1“Nochi ipan ilhuicacti huan taltipacti ma quitacaquilica cati na niquijtos.
2Xijselica notamachtil quej anquiselíaj at quema taquiyahui. Quej ajhuechti nochi quitzacua huan pitzajat quixolonía xihuime huan sacat, san nocamanal xijmatica.
3Na nitayolmelahua itoca TOTECO. Niteilhuía quenicatza nelpano hueyi ihueyitilis Toteco Dios.
4Yaya cati techmanahuía. Nochi itequi eltoc cuali. Xitahuac nochi cati quichihua. Yaya nopa Toteco Dios cati temachti. Amo quema quichihua cati amo ijqui. Yaya quichihua cati melahuac huan xitahuac.
5Pero nopa israelitame amo quichijtoque cati cuali. Amo quinamiqui elise iconehua pampa motzontochonchijtoque ica ya.
6¿Quej nopa anquitaxtahuíaj TOTECO, anisraelitame? Antzontochontique huan anhuihuitique. ¿Amo yaya amotata cati amechtacatilti? Yaya amechchijtoc huan amechmacatoc nemilisti.
7Xiquelnamiquica nopa tonali cati huejcajquiya huan quenicatza panotihualajque amohuejcapan tatahua. Xiquintatzintoquili amotatahua huan nopa huehue tacame ma amechpohuilica.
8Oncac se tonali huejcajquiya quema Toteco Cati Más Hueyi quinmajmacac nochi xinach masehualme sesen tali campa itztosquíaj. Yaya quiquetzqui miyac nepamit campa hueli para tatajco ma onca talme ica inimasehualhua quej inimiyaca israelitame.
9Pampa tiisraelitame tiimasehualhua TOTECO. Tiiaxcahua cati yaya teipa quiselis quej se quiselía se tenijqui cati se tetaj quimacatehua icone.
10TOTECO techpanti tiisraelitame huan tohuejcapan tatahua ipan nopa huactoc tali, campa nopa ajacat quitzohuitectoc chicahuac huan campa amo teno onca. Techmanahui, huan techmachti huan techmocuitahui cuali quej elisquía tiiixteyol sital.
11Techchihuili quej se cuatojti moeltapalpapatatza ipan itepasol huan quinnotza ipilconehua para ma patanica. Huan quema quinita iconehua siyahuij patantinemij, quipatahua ieltapal para ieltapaltipa ma huetzica huan quinhuicas campa tepeixco hasta campa itepasol. Quej nopa techmocuitahuijtoc TOTECO.
12Yaya TOTECO iseli techyacantoc huan amo aqui más. Amo quipixqui yon se dios cati quipalehui.
13TOTECO quichijqui ma titatanica. Techtamacac tiisraelitame ica nopa cuatajcayot cati más cuali onca ipan mili. Ipan tepeixco quiquixti necti huan techmacac ma tijcuaca huan ipan sequinoc teme cati tetic techquixtili aceite.
14Techtamacac ica mantequilla huan lechi ten inintapiyalhua. Tijcuajque ininacayo nopa pilborregojtzitzi cati más yejyectzitzi. TOTECO techtamacac ica oquich borregojme huan oquich chivojme cati achi cuali cati oncayayaj ipan tali Basán. Techmacac nopa trigo cati más cuali, huan tiquique cati más cuajcualtzi xocomecat iayo.
15Pero tiisraelitame pejqui tineltacuaj, huan pejqui más timochihuaj tihuejhueyij hasta tahuel tielque titomahuaque. Huan tijtahuelcajque Toteco Dios cati techchijchijqui. Tijhuejcamajcajque nopa hueyi tet cati techmanahuijtoya, huan amo tijnejque yaya cati totemaquixtijca.
16Huan tiisraelitame tijpejpehualtijque huan tijcualanijque TOTECO Dios, pampa tiquinhueyichijque teteyome cati fierojtique.
17Tiisraelitame tiquinmactilijque tacajcahualisti ajacame ten Amocualtacat, quema titatencahuayayaj iniixpa nopa teteyome cati amo ya Toteco Dios, huan amo quema tiquinixmajtoyaj. Inijuanti eliyayaj teteyome cati yancuique, cati sanoc onajsicoj huan cati totatahua amo quintepanitayayaj.
