ያዪቆባ ኪታ 4

1

2

3

4

5

¹ኦላይኔ ዋላሳይ ሂንቴ ጊዱዋ ሃቃፔ ዪ? ኡንቱንቱ ዬዳሳይ ሂንቴ ቦላ ጊዶን ኦሌቲያ ሂንቴ ናሼታናው ዎልቃማ ኣሙዋ ኣሞቲያዋፔ ጊዴኔ?

²ሂንቴ ኣሞቲታ፤ ሺን ዴሚኪታ፤ ዎꬊታ። ሎይꬂ ኮዪታ፤ ሺን ዴማናው ዳንዳዪኪታ፤ ዋላቄቲታኔ ኦሌቲታ። ሺን ፆሳ ዎሴና ዲራው፥ ሂንቴ ኮዪያዋ ዴሚኪታ።

³ፆሳ ዎሲታ፥ ሺን ዴሚኪታ፤ ጋሱካ ባላ ኦጊያን ዎሲታ። ሄዋ ሂንቴና ናሼቺያዋን ፔሻናው ኮዪያ ዲራሳ።

⁴ሲሚ ዎሹሚያዋንቶ፥ ሃ ኣላሚያና ዳቦቲያዌ ፆሳው ሞርኬ ጊዲያዋ ኤሪኪቴ? ኣዪሲ ጎፔ፥ ሃ ኣላሚያና ዳቦታናው ኮዪያዌ ኦኒኔ ፆሳና ሞርኬቴ።

⁵ዎይ ፆሳ ማፃፋይ፥ «ፆሳይ ኑናን ዎꬄዳ ኣያናይ ዎልቃማ ኣሙዋ ኑሲ ኣሞቴ» ጊያዋ ሂንቴንቶ ጮ ጊያዋ ማላቲ?

⁶ሺን ፆሳይ ኣꬎ ኬካቴꬃ ኣꬂዴ ኢሜ። ሄዋ ዲራው፥ ፆሳ ማፃፋይ፥ «ፆሳይ ኦቶሬቲያዋንታ ኢፄ፤ ሺን ባሬና ካዉሺያዋንቶ ኣꬎ ኬካቴꬃ ኢሜ» ያጌ።

⁷ሲሚ፥ ሂንቴ ፆሳው ሞዴቲቴ። ያቲዴ ፃላሂያና ኤቄቲቴ፤ ኢ ሂንቴፔ ባቃታና።

⁸ፆሳኮ ሺቂቴ፤ ኢካ ሂንቴኮ ሺቃና። ሂንቴኖ ናጋራንቻቶ፥ ሂንቴ ኩሺያ ሜጬቲቴ። ላዑ ቆፋይ ዴዒያዋንቶ፥ ሂንቴ ዎዛና ጌሺቴ።

⁹ቱጋቲቴ፤ ካዮቲቴኔ ዬኪቴ። ሂንቴ ሚቻ ዬኮ ላሚቴ፤ ሂንቴ ናሼቻካ ካዮ ላሚቴ።

¹⁰ጎዳ ሲንꬃን ሂንቴ ሁጲያ ቶቺቴ፤ ቃሲ ኢ ሂንቴና ꬎቁ ꬎቁ ኦꬃና።

¹¹ታናዳን ፆሳ ካሊያዋንቶ፥ ኢቱ ኢቱዋ ዚጊሮፒቴ። ባሬ ኢሻ ዚጊሪያዌኔ ኣ ቦላ ፒርዲያዌ ሂጊያ ዚጊሬኔ ሂጊያ ቦላ ፒርዴ። ኔኒ ሂጊያ ቦላ ፒርዶፔ፥ ሂጊያ ቦላ ፒርዲያዋ ጊዳሳፔ ኣቲን፥ ሂጌው ኣዛዜቲያዋ ጊዳካ።

¹²ሂጊያ ኢሚያዌኔ ፒርዲያዌ ፆሳ ፃላላ፤ ኢ ኣሻናዉኔ ꬋዪሳናው ዳንዳዬ፤ ሺን ኔ ሾሩዋ ቦላ ፒርዲያዌ ኔኒ ኦኔ?

¹³ሂንቴኖ፥ «ኑኒ ሃቼ ዎይ ዎንቲ ሄ ካታማ ባና፤ ሄዋን ላይꬃ ኡታና፤ ዛሊዓናኔ ቃሲ ሚሻ ዎꬊሳና» ጊያዋንቶ፥ ቤዒቴ።

¹⁴ዎንቲ ሂንቴ ዴዑ ኣያ ሃናኔንቶኔ ኤሪኪታ፤ ጉꬃ ዎዴው ሂንቴ ቤቲዴ፥ ጉዬፔ ꬋዪያ ፔኑዋ ማላ።

¹⁵ሄዋ ኣጊዴ፥ «ጎዳይ ጎፔ፥ ኑኒ ዴዓና፤ ሃዋ ዎይ ሄዋ ኦꬃና» ጋናው ቤሴ።

¹⁶ሺን ሂንቴ ሃዒ ሂንቴንቱ ꬎቃቴꬃን ጬቄቲታ፤ ሄዋ ማላ ጬቁ ኡባይ ኢታ።

¹⁷ሄዋ ዲራው፥ ሎዖባ ኦꬃናው ኤሪዴ ኦꬄና ኡራው ሄዌ ናጋራ።