Text copied!
CopyCompare
Godigo dwagi yai po buku - Bomai Po

Bomai Po 32

Help us?
Click on verse(s) to share them!
1“Dagalu dali, tǫ dali, dage sigo eno po odao. Eno wabo poba bugagia olo munama, odao.
2Eno pogo te dage we bidi bugagia sę mu ilaibao, te tulubage tulama, tama te nosai dabe bugagia holobo tiwai yaibao. Eno pogo da, te tulubage tulama, tama te tubo nai dabe hogodo gesi ma holama, dila pelama, tama genuai ebo tiwai yaibao.
3Tama tialima, eno Genuai Bidigo nogi ugwaba saibao, tama dagego agai nogi haninaibao.
4Dago God te tama tigidali sogo bidibo dao. Aga da, te genuai masigi me tiwai dao, te me hasegelisąwai masigi tiwai dao. Tigidali sogo agai aga po wali pabo dao, tama agai ili po me wabo menio. Tama agai kolesaga da, wiegi yai mu elama, doloba pai mu dao.
5Tiali goli, dage Israel we bidi, dage te tiwai menio. Dage da, ili po wabo we bidi dao. Dagego po hasegeliyu, te dąų wali po boliyu ebo dao. Dage dwai sęgę sabo we bidi dao. Tama tialima, dage Godigo wai puluba hani me bidigobeo.
6Tiali goli, God dagego aya dao. Agai dage sese tama nigai dao. Tama agai dage we bidi hani deli pedalomainu ilai dao. Tama tialima, dagego magi baso te dwai kolesaga agaba ebawe? Dage polobo bage, dage homu kolesaga mu meni yai dao.”
7“Dagego te polobadu pedelali sę dabe kone palao. Duga aya dabebolo mena sę dabe yai dawe po hanalu wao. Tama me polo monu dabebolo polobadu yali sę dabe po pusumainogo hanalu wao.
8God ogwa dagalu bidi, aga digi te tigidali we bidi hani bidabo pesage dobola menama, tama augwali bidabo digi dąį elama, mawai dao. Tama hasia bolo agai te Israel dabe nedama, augwaligo namba wali pelama, tama augwaligo tǫ dąį elama, tama tebogo gasa hani we bidi bidabo digi nosali dąį ilai dao.
9Tiali goli, agai Jekopgo hani sa munama, aga digi augwali tonalumainogo yai dao.
10Te Israel dabe augwali polama, augwali subigila bilaluali, te masigi kemi sane dwai bulude, me te wali genuai ebo bulude bilali. Tama Genuai Bidigo augwali gegelama, augwali oda selama, tama augwali tau sali. Tama agai augwali tonaluali, te aga digi aga tonalubo tiwai yali.
11Godigo Israel dabe bugagia tau selama, tama te Israel dabe augwali me dolobeo, te ba kemodagego aga wai bola pomainu ola mabo tiwai yali. Tama te ba gǫų tulaluainu ebode, te kimi ba aga dologo badu polo pelama, tama aga bogogo sabua sabo dao, tama te ba gǫų dolobo menio.
12God deligo tama aga we bidi sunumi ola mabo dao. Tama augwali gasa bulu tǫde tibo godigo augwali me tau sabeo.”
13“Godigo augwali sula tagalu, te bulu du dabe tonalumainu ilali, tama te gide bulali nai dabe te augwaligo sela tuyu yali. Tama augwaligo te pusu nai te hani bunu ge te masigi dedagede sela tuyu yai dao. Tama me augwaligo oliv ni bugagia holali, te masigi hauwa yai tǫde.
14Augwaligo kau kibu dabe, me meme kibu dabego ame pę hauwa augwaligo sali. Tama augwaligo kau kibu, me sipsip kibu, me meme kibu dabe moni bage mu nisali. Tama augwaligo wit me wain dabe wiegi yai mu holali.”
15“Te Genuai Bidigo we bidi augwaligo nai dabe hauwa mu sali. Tiali goli, augwaligo aga dali dwai hagoma sę yali. Augwali nai hauwa sogo mu tulama, tama augwali genuai bidi dabe mu nisali. Godigo augwali nigilali, tama aga bomogo augwali ma oda sali. Tiali goli, augwaligo aga tudiba togolali, tama aga tagalali.
16Augwaligo tibo godiba lotu po weyu yali. Tama augwaligo te dwai kolesagago Genuai Bidi sębę ilama, tama augwali dali wado yali.