18Israelitame, anquielcajtoque amoTata huan amoTamanahuijca. Anquielcajque Toteco Dios cati techmacatoc nemilisti.
19Huan TOTECO quiitac cati tijchihuayayaj huan tahuel cualanqui ica tojuanti. Tojuanti cati tiioquichpilhua huan tiisihuapilhua tijchihuilijque ma techcualancaita.
20Huan teipa TOTECO quiijto: ‘Na nojquiya nimoicancuepas ica inijuanti, huan niquitas hasta canque tamis inisisinijcayo. Nelnelía inijuanti amo cuajcualme. Itztoque quej coneme cati amo aqui huelis ininpa motemachis.
21Techchijque ma niquintasomati pampa quinhueyichijque teteyome huan taixcopincayome cati amo ya Toteco Dios. Techpejpehualtijque ica ininteteyohua. Huajca na nojquiya niquinchihuas ma techtasomatica pampa niquinpalehuis masehualme cati amo ya nomasehualhua. Huan niquinpejpehualtis nopa israelitame ica masehualme cati quinitaj para amo ininpati.
22Nocualancayo tejcos quej se tit, huan lemenis hasta ajsis campa más huejcata ipan micta. Quitamitatis nochi taltipacti huan itajca. Hasta campa pehua tepeme quitatis nopa tit.
23Nielis quej se cati quinmajcahuilis cuataminti, pampa nijtitanis ipan inijuanti nochi cati amo cuali.
24Cocoxcatiyase ica mayanti huan miquise ica tatotonilot. Se fiero cocolisti quintzontamiltis. Niquintitanilis tecuanime cati mosisiníaj huan cohuame cati tahuel pajyojque cati mohuahuatatzaj talchi.
25Ipan calles huetzise ininconehua mictoque ica macheta, huan ipan calijtic oncas majmati. Telpocame huan ichpocame miquise, huehuentzitzi huan coneme cati noja chichij nojquiya.
26Na niquijto para niquinsemanas huan niquintamiixpolos ipan taltipacti hasta amo aqui quinelnamiquis.
27Pero amo niquijyohuisquía quema techpaquitasquíaj nocualancaitacahua. Amo nijnequi ma mohueyimatica inijuanti cati techcualancaitaj huan quiijtose: Amo elqui ininDIOS cati quintamilti nopa israelitame. Tojuanti toseltitzitzi tijchijque ica tochicahualis.’ Quej nopa quiijtojtosquíaj amocualancaitacahua.
28Pero anisraelitame anquipolojtoque talnamiquilisti, huan anhuihuitique. ¡Amo teno anquimachilíaj!
29Sinta elisquía antamatini, huajca anquimachilisquíaj huan anquimatisquíaj canque antamitij.
30Pampa ¿quenicatza elqui para setzi amocualancaitaca huelqui amechquixti mil anisraelitame? Huan ¿quenicatza elqui para ica ome amechquixtijque 10 mil? Ya ni elqui pampa niamoTECO, cati niamotamanahuijca, nimechtemactili inimaco amocualancaitacahua.
31Inintamanahuijca amocualancaitacahua amo hueli quitanis totamanahuijca tojuanti.
32Pero anisraelitame anitztoque quej xocomeca tzonti cati amo cuali. Anitztoque quej masehualme ten altepeme Sodoma huan Gomorra huejcajquiya. Huan nopa xocomeca at cati anquiyoliltíaj quipiya ipajyo huan tahuel chichic.
33Amoxocomeca ayo eltoc quej inintencococa nopa cohuame cati temictíaj quej mahuaquijme.
34‘Nicajoctihuala miyac tamanti fiero para ica nimechtatzacuiltis. Quena, nicajoctoc tatzacuiltili quej elisquía miyac tomi.
35Nochi nicajoctoc para nopa tonali quema nimomacuepas huan nimechmacas anisraelitame. Pampa amo huejcahuas para ajsis nopa talojtzi quema anhuetzise. Ya eltoc nechca nopa tonali quema nimechtzontamiltis. Ya amechnechcahuía amohora.’
