Jems 4

1

2

3

4

5

¹Asau a kibino ra mot waim ma mot engaras etetalai? I kibino una numot a kum laulau na nemnem ra det waim una numot a nilaun.

²Mot nem a kum utna, ikut ka mot utur ukai i. Mot um doko a taro, ma mot nuknuk laulau sur a utna anundet, ikut ka mot pam ukai a utna ra mot nemi. Mot engaras ma mot waim. Ka mot pam ukai a kum utna ra mot nemi, uni ka mot saring o God suri.

³Ra mot wararing, ka mot utur ukai a utna ra mot sasaring suri, uni a nuknuki mot ke tokodos. Mot sasaring kut sur a utna ra in ugasgas mot ut.

⁴Mot sa wan gusun o God, elar nama ino ra i wan pas gusun anun a musano, ra i nolin tomo nama ara musano bulung. Ka mot tasmani lena, ra mot nem a petutna tagun a rakrakon bual, mot a kum ebar anun o God? Osi ra i pilok pas a rakrakon bual sur der pasano, i a ebar anun o God.

⁵Pepetlai, mot nuki lena a Buk Tabu i wasiso oros kut? I watungi lena, “A Nion o God, ra o God i pitar tari tandat, i nem dat sur dat anunu ut.”

⁶Ra a marmaris ra o God i pitar tari tandat i labo sakit. A Buk Tabu i watungi lenri, “O God i nget det ra det ser ulabo pas det, ikut i maris det ra det ser unatino pas det.”

⁷Mot in unatino pas mot, ma mot in mur o God. Mot in turbat ru o Satan, sur in nan gusun mot.

⁸Mot in nan milau o God, ra o God in nan milau mot. Ma mot a kum tene sakino, mot in gos a kum lamamot, ma mot ra aru nuknuki mot, mot in utalapor a balbala mot.

⁹Mot in tupunuk, mot in domos, ma mot in tangis una numot a kum sakino petutna. Mot in pukus anumot a ninongon sur a tinangis, ma mot in pukus anumot a gasgas sur a tupunuk.

¹⁰Mot in unatino pas mot umatan a Labino, ra in ulabo pas mot.

¹¹A kum tistising, gong mot mang etalai mot. Osi ra i mang tu tisino, o i kuro i, i watung laulau a Warkurai anun o God ma i kuro a Warkurai ra. Ma ra un kuro a Warkurai, awu sur u muri, u nuki kut lena ui ut u labo tauni.

¹²O God kut i pitar a Warkurai, ma i sot kut a Tene Warkurai. O God kut i topasi sur in warkurai a taro sur a nilaun, o sur a iniru. Ra ui osi, sur un warkurai o pasam?

¹³Mot longoro, mot ra mot ser watungi lena, “Uniri o markan met in nan sur tu tamon, ma met in kis iai ara kilalo. Met in kukul ma met in siuru sur met in pam pat lako mani.”

¹⁴Ikut ka mot tasman asau ra in nanpat torom mot markan. Anumot a nilaun i elar nama sau? Mot elar kut namin nawal, ra i wanpat pas kut, ma i rorom melet.

¹⁵Ikut, i wakak sur mot in watungi lenri, “Ra a Labino i nemi, met in laun ma met in pami lenri o lenra.”

¹⁶Ikut uniri, mot sa warango pas mot melet nam anumot a kum wasiso. A ngasino lenra ke wakak.

¹⁷O naro ra i tasman a wakakino sur in pami, ikut ke pami, i pam a sakino petutna.