1Andunia gbɛ̃ sĩnda pínki, à ayuwii kɛ Dikiria.
2À lɛ̀ sí a tↄ́ gakurikɛ musu, à a táaki lɛ́ à a tↄ́ bo.
3À o Ludanɛ: N yãkɛnanↄn naasi vĩ, n gbãna zↄ̃kↄ̃ↄ dì tó n ibɛrɛnↄ kã natɛ.
4Andunia pínki dì kútɛnnɛ, òdi n táaki lɛ́ ò n tↄ́ bo.
5À mↄ́ à Luda yãkɛnanↄ gwa, yã kũ àdi kɛ bisãsirinↄnɛ naasi vĩ.
6À ísira lì gukori ũ, ò swa bikũ̀ gɛ̀sɛ. Ò pↄnna kɛ a yã musu.
7Àdigↄ̃ kí ble kũ a gbãnao gↄrↄ sĩnda pínki, a wɛ́ dìgↄ̃ kú burinↄa. Sãgbãnadenↄ sún dↄkɛ kãaoro.
8Burinↄ, à ó Luda sáabu kpá, a táakilɛna gↄ̃ dↄ á lɛ́n.
9À ó wɛ̃̀ndi dã̀kpãwɛrɛ, adi tó ó gbá sàtaro.
10Luda, zaakũ n ó lɛ́ n ó gwá, n ó baasa lán andurufuu bà.
11N ó ká kpɛ́siran, n aso tìkisii dìwɛrɛ ó kpɛ.
12N tò ò dìwá lán sↄ̃ bà, ó wɛ́ tɛ́ mà, í dàóla, akũ n su kũoo nnamana kĩnaa.
13Mani su n ↄnn mà sa'opↄ kũ òdi ká tɛ́n à tɛ́ kũ o, mani lɛ́ kũ ma kɛ̀mmanↄ fĩna bo,
14yã kũ à bò ma lɛ́n ma warikɛgↄrↄa.
15Mani sa omma kũ pↄ́ mɛ̀kpananↄ, mani sãkaronↄ kpátannɛ, mani n gbagba kũ zùsanↄ kũ blèkofĩninↄo.
16Ákↄ̃nↄ kũ á Luda vĩna vĩnↄ, à mↄ́ à ma á pínki, mani yã kũ à kɛ̀mɛnɛ oárɛ.
17Ma wiki lɛ̀a, a táakilɛna da ma lɛ́n.
18Tó ma yã vãni dà ma swɛ̃̀n, de Dikiri gì ma yã mai.
19Ama à ma yã mà, akũ à ma aduakɛnaa sì.
20Arubarikademɛ Dikiri ũ, adi gí ma aduakɛna mairo, adi gí gbɛ̃kɛ kɛmɛnɛiro.