17Augwaligo bulu howa bidiba dabe ofa eyu yali, te augwaligo polobadu lotu wasiąma yai. Tama augwaligo gesi god dabe wali pali, te augwa wąį dabego polobadu dologode elalusiąma yai goli. Te tobage nai dabe te god mu menio.
18Augwaligo bomai God, augwali nigali God da, gegeda palali.”

19“Tiali, Godigo aga wai dabe augwaligo te dwai kolesaga ebo sulama, aga sębę elama, tama augwaliba tudi ola mani.
20Tama agai te po wali, ‘Te we bidi augwali tobolu gagea pelama, tama augwali ena wali asobeo. Te dwai sęgę dabe augwaliba pedalobadi, me tagalao, eno augwali me ma tau sogobeo.
21Augwaligo tibo god dabe wali pabo, teda augwali olo nai mu dao. Tama augwaligo te dwai kolesagago ena sębę elama, augwaliba wado homu emainu yali dao. Tama tialima, eno te bidi hani me deli, augwali nogi meni yai hani, te olo nai tiwai o augwali polobo bidi dabe tiwai, tama augwali eno tagala palama, tama te Israel dabe haliga tigi dolomainu elama, wado emainu tagala palaibao.
22Tama te sogo eno sębę te isi bogoli tiwai elama, tama tǫde nai dabe tigidali mu ulaibao. Te sębę te tǫ aiyadu dologodu paibao, te isai bidi dabego buludu paibao. Tama agai te bulu du dabe dolalubo masigi du dabe isi ulaibao.’”
23“‘Eno te dwai sę dabe te Israel dabe augwalide pedalomainu yaibao, te bidigo ene hauwa elalu, tama bidi enebo tiwai yaibao.
24Eno augwali moni dwai nasi emainogo ilaibao, tama augwali haniani gasi elama, isila paibao. Tama eno haniani dwai gula mane dabe bulu hasa dabe aselama, augwali tula silimainu yaibao.
25Tama genuai wąbi hwįbo si asobo suaibao. Te tama tialima, augwali sunumide bidali da, te boi bidi dabego augwali elama, isilaibao. Tialima, augwali bede geme dualaluyu da, augwali wi dwai mu yaibao, tama augwali me isaibao. Te boi bidi dabe augwaligo augwali sese tama ela isila silaibao, te gesi bidi, me gesi wegi, me wai bǫų dabe, me polo monu dabe me ela silaibao.
26Hasia da, eno augwali sese mu tama silabo homu yai goli dao, te tama tilama, te bidi mego augwali kone me igi meni dao.
27Tiali goli, eno tama tiali da, te boi bidi dabe augwali polama, te po wagi dao, “Dago Godigo we bidi dago bomogo augwali aiyaba elaluali dao,” po wagi dao. “Augwa Genuai Bidigo te sę dabe emainogo ebeo,” wagi dao. Tiyu, te boi bidi dabe augwaligo te po waidalio, tama tibaso, eno augwali mu siligobeo.’”
28“‘Te Israel hani augwaligo kolesaga wiegi yai menio. Augwaligo homu kolesaga mu puna pai mu dao.
29Tialima, augwaligo homu kolesaga elaluyu da, teda augwaligo augwali te dolali te sę page konigi dao.
30Magi baso mu boi bidi dabe deli deligo te 1,000 Israel dabe dolama tagalaliwe? Tama ma, magi baso te boi bidi sigo te 10,000 Israel dabe aiyaba elalualiwe? Te po page da e tama dao. Te augwa Genuai Bidi Godigo augwali hagela polo yali. Augwa bomai Godigo augwali tudi ola mani.
31Te boi bidi dabe augwaligo koneani da, augwaligo tibo god dabego bomo menio homu yali. Tiali goli, Israel dabego Godigo genuai bomo te genuai masigi deli tiwai dao.
32Te Israel dabego boi bidi dabego kolesaga te dwai kugumini yai mu elaluali, te Sodom me Gomora te taun side bidali we bidi augwaligo yali dwai kolesaga tiwai mu yalio. Augwali te ha dwai mu ebo wain ni du tiwai yai dao.
33Te augwaligo kolesaga te dwai hasamanigo bidi gąų kelebo bidi isilibo dwai nai tiwai dao.’”
34“‘Ena Genuai Bidi, eno te Israel dabego boi bidi dabego yali kolesaga dabe konealubo dao. Eno augwali dene maiabo bubuga te tonalubo dao.
