Korinti I 9

1

2

3

4

5

6

7

8

9

10

11

12

13

14

15

16

¹No niŋgiŋhec juekopac me? No aposolo aricne me? No Wofuŋ‐nâŋec Jesu mi honepo me? Gie‐nanere fârine Wofuŋte jambuŋko fuakicne i ŋoŋe mi eŋgopieŋ me?

²No gâcne jaŋere aposolo mi mecne juekopac, â ŋoŋere ine jâmbomac juekopac. Aposolo gie‐nanere ma Wofuŋte jambuŋko fuakicne i ŋoŋe hâcne.

³Fuŋne‐nanere mueŋgopieŋ jaŋe ine dâŋ ʒiŋuc bâtikie‐jarekopac.

⁴Gâcne nâŋe ŋoŋeraonec nânâ opâ mi ronaŋte muac‐nâpokicne me?

⁵Aposolo tucne â Wofuŋte ɋafâc â Petoro jaŋe ŋonâŋfâc‐jeŋic jaŋehec miti kiŋaŋ raeŋgopieŋ, ehame gâcne nâŋe sâc ijaha enaŋte mi mana‐nârekicne me?

⁶Me no â Banaba nâhe sawa mezi gie bapa behenacte mi mana‐nâctekicne me?

⁷Me mo momori ŋiczi ʒikare wiac e jahacne moneŋzi furine baocmu? Me mozi gie he sarac eme fârine fuame mi ro nâc eocmu? Me mozi noniŋ bulimakao gie bahuc jaŋere susu ba nâc mi eocmu?

⁸Ʒi ŋicdâŋ sawa mukopac me? Sâcmutâc dâŋzi ijaha mi mufuakac me?

⁹Mosere sâcmutâc dâŋ moc ʒiŋuc qâreŋkekicne fokac: “Bulimakaozi gie bagarehuc sopâc kecɋaŋ nâzo mume mi sakarecnezemec.” Eme Anutuzi dâŋ i bulimakao jaŋere sawa manasuhuc muwec me?

¹⁰Ŋic nâŋâcne mâmâc mi muwec me? I nâŋâcne hâcne mukicne. Gie he rikec eekaczi mâc mi eekac, fârine fuame nâocte manasuhuc eekac, â sara mamac eekac e iŋuc jaha fârine fuacneocte manasuhuc eekac.

¹¹Nâŋe ŋoŋerao maŋte wiac sara mamac embeŋko okacne ŋoŋeraonec sahacte wiac ronaŋte manapie ŋemâckekac me?

¹²Gâcne jaŋe ŋoŋeraonec nânâ mafa rohapie nâŋe gie fuŋkembeŋzi rorone mi fokac me? Erâ ine Kristo Biŋebiaŋ‐ticne aka hecnenʒipeŋte ŋoŋeraonec nânâ mafa rorore mukicne i qikiŋnehuc mâc hume serereŋ jueŋgopeneŋ.

¹³Taha ufuŋko gie baeŋgopieŋ jaŋe taha ufuŋkonec nânâ nâeŋgopieŋ, â alatao bâzi ririke gie baeŋgopieŋ jaŋe alatare wiac nâ bac eeŋgopieŋ, i ŋoŋe mi manaeŋgopieŋ me?

¹⁴Eme Wofuŋ e Biŋebiaŋ mumu ŋic nâŋe iŋuc jaha Biŋebiaŋzi sahacte dope wiac kifua‐nâreocte muwec.

¹⁵No ine hata i mi âteekopac. Erâ ŋoŋe irec sâcko enareniŋte manasuhuc mi qâreŋkekopac, aricne. Hâmoczi rocnuzac irec manape afeckezac, â ʒeridâŋ‐nane i babawaha‐nare irec ine manape ŋic moczi mi enare‐jâmbâŋkezejec ekac.

¹⁶Biŋebiaŋ muromackeekopac irec mumumbiaŋ dâŋ mupe wemocko sâckeocmu, gie i hâcne nore faio râekicne i! Eme hetarepe, jei, Wofuŋzi weniŋuc enareocmu!

¹⁷Gie i no nahacne maŋte fuarâ bazapo muzac juku furine rozapo. Nahacne maŋte mi ropore ʒiŋuc ekac: Micne gie fai‐naneo fewec.

¹⁸Hâc, eme wemo furi roekopac? Furine ʒiŋuc: No miti kiŋaŋ rahuc ŋic Biŋebiaŋ furimâc jazaekopac, ehuc Biŋebiaŋ mumure furi sahackopec wiac rorore mukicne i qikiŋneekopac.

¹⁹No ŋic sasawa jaŋere kiŋaŋ qaqa mi jukopaczi sifu kiŋaŋ qaqa‐jeŋic epo jukopac. I ŋic bocjahazi miti manarâ biaŋkeniŋte manasuhuc epo hâcne.

²⁰Judaŋic jaŋerao juhuc Judaŋic hawari epo, i Judaŋiczi biaŋkeniŋte. Sâcmutâc dâŋte kiŋaŋ qaeŋgopieŋ jaŋerao juhuc sâcmutâc dâŋte kiŋaŋne qaeŋgopieŋzi biaŋkeniŋte epo.

²¹Qâpuc sâcmutâc dâŋ tâmiric jaŋerao juhuc sâcmutâc dâŋ tâmiric hawari epo, i Anuture maio sâcmutâc dâŋ tâmiric juhuc mâcne, no Kristore sâcmutâc dâŋ bajuekopac, erâ qâpuc jaŋe biaŋkeniŋte iŋuc epo.

²²Ŋic dodocne jaŋerao juhuc dodocne hawari epo, i dodocnezi biaŋkeniŋte epo. Ŋic fuŋne jaŋerao juhuc hawari fuŋne fuŋne epo, i gâcnezi sipirickehapie sifu gâcnezi biaŋkeniŋte.

²³Wiac sasawa i mâc mâcne, Biŋebiaŋzi fua raocte eekopac, erâ no nahac wâc irec kâdoc ropemurâ eekopac.

²⁴Ŋoŋe kecʒiŋuc mi manaŋgopieŋ me? Sâsâc eere hofao ira motec jaŋe gagasa i mâmâc gasacke‐fâreniŋmu, â eri roro ine mocsâkoazi mao bâbâni fisirâ roocmu. Eme ŋoŋe iŋuc jaha eri‐ŋeŋic roniŋte gasackenʒepieŋ.

²⁵Motec jaŋe sasanaŋte sâsâc ehuc sowa fuŋne jueŋgopieŋ, jaŋe eri sisirowenere iŋuc eeŋgopieŋ, nâŋâc ine eri fofo sanaŋte iŋuc enʒepeneŋ.

²⁶No nahac wâc gasackeekopac, i ma hone dendeŋnehuc gasackeekopac. No sându‐nane sawao kosa mi wickeekopac.

²⁷No ŋic miti muromacke‐jarehuc juku nahacne rârâricne ezipore sahac‐nane ro waha âte ecnehuc ŋicbomboŋ‐ticne juekopac.