ПСАЛТЫР 59:1-13

¹Кіроўцу хору. На музычным інструмэньце Шушан-Эдут. Залатая псальма Давідава для навучаньня,

²калі ён ваяваў зь Сірыяй Месапатамскай і зь Сірыяй Цаванскай, і калі Ёаў, вяртаючыся, перамог дванаццаць тысяч Ідумэяў у даліне Салянай.

³Божа! Ты нас адкінуў, Ты паглуміў нас, угневаўся Ты; вярніся да нас,

⁴Ты зямлю скалануў, разьбіў яе: загаі разломы яе, бо яна хістаецца.

⁵Ты даў народу Твайму зьведаць жорсткае, напаіў нас віном зьдзіўленьня.

⁶Дай сьцяг тым, хто баіцца Цябе, каб яны паднялі яго дзеля ісьціны,

⁷каб вызваліліся аблюбенцы Твае; уратуй правіцай Тваёю, і пачуй мяне.

⁸Бог сказаў у сьвятыні Сваёй: «перамагу, - падзялю Я Сіхем, і даліну Сукот абмераю;

⁹Мой Галаад, Мой Манасія, Яфрэм крэпасьць Маёй галавы, Юда скіпетр Мой,

¹⁰Мааў умывальная шаля Мая; на Эдом абуткам кіну Маім». Кліч мяне, зямля Філістымская!

¹¹Хто ўвядзе мяне ў горад умацаваны? Хто давядзе мяне да Эдома?

¹²Ці ня Ты, Божа, Які нас адкінуў, і ня выходзіш, Божа, з войскам нашым?

¹³Дай дапамогу нам ва ўціску, бо дапамога людзкая - марнота.