36TOTECO quistehuas huan quintajtolsencahuas imasehualhua quema quiitas ayecmo quipiyaj fuerza. TOTECO quintasojtas itequipanojcahua huan quinchihuas ma moyolcuepaca ica ya quema quiitas nochi quincajtejtoque huan amo aqui quinpalehuía.
37Huan TOTECO quinilhuis: ‘¿Canque itztoque amoteteyohua, nopa tamanahuiani cati ipan anmotemachiyayaj?
38¿Canque itztoque cati quicuayayaj ichiyajca amotacajcahualis, huan quiiyayaj nopa xocomecat iayo cati anquinmactiliyayaj? Ma motananaca para ma amechpalehuiquij. Ma hualaca huan ma amechmanahuiquij, pero amo hueli.
39San na niiyojtzi niDIOS, huan iyoca ten na amo aqui seyoc. Na nitemaca nemilisti huan nitequixtilía. Na nitecocohua huan na nitepajtía. ¡Amo aqui huelis momanahuis ten na nomaco!
40Nijtanana nomax para ilhuicac huan nitatestigojquetza. Niquijtohua: Nelía melahuac,
41huan temachti nijtentis nomacheta cati cahuani huan nipehuas nitetajtolsencahuas, huan nimomacuepas ica nocualancaitacahua. ¡Niquinmacas cati quinamiqui cati amo quinequij techitase!
42Nochi nocuataminhua nijchihuas xolontoc ica inieso. Huan ica nomacheta niquintzontamiltis nochi inijuanti. ¡Quena, ipan nomacheta oncas inieso cati niquinmijmictijtoc huan cati niquinitzquitoc! ¡Nojquiya quipiyas inieso inintayacancahua nocualancaitacahua cati quipiyaj inintzoncal huehueyac!’
43¡Ximoyolpaquiltica, nochi anmasehualme ipan taltipacti inihuaya imasehualhua TOTECO Dios! Yaya momacuepas ica cati quinmictijque itequipanojcahua. Quena, quincuepilis icualancaitacahua. Quipajpacas ital huan imasehualhua.”
44Huan Moisés ihuaya Josué, icone Nun, monextijque iniixpa nochi israelitame,
45huan Moisés quinpohuili ni huicat ten ipejya hasta itamiya.
46Teipa quinilhui nopa israelitame: “Ximoyolilhuica cuali ipan nochi ni tamanti cati ama na nimechmachiltía, huan xiquinnahuatica amoconehua ma quichihuaca nochi cati quiijtohua ni tanahuatilme.
47Pampa ya ni amo ya se tamanti cati amojuanti huelis san anquiahuilmatise. Ni tanahuatilme eltoque nemilisti para amojuanti. Huan sinta anquineltocase ni tanahuatilme, anhuejcahuase para anitztose ipan nopa cuali tali cati ama anquipanose ni hueyat Jordán huan anmoaxcatise.”
48Ipan nopa tonali TOTECO quicamanalhui Moisés huan quiilhui:
49“Xiya ipan nopa tepeme Abarim huan xitejco hasta nopa tepet Nebo cati eltoc ipan inintal moabitame iixmelac altepet Jericó ipan seyoc nali ne hueyat. Huan ten nopona xijtachili nopa tali Canaán cati niquinmacas ma moaxcatica ni israelitame.
50Huan teipa timiquis ipan nopa tepet cati ipan titejcos, huan timosejcotilis inihuaya moteixmatcahua. Timiquis quej moicni Aarón cati mijqui ipan tepet Hor huan mosejcotili ica iteixmatcahua.
51Anome, ta huan Aarón, amo anmotemachijque ipan na iniixpa nopa israelitame quema anitztoyaj campa nopa atajti Meriba nechca Cades ipan nopa huactoc tali Zin. Huan amo antechhueyichijque iniixpa.
52Huajca san ica huejca huelis tijtachilis nopa tali cati niquinmactilis ni israelitame, pero amo huelis ticalaquis ipan nopa tali.”
