Isɑku 4

1

2

3

4

5

¹Dimɑ̀ù nɛ̀ yɛkpɑ̀rɛ̀ dɛ̀ɛ̀ bo di cuokɛ̀, dɛ̀ bonní dɛ? Dɛ̀ bonní di mɔ́mmɔmbɛ borɛ̀ ndɛ, kɛ yɛ̃́ di dɔ́mɛ̀ dɛ̀mɑrɛ̀ pɛ́u dɛ̀ɛ̀ í wenni kɛ kpɑ nsɑ̃́ɑ̃̀.

²Di ɔ̃ ndɔ́ dɛ̀mɑrɛ̀ ndɛ kɛ mɔ́ntɛ́ kɛ́nkɔ̀ù ditɔbɛ̀. Kɛ ndɔ́ otɔù mɔ̀kɛ dɛ̀ kɛ mɔ́ntɛ́ kɛ́nkpɑ. Di ɔ̃ɔ̃ mɔ́ntɛ́ di í mɔɔ mɛ̀ɛ̀ kpɛ́í nkɛ Kuyie.

³Di mɔ́ú kɛ̀ kù í di pɑ̃ɑ̃ nkɛ yɛ̃́ di mɔ́únɛ̀ mɛ̀ɛ̀ yɛ̀mmɛ̀ í wennimɛ̀, di dɔ́ kɛ́ ndɛ̀ dɔ̀ɔ̀rinɛ̀ di dɔ́mɛ̀ mmɛ.

⁴Díndi bɛ̀ɛ̀ tũ̀ nyicɛ ìdɛ́yì di í yɛ̃́ kɛ dò nkɛ̀ di dɔ́ kutenkù di tú Kuyie ndootitɔbɛ̀ mbɛɑ̀?

⁵Di yɛ̀mmɛ̀ dò ntì sɔ̃̀ńtɛ́ kɛ wɑ̃̀rimu kɛ tú: Kuyie ndɔ́ kuù mɑ́ɑ̀ nte diwɛ̃nnì kù ɑ̃nnɛ́ dì onìtì miɛkɑɑ̀?

⁶Kù dɔ́ kɛ́ ti dɔɔ̀ mɛsɑ̀ɑ̀ mmɛ pɛ́u. Tì wɑ̃̀rimu kɛ tú: Kuyie ndɔ̀ɔ̀ri mɛsɑ̀ɑ̀ mbɛ̀ɛ̀ kɛ̃́kùnnɛ bɛmɑ́ɑ̀, kɛ yetírí sipɔɔ yɛmbɛ̀.

⁷Duɔ́nnɛ̀ dimɑ́ɑ̀ Kuyie nkɛ́bɑɑo dibɔɔ̀ kɛ̀ dìi cokɛ́ kɛ́dɛ́tɛ́.

⁸Tɔ́ɔ́nnɛ̀ dimɑ́ɑ̀ Kuyie nkɛ̀ kù di tɔ́ɔ́nnɛ̀. Díndi mɛyɛi nyɛmbɛ̀ wénkùnnɛ dimɑ́ɑ̀, díndi mɛyɛ̀mmɛ̀ mɛ̀dɛ́mɛ̀ yɛmbɛ̀ wénkùnnɛ di yɛ̀mmɛ̀.

⁹Bɑntɛ́nɛ̀ di sémmɛ̀ kɛ̀ di yɛ̀mmɛ̀ɛ cɑɑ̀rɛ̀, kɛ̀ di yóu mudɑɑ́ nnɛ̀ diwɛ̀ì kɛ́nkuɔ̀.

¹⁰Kɛ̃́kùnnɛ dimɑ́ɑ̀ Kuyie nyììkɛ̀ kɛ̀ kù di dɛ́úkùnnɛ.

¹¹N kɔbɛ di bɑ́ nnɑ́ɑntɛ ditɔbɛ̀ kpɛ́í nkɛ wɑ́tìrì ditɔbɛ̀, wèè nɑ̀ɑ́ nhotɔù kpɛ́í nkoò wɑ́tìrì ò wɑ́tìrì ikuɔ́ nyi, wèè mɛ nwɑ́tìrì ikuɔ́ wè ì yetɛ́nɛ̀mu.

¹²Kuyie nkuù mɑ́ɑ̀ ɑ̃nnɛ́ ikuɔ́, kɛ̀ kuù bekù, kɛ̀ kuù dɛ̀ì wèè nɑɑti nɛ̀ wèè sĩ̀. Fɔ̃́ nnɑ́kɛ ɑ tú we kɛ bekùnɛ̀ ɑ kou tɔù!

¹³N nɑ́ɑ́nnɛ̀ dímbɛ di mmɔ̀nnì díndi bɛ̀ɛ̀ tu: Yíe nyoo nɑnkɛ ti bo kɔtɛ di nhɛì kɛ́mmɔkɛ dibenni kɛ dɔɔri kupotɑɑ́ nkɛ pɛ́tɛ́ idíítí.

¹⁴Di í yɛ̃́ tìì nɑɑ yóó di tuɔkɛní, di dònnɛ̀ mupɑ̃̀ɑ̃ mmu mùù ɔ̃ɔ̃ yɛnní kɛ́pɛ̃ɛ̃tóo bɑ̀mbɑ̀.

¹⁵Di dò nkɛ níí nɑ nyĩ́: Kɛ̀ Kuyie ndɔ́ ti nfòù kɛ́dɔɔ̀ diɛ nyoo dɛtɛrɛ̀.

¹⁶Kɛ̀ di nɛ́ mɔkɛ tɛfentɛ̀ kɛ tɑ̃́ dimɑ́ɑ̀, Kuyie nyí dɔ́ dɛ kó tɛfentɛ̀ botí.

¹⁷Wèè yɛ̃́ mɛsɑ̀ɑ̀ nhò dò nkɛ́dɔɔ̀ mɛ̀, kɛ í mɛ̀ dɔ̀ɔ̀, ò dɔ̀ɔ̀ mɛyɛi mmɛ.