1Yenyĩ lɛ̀ kũ Kora burinↄ dà. Yã nna tɛn pípi ma swɛ̃̀ɛ gũn, lákũ matɛn lɛ̀ díkĩna da kínanɛ nà. Ma lɛ́ nna lán takadakɛ̃ri mana takadakɛ̃bↄↄ bà.
2N manakɛ de gbɛ̃ sĩnda pínkila, n lɛ́gbɛɛ dìgↄ̃ nna, arubarika kũ Luda dàngu lakana vĩro.
3Mↄkↄ̃n zĩ̀kari pãsĩ, ǹ n fɛ̃nɛda sɛ́ ǹ loko n kíkɛgakuri sèeda ũ.
4Ǹ di sↄ̃a ǹ gɛ́ zĩ̀ ble n gakurikɛ gũn yãpura kũ nɛ̀sɛdoo kũ yãzɛdeo yãi, ǹ yã náasidenↄ kɛ kũ n ↄpla gbãnao.
5Kí, n kànↄ lɛ́ sↄ̃ntɛ, àdi gɛ̃ à n ibɛrɛnↄ swɛ̃̀ zↄ̃, burinↄ dì lɛ́tɛ n gbá sarɛ.
6Luda, ĩnigↄ̃ vutɛna kpatan gↄrↄ sĩnda pínki, ĩnigↄ̃ n kíkɛgo kũna yãzɛde ũ.
7Ń ye yãmanakɛnaai, n zã a yãvãnikɛnagu. À yã mɛ́ à tò Luda, n Luda, n ka kín, à pↄnna pìsimma de n gbɛ̃nↄla.
8Lí'ↄ gbĩ nnanna pìsi n pↄ́kasanↄa, mↄrↄ'ũ dì n pↄ kɛ nna n kpɛ́ kũ ò kɛ̀kɛ kũ wisa sakaao gũn.
9Kína nɛ́nↄgbɛ̃nↄn kú n nↄ yenyĩdenↄ tɛ́, n nↄ dufu kú n ↄplai, à Ofi bùsu wurapↄnↄ dana.
10Nɛ́nↄkpare, ǹ sã kpá ǹ ma! N de bɛ kũ n gbɛ̃nↄ yã sún donnɛ arɛro.
11N nↄmanakɛ tɛn kína mɛ̀ɛ luka, ǹ mì natɛnɛ, zaakũ n dikirimɛ a ũ.
12Tayadenↄ ni su ò gba dannɛ, aruzɛkɛdenↄ ni n wɛ́ wɛtɛ.
13Kína nɛ́nↄkpare vutɛna kpɛ́nɛ gũn kũ gakurio, ò ↄzĩ kɛ̀ a pↄ́kasanↄa kũ wura bàao.
14Òtɛn su kãao kínanɛ kũ a pↄ́kasa wãnzãndenↄo dana. Nɛ́nↄkpare zɛnnɛrinↄ tɛ́i, òtɛn su kãao a kĩnaa.
15Òtɛn gɛ̃ kũńwo kínabɛa, òtɛn pↄnna kɛ kũ ayuwiikɛnaao.
16N nɛ́gↄ̃gbɛ̃nↄ ni gↄ̃ n denↄ gɛ̃nɛ ũ, ĩni ń ditɛditɛ kínanↄ ũ andunia gũn pínki.
17Mani tó n tↄ́ gↄ̃ dↄ gbɛ̃nↄgu lakanaa sari, burinↄ nigↄ̃ n sáabu kpá gↄrↄ sĩnda pínki.
