Text copied!
CopyCompare
Buk Baibel long tokples Kandas - 1 Korin

1 Korin 9

Help us?
Click on verse(s) to share them!
1A sa langolango. Iau a aposel. A tama tari ut o Iesu anundat a Labino. Anumot a nilaun tomo nama Labino, i a wino tagun anung a pinapam.
2Sako ara taro det nuki lena awu sur iau a aposel, ikut torom mot, i lingmulus lena iau a aposel. Uni anumot a nilaun tomo nama Labino i ulingmulusi.
3Ra a taro det takun iau una nung a pinapam, a balu det lenri:
4Ra mir nam o Banabas mir papam epotor tamot, i tokodos ut sur mot in tabor mir sur mir in nangon ma mir in inum.
5A kum aposel, ma a kum tistisin a Labino, ma o Pita det ser ben tuptupukus anundet a kum ino ra det nurnur. I tokodos ut sur mir nam o Banabas kai mir in pami lenra.
6Ke tokodos sur mir kut, mir in papam nama lamamir sur a mani ra mir in laun nami.
7Osi na tene inaim ra i ut in kul pas a kum utna ra i sibo suri? Osi ra in marut a kinobot na wain ma ken nan pas lako wino gusuni? Osi ra in tamtamabat a kum sipsip ma ken inum pas lako polo na sus tagun det?
8A wasiso ri a watungi, awu sur tagun a nuknukin a taro, awu. A kum Warkurai anun o Moses kai i watungi lenri,
9“Gong u ker bat a wan a karabau ra i pas rumrum a wit, i kai in nangon ut.” Pepetlai, o God i ngara kut sur a kum karabau? Awu.
10O God i watungi lenri sur dat. A lingmulus sakit, a wasiso ri di sa tumus tari sur dat ut, uni i tokodos ra osi ra i marmarut, ma osi ra i lakro susuaro a pinino wit gusun a wit mulus, der in kis langlang nama nurnur sur lako wino.
11Met sa marut tar a wasiso na nion epotor tamot. I tokodos sur mot in tabor met nam lako utna sur met in laun nami.
12I tokodos sur a taro gisen det in los pas a warut ri gusun mot, ma i tokodos sakit sur met kai met in losi gusun mot. Ikut ka met ungongos pas mot sur anumot tu warut. Met taramo a susut na mamaut, ikut ka met saring mot sur tu warut, sur gong met turbat a Wakak na Wasiso anun o Karisito.
13Mot tasmani lena det ra det papam una rumu na etabor, det ser wangon tagun a rumu na etabor. Ma det kai ra det tuntun a kum etabor una kabulu na tuntun etabor, det ser wangon ut tagun a utna ra det tuni.
14Lenkutkai ra, a Labino i warkurai tari lena, det ra det warawai nama Wakak na Wasiso, det in los a ikul tagun a Wakak na Wasiso sur det in laun nami.
15Ikut, iau ut ka los pas tu utna tagun a kum utna ri, ma ka tumtumus sur an los tu utna, awu. A gas doko ra a warawai torom mot ma ka los tu ikul uni. A minat a utna oros kut torom iau, ikut anung a gasgas ri i labo doko torom iau, ma ka nemi sur taio in rakon ru i gusun iau.
16Ra a warawai nama Wakak na Wasiso, ka ulabo pas iau nami, awu. Uni o God i sa pitar tar a pinapam na warawai tang, ma kan pet lar pasi sur an mana gusuni. Ma in laulau doko torom iau ra kan warawai nama Wakak na Wasiso.
17Ra iau ut a nemi sur an warawai, an losi ut anung tu ikul. Ikut, ra awu sur anung tu nemnem suri, an pami kut a pinapam ra o God i sa pitar tari tang.
18Asau ra anung a ikul? Anung a ikul i lenri: An gas sur an warawai nama Wakak na Wasiso, ma kataio in kul iau. A pami lenra sur gong a saring mot sur anumot tu warut ra i tokodos sur mot in pitari torom iau.

19A lingmulus a sa langolango, ma ka papam na karabus torom taio. Ikut a pitar tar iau sur an tene ititula torom a taro rop, sur an ben lako susut na taro torom o Karisito.
20Ra a kis tomo nama taro Juda, a muri ut a ngas na nilaun anun a taro Juda, sur an ben pukus pas det torom o Karisito. Ka kis utuntudu ina Warkurai anun o Moses. Ikut, ra a kis tomo nama taro ra det kis utuntudu ina Warkurai anun o Moses, a pitar tar iau sur an kis utuntudu ina Warkurai ra, sur an ben pukus pas det torom o Karisito.
21Ra a kis tomo nama taro ra ka det kis utuntudu ina Warkurai anun o Moses, iau kai ka kis utuntudu ina kum Warkurai ra, sur an ben pukus pas det torom o Karisito. Ikut, awu sur a rosumur una Warkurai anun o God, awu. A kis utuntudu ina Warkurai anun o Karisito.
22Ra a kis tomo nama taro ra ka det dekdek, iau kai ka dekdek, sur an ben pukus pas det torom o Karisito. A elaro iau sur an elar nama kum ngas na taro rop, ma a mur a kum ngas na kisapi rop sur an ulaun lako taro.
23A kum utna ri a pami sur a Wakak na Wasiso in lubung, sur in udan iau tomo nam det.
24Det rop ra det ililu una kinalabor det kalabor, ikut ara kut tagun det in los a ikul. Pepetlai, ka mot tasman a utna ri? Mot kai mot in dekdek una kinalabor sur mot in los a ikul.
25A taro rop ra det ser wapap, det ulason dekdek a pinindet. Det pami sur det in los pas a ikul ra in rop kut. Ikut dat, dat ulason dat sur dat in los pas a ikul ra ken rop.
26I mo ra, ka kalabor tuptupukus, awu, a kalabor tokodos sur a tuktukino. Ka itubul elar nama musano ra i tubuli kut a maino.
27A tumtubul a pining sur in mur wakak anung a nemnem. A pami lenri, sako a sa warawai taru nama Wakak na Wasiso torom a taro gisen, ikut iau ut, o God in ipul ru iau, ma kan los tu ikul.