Jemesa 4

1

2

3

4

5

¹Nyakama pyao pingipi atete pingipi dupa aipa petala sakatengepe? Nyakama tangenya auu kaenge dupame nyakamanya yongenya atete pilyamino doko sakatenge daape.

²Nyakamame opale mende nyimua laka lao masipimino doko nanyepala endakali pyao kumasilyamino. Nyakamame putiti kayapala nyepenge nanjipumosa atete pyoo pyao pilyamino. Nyakama Goteme dina lao tee nalelyamino tenge ongonya nyakama daa joo kalyamino.

³Dee nyakama Goteme dina lao kopeta tee lelyamino dokonya nyakamame nanyilyamino. Nyakamame ditamo dupa nyepala nyakama tangenya auu kaenge dupanya nepamana lao masipiminosa nanyilyamino.

⁴Nyakama kepo kolenge endakali jepae dupame isa yuu dake mona setenge doko Gotenya yandapipi jilyamona lao masala naelyamipi? Dopana isa yuu dake mona setapu laka lao masingi endakali dokome Gote yandapipi joo kalyamo.

⁵Pii pepa pyapae singi dokonya tenge napalengena lao masilyamipi? Tenge dokome naimanya imambu Goteme palyekeamo doko baa tange auu kaelyona lao tenge palenge.

⁶Dopaka doko, Goteme naima kandao etete epao mona epe palenge. Dopa pingi dokonya Gotenya pii dokome lao pituu, “Namba alysale joo kalyona lao masingi endakali dupanya kaitini doko Goteme lyokata lyokata pingi. Namba anasale joo kalyona lao masingi endakali dupa kandao baame mona epe palengena,” lapae silyamo.

⁷Dopana nyakama Gotenya pundipundi kalyepape. Nyakamame Satane daa latala tuu pyoo kalyepape. Dokopa baame nyakama yakinatala pata.

⁸Nyakama Gote tengesa pupape. Dopa pitaminopa baa nyakama tengesa ipata. Nyakama koo pingi endakali dupame nyakamanya kingi dupa kaimbu pyalapape. Nyakama mona lapoma palenge dupame monanya kaimala nepalapape.

⁹Nyakamame mona kenda kayao ee lao yako laapape. Nyakamanya gii kaenge doko ee lenge jina laapape. Nyakamanya mona yaepenge doko mona kenda kaenge jina laapape.

¹⁰Nyakama Kamongonya enomba dokonya anasale joo kalyepape. Dopa pitaminopa baame nyakama alysale joo kalyepa lata.

¹¹Kaimia paluma, nyakamame pii koome endakali mende lao koyasa koyasa napyepape. Endakali mendeme endakali yango mende kandao pii koome lao koyasoo dee baa kandao emba koo lamona lelyamo dokome mana setapae dupa kandao pii koome lao koyasoo koo lamona lelyamo. Mana setapae dupa kandao embame koo lamona lateno kandao doko, mana setapae dupame lelyamoli pingi endakali joo kalya naenya, embame mana setapae dupa yapenge endakali joo katate.

¹²Mana setapae dupa ditala pii tolao yapenge doko mendai iki kalyamo. Dokomeaka endakali dupa kapa pao pyoo nyepa koyaseta pingi. Dopana, endakali yango mende kandao emba koo lamona leeno doko emba api joo kalyepe?

¹³Nyakama endakali yangimi lao pituu, “Indupa tamopi taita tamopi naimame taono dakenyapi damanyapi pupala ee kana mendai pisanisa kalai petala muni nyetamana,” lelyamino endakali dupa kandao nambame dapa langilyo: nyakama taita aipa pyoo katatamape lao masala naelyamino. Yuu popo sakatenge dopale joo kalyamino. Yuu popo doko gii kuki kandatelyaminopa dee alu pingi.

¹⁵Nyakamame dopa laa naenya, Goteme yakana lao masetamo kandao doko, nyakamame lete katao dake peta doko peta pyoo katatamana lapenge.

¹⁶Dopaka doko, nyakamame namba alyasale joo kalyona lao masetala luilyamino. Luingi pii lelyamino dopale dupa pitaka koo lamo.

¹⁷Dopana, epe pipenge mana dupa masepemba masetala angi napilyamo endakali dokome koo pilyamo.