35Te dwai sę yali wei ponobo kolesaga te eno sę dao. Ena digi te eno dwai dene wei augwalibolo ponaibao. Te mani bodolude augwali tuloluaibao. Pęwadage sogo mu augwali tolaluama, tama augwali sese mu dola silaibao,’ Genuai Bidigo te po wali.”
36“Tama Genuai Bidigo aga hani we bidigo bomo sia selama, deli deli bidi naga bidibo subaso da, teda agai augwali te deli deli bidi dabe hobede elama, tama augwali agai sę ebo bage augwali ma oda saibao.

37Tialima, Genuai Bidigo aga we bidibolo te po walaibao, ‘Dagego homugo te tibo god dabego bomo elalubao, dage tau saiba homu ebawe? Tiali goli, megi da, magi yaliwe?
38Dagego augwaliba sipsip ili me wain dabe ofa yai dao. Teda megi augwaligo dage tau somainao. Augwaligo dage dwai madi bidibo ma oda somainao.
39Dagego mu koneao, ena deli ena God mu dao. Tama ena tiwai god me menio. Eno bidi dabebolo bidibo ula mabo dao, tama eno bidigo bidibo ula ma sela sąbo dao. Eno bidi mu dolama, tama eno aga ma usu ilibo dao. Eno magi sę me yainogo da, teda eno yaibao, te bidi mego ena hagegobeo.
40Awe, te mu tama dao. Ena deli naga Tigidali Sogo Bidibo God dao. Tama eno bomo yai po dąų waliyu, te po wali,
41te eno bidi dabego kolesaga osola suaibao. Tama eno moni ge hwą dulama, tama aga mu poa pelama, tama ula mu yaibao, tama eno te hwą selama, tama eno ena boi bidi dabe ela muaibao, tama ena godolo isąma ebo bidi me ela muyu yaibao. Tama eno te bidi dabego ena dali hwįainu ebo bidi enaibao, tama augwaligo kaneme te enesigigo eneba geasa dulaibao. Tama tialima, bidi meba te boide isisąma ebaso da, teda eno augwali me ela muaibao,’ Genuai Bidigo te po wali.”
43“Te gasa bulu we bidi, dagego Godigo we bidi dali wiegi yai homu pemene eyu yao. Godigo agai we bidi elama silibo we bidi dolabo dao. Tiali goli, aga we bidigo tǫ agai gedude egesi noma yai mu ilibo dao.”
44Moses de Nungo ogwa Josua sigo te balia po page pusubaso da, Israel dabego odali.
45Mosesgo Godigo te bomai po sese tama te we bidi dabebolo pusa mani.
46Tama tialima, agai po geninama weyu, te tama po wali, “Dagego bugagia mu koneama, tama dagego eno megi dagebolo mani te bomai po bugagia mu wali piąo. Tama dagego duga wai puluba dabebolo me pusa mayu yao. Tama tiyu da, augwaligo me Godigo po tigidali sogo wali pomainao.
47Godigo te po te olo po menio. Menio. Te da, te dage bugagia mu bidabo page po mu dao. Dagego bugagia wali pelama, tama dage bobobage sogo dage Jordan wę u badu bidaibao, te dage megi te bidigi painu ebo te bulude,” Mosesgo te po wali.
48Tama te sogo bubugade naga Godigo Mosesbolo walali,
49“Nage te Moap dabego bulu du te Abarim bulu duba dabe pao. Te bulu du dabe te Jordan wę pąde elalubao, tama Jeriko hanu te ąį u badu dolo si elalubao. Nage te bulu du Neboba holama, tama eno dage Israel dabebolo mawainogo ebo te buluba tonao.
50Tama nage te bulu dude isaibao, te naga ama Aron te bulu du Horde isali yali gilama. Tama nage me naga wąį dabe dali bidigi paibao.
51Aron isai dao, tama nage me isaibao. Magi baso meni. Dage sigo eno po me wali sogo bugagia wali pabeo, tama dage sigo eno nogi aiyaba elalualio, te Israel dabego gedude, te dage te Meriba bulude bidali sogo, te Kades hanu pąde, te masigi kemi sane olo bulude.
52Tama tialima, nago te bulu suagameo, tiali goli nage te bulu pąba pogobeo. Tama nage eno megi te Israel dabe augwalibolo mabo te tǫ tomoba nage pogobeo,” Genuai Bidigo Mosesbolo te po wai.