨⲈⲚⲔⲞⲞⲨⲈ ⲘⲈⲦⲈⲬⲈ ⲈⲦⲈⲦⲚⲈⲜⲞⲨⲤⲒⲀ ⲚϨⲞⲨⲞ ϬⲈ ⲀⲚ ⲀⲚⲞⲚ ⲀⲖⲖⲀ ⲘⲠⲚⲬⲢⲰ ⲚⲦⲈⲈⲒⲈⲜⲞⲨⲤⲒⲀ ⲀⲖⲖⲀ ⲈⲚϤⲒ ϨⲀ ϨⲰⲂ ⲚⲒⲘ ϪⲈⲔⲀⲀⲤ ⲈⲚⲚⲈⲚϮ ⲚⲞⲨϪⲢⲞⲠ ⲘⲠⲈⲨⲀⲄⲄⲈⲖⲒⲞⲚ ⲘⲠⲈⲬⲢⲒⲤⲦⲞⲤ.

¹³ⲚⲦⲈⲦⲚ ⲤⲞⲞⲨⲚ ⲀⲚ ϪⲈ ⲚⲈⲦⲢϨⲰⲂ ⲈⲚⲈⲢⲠⲎⲨⲈ ⲈⲨⲞⲨⲰⲘ ⲈⲂⲞⲖ ϨⲚ ⲚⲀ ⲠⲢⲠⲈ. ⲚⲈⲦⲤⲢⲞϤⲦ ⲈⲠⲈⲐⲨⲤⲒⲀⲤⲦⲎⲢⲒⲞⲚ ⲈϢⲀⲨⲠⲰϢ ⲈϪⲰⲞⲨ ⲘⲚ ⲠⲈⲐⲨⲤⲒⲀⲤⲦⲎⲢⲒⲞⲚ.

¹⁴ⲦⲀⲒ ⲦⲈ ⲐⲈ ⲈⲚⲦⲀ ⲠϪⲞⲈⲒⲤ ⲦⲞϢⲤ ⲚⲚⲈⲦⲦⲀϢⲈⲞⲈⲒϢ ⲘⲠⲈⲨⲀⲄⲄⲈⲖⲒⲞⲚ ⲈⲰⲚϨ ⲈⲂⲞⲖ ⲘⲠⲈⲨⲀⲄⲄⲈⲖⲒⲞⲚ.

¹⁵ⲀⲚⲞⲔ ⲆⲈ ⲘⲠⲒⲬⲢⲰ ⲚⲖⲀⲀⲨ ⲚⲚⲀⲒ. ⲚⲦⲀⲒ ⲤⲈϨⲚⲀⲒ ⲆⲈ ⲀⲚ ϪⲈ ⲈⲨⲈϢⲰⲠⲈ ⲚⲦⲈⲈⲒϨⲈ ⲚϨⲎⲦ. ⲚⲀⲚⲞⲨⲤ ⲄⲀⲢ ⲚⲀⲒ ⲈⲦⲢⲀⲘⲞⲨ ⲈϨⲞⲨⲈ ⲠⲀϢⲞⲨϢⲞⲨ ⲈⲦⲈ ⲘⲚ ⲖⲀⲀⲨ ⲚⲀϢⲦⲢⲈϤϢⲰⲠⲈ ⲈϤϢⲞⲨⲈⲒⲦ.

¹⁶ⲈⲒϢⲀⲚⲈⲨⲀⲄⲄⲈⲖⲒⲌⲈ ⲄⲀⲢ ⲚⲞⲨϢⲞⲨϢⲞⲨ ⲚⲀⲒ ⲀⲚ ⲠⲈ. ⲞⲨϨⲦⲞⲢ ⲄⲀⲢ ⲈⲢⲞⲒ ⲠⲈ ⲞⲨⲞⲒ ⲄⲀⲢ ⲚⲀⲒ ⲠⲈ ⲈⲒϢⲀⲚⲦⲘⲈⲨⲀⲄⲄⲈⲖⲒⲌⲈ.

¹⁷ⲈϢϪⲈ ⲈϨⲚⲀⲒ ⲆⲈ ⲈⲒⲈⲒⲢⲈ ⲘⲠⲀⲒ ⲞⲨⲚⲦⲀⲒ ⲘⲘⲀⲨ ⲚⲞⲨⲂⲈⲔⲈ. ⲈϢϪⲈ ⲚϨⲚⲀⲒ ⲆⲈ ⲀⲚ ⲈⲒⲈ ⲚⲦⲀⲨⲦⲀⲚϨⲞⲨⲦ ⲈⲨⲞⲒⲔⲞⲚⲞⲘⲒⲀ.

¹⁸ⲀϢ ϬⲈ ⲠⲈ ⲠⲀⲂⲈⲔⲈ ϪⲈⲔⲀⲀⲤ ⲠⲈ ⲈⲒⲈⲨⲀⲄⲄⲈⲖⲒⲌⲈ ⲦⲀⲔⲀ ⲠⲈⲨⲀⲄⲄⲈⲖⲒⲞⲚ ⲚⲞⲨⲈϢ ⲚϪⲞ ⲈⲂⲞⲖ ⲈⲢⲞϤ ⲈⲦⲘⲦⲢⲀⲈⲒⲢⲈ ⲘⲠⲀϨⲦⲞⲢ ϨⲘ ⲠⲈⲨⲀⲄⲄⲈⲖⲒⲞⲚ.

