1Či na som slobodno manuš? Či na som apoštolos? Či na dikhľom le Ježiš, amare Rajes? Či na san tumen o ovocje mira bučakero andro Raj?
2Te na som apoštolos avrenge, no tumenge som. Se tumen san oda, so sikavel pre ma, hoj som apoštolos andro Raj.
3Sar man o manuša sudzinen, me lenge phenav kada:
4Či nane man pravos, hoj man te den o chaben the o pijiben vaš miri buči?
5Či našťi peha las pačabnaskera džuvľa avke, sar keren the okla apoštola the o phrala le Rajeskere a the o Peter?
6Abo so, ča me the o Barnabaš mušinas te kerel buči, hoj te el amen so te chal?
7Savo slugaďis peske korkoro počinel sa peskere lovendar? Ko sadzinel e viňica a na chal olestar, so upre barol? Abo ko pes starinel pal o bakre a na lel ole thudestar, so den o bakre?
8Phenav oda ča sar manuš? Či na phenel oda the o zakonos?
9Bo andro zakonos le Mojžišoskero hin pisimen: “Na phandeha o piskos la gurumňake, savi kerel buči, hoj te na chal.” Či pes o Del starinel ča pal o gurumňa?
10Či oda na vakerel amenge? Se prekal amende sas pisimen: “Oda, ko orinel e phuv, a the oda, ko marel avri o žužoďiv (o zrnos), mi kerel peskeri buči andro užaripen (naďej), hoj olestar chudela peskero kotor.”
11Amen maškar tumende sadzinahas oda duchovno. Avke nane amen pravos te lel tumendar o veci, so kampel le ťeloske sar žatva?
12Te aver džene tumendar oda šaj len, ta akor amen na? Ale amen na ačhahas vaš oda pravos. Savoro zľidžas vaš oda, hoj te na zaačhavas o evaňjelium le Kristoskero.
13So na džanen, hoj ola, save služinen andro chramos, chan o chaben andral o chramos a ola, save keren buči paš o oltaris, šaj peske len kotor le obetendar?
14Avke the o Raj prikazinďa, hoj ole, save o evaňjelium kazinen, te dživen le evaňjeliostar.
15Ale me na kerďom ňič olestar. Aňi kada na pisinďom vaš oda, hoj oda pes avke te kerel paš mande. Bo feder mange uľahas te merel, sar oda, hoj mange vareko te musarel kada miro lašariben.
16Bo sar vakerav o evaňjelium, nane man soha pes te lašarel, bo mušinav oda te kerel, ale vigos mange uľahas, te les na vakerďomas.
17Te oda kerav ča vaš oda, hoj kamav, chudav vaš oda počiňiben. Ale me mange našťi kidav avri, bo o Del mange diňa kadi sentňi služba.
18So hin miro počiňiben? Me na lav ňisave love vaš oda, hoj vakerav o evaňjelium le Kristoskero. Choc te mange oda ola bučatar patrinel, me oda na lav, choc šaj iľomas.
19Me som slobodno manuš a na som ňikaske otrokos, ale me mandar kerďom sakoneskero otrokos, hoj te dochudav so mek buter manušen.
20Prekal o Židi ačhiľom sar Židos, hoj te dochudav le Židen. Prekal ola, save hine tel o zakonos, ačhiľom, sar te uľomas the me tel o zakonos – choc na som tel o zakonos – hoj te dochudav olen, save hine tel o zakonos.
21Prekal ola, save hine bi o zakonos, ačhiľom sar te bi o zakonos – choc na som bi o zakonos le Devleskero, ale som tel o zakonos le Kristoskero – hoj te dochudav olen, save hine bi o zakonos.
22Prekal o slaba ačhiľom slabo, hoj te dochudav le slaben. Prekal savorende ačhiľom savoro, hoj te zachraňinav hojča varesaven.
23Savoro kerav prekal o evaňjelium, hoj man andro evaňjelium te el miro kotor.
24Se džanen, hoj but džene denašen pro preťeki, ale ča jekh lendar chudela e cena. Vašoda denašen avke, hoj la te dochuden.
25Dojekh preťekaris pes mušinel te zľikerel savorestar. On oda keren vašoda, bo kamen te chudel e koruna, so našľola, ale amen chudaha ajsi, so ačhela pro furt.
26Vašoda me denašav rovnones, hoj te dodžav andro cieľos, a demav avke, hoj te trafinav, a na ča avke andro luftos.
27Marav man mire ťeloha avke, hoj man te šunel, bo našťi avrenge pal oda kazinav, te me korkoro na dochudav e cena.