¹⁹ⲈⲒⲞ ⲄⲀⲢ ⲚⲢⲘϨⲈ ϨⲚ ϨⲰⲂ ⲚⲒⲘ ⲀⲒⲀⲀⲦ ⲚϨⲘϨⲀⲖ ⲚⲞⲨⲞⲚ ⲚⲒⲘ ϪⲈ ⲈⲒⲈϮϨⲎⲨ ⲘⲠⲈϨⲞⲨⲞ.

²⁰ⲀⲒϢⲰⲠⲈ ⲚⲚⲒⲞⲨⲆⲀⲒ ϨⲰⲤ ⲒⲞⲨⲆⲀⲒ ϪⲈ ⲈⲒⲈϮϨⲎⲨ ⲚⲚⲒⲞⲨⲆⲀⲒ. ⲀⲒϢⲰⲠⲈ ⲚⲚⲈⲦϨⲀ ⲠⲚⲞⲘⲞⲤ ϨⲰⲤ ⲈⲒϨⲀ ⲠⲚⲞⲘⲞⲤ ⲈⲚϮϢⲞⲞⲠ ⲀⲚ ⲀⲚⲞⲔ ϨⲀ ⲠⲚⲞⲘⲞⲤ ϪⲈ ⲈⲒⲈϮϨⲎⲨ ⲚⲚⲈⲦϨⲀ ⲠⲚⲞⲘⲞⲤ.

²¹ⲀⲒϢⲰⲠⲈ ⲚⲚⲀⲚⲞⲘⲞⲤ ϨⲰⲤ ⲀⲚⲞⲘⲞⲤ ⲈⲀⲚⲄ ⲞⲨⲀⲚⲞⲘⲞⲤ ⲀⲚ ⲘⲠⲚⲞⲨⲦⲈ. ⲀⲖⲖⲀ ⲈⲀⲚⲄ ⲞⲨⲈⲚⲚⲞⲘⲞⲤ ⲘⲠⲈⲬⲢⲒⲤⲦⲞⲤ ϪⲈ ⲈⲒⲈϮϨⲎⲨ ⲚⲚⲀⲚⲞⲘⲞⲤ.

²²ⲀⲒϢⲰⲠⲈ ⲚⲚϬⲰⲂ ϨⲰⲤ ϬⲰⲂ ϪⲈ ⲈⲒⲈϮϨⲎⲨ ⲚⲚϬⲰⲂ. ⲀⲒⲢⲤⲘⲞⲦ ⲚⲒⲘ ⲘⲚ ⲞⲨⲞⲚ ⲚⲒⲘ ϪⲈⲔⲀⲀⲤ ⲠⲀⲚⲦⲰⲤ ⲈⲒⲈⲦⲞⲨϪⲈϨⲞⲒⲚⲈ.

²³ⲈⲈⲒⲈⲒⲢⲈ ⲆⲈ ⲚⲚⲀⲒ ⲦⲎⲢⲞⲨ ⲈⲦⲂⲈ ⲠⲈⲨⲀⲄⲄⲈⲖⲒⲞⲚ ϪⲈ ⲈⲒⲈϢⲰⲠⲈ ⲚⲀϤ ⲚⲔⲞⲒⲚⲰⲚⲞⲤ.

²⁴ⲚⲦⲈⲦⲚⲤⲞⲞⲨⲚ ⲀⲚ ϪⲈ ⲚⲈⲦⲠⲎⲦ ϨⲘ ⲠⲈⲤⲦⲀⲆⲒⲞⲚ ⲤⲈⲠⲎⲦ ⲘⲈⲚ ⲦⲎⲢⲞⲨ ⲞⲨⲀ ⲆⲈ ⲠⲈϢⲀϤϪⲒ ⲠⲈⲔⲖⲞⲘ ⲠⲰⲦ ⲚⲦⲈⲒϨⲈ ϪⲈ ⲈⲦⲈⲦⲚⲈⲦⲀϨⲞ.

²⁵ⲞⲨⲞⲚ ⲆⲈ ⲚⲒⲘ ⲈⲦⲀⲄⲰⲚⲒⲌⲈ ϢⲀϤⲈⲄⲔⲢⲀⲦⲈⲨⲈ ⲘⲘⲞϤ ⲈϨⲰⲂ ⲚⲒⲘ ⲚⲎ ⲘⲈⲚ ϪⲈ ⲈⲨⲈϪⲒ ⲚⲞⲨⲔⲖⲞⲘ ⲈϢⲀϤⲦⲀⲔⲞ. ⲀⲚⲞⲚ ⲆⲈ ⲚⲞⲨⲀⲦⲦⲀⲔⲞ.

²⁶ⲀⲚⲞⲔ ϬⲈ ⲈⲒⲠⲎⲦ ⲚⲦⲈⲒϨⲈ ϨⲰⲤ ϨⲚ ⲞⲨϨⲰⲠ ⲀⲚ. ⲈⲒⲠⲨⲔⲦⲈⲨⲈ ⲚⲦⲈⲒϨⲈ ϨⲰⲤ ⲈⲚⲈⲈⲒϨⲒⲞⲨⲈ ⲀⲚ ⲈⲠⲀⲎⲢ.

²⁷ⲀⲖⲖⲀ ϮⲰϤⲈ ⲘⲠⲀⲤⲰⲘⲀ ϮⲈⲒⲢⲈ ⲘⲘⲞϤ ⲚϨⲘϨⲀⲖ. ⲘⲎⲠⲰⲤ ⲈⲒⲦⲀϢⲈⲞⲈⲒϢ ⲚϨⲈⲚⲔⲞⲞⲨⲈ ⲦⲀϢⲰⲠⲈ ⲀⲚⲞⲔ ⲚϪⲞⲞⲨⲦ.