1Ɛzɛra buri Emani lɛ̀ɛ. Dikiri Luda ma Surabari, matɛn wiki lɛ́mma fãnantɛ̃ kũ gwãanio.
2Ǹ tó ma aduakɛna kámma, ǹ sã kpá ma ↄ́ↄdↄnaai.
3Zaakũ yã'ũmmana ma nɛ̀sɛɛ pà, ma wɛ̃̀ndii kú ga lɛ́i.
4Ò ma da gbɛ̃ kũ òtɛn si gyãwãnnnↄ tɛ́, ma gↄ̃ gbãnasaride ũ.
5Ò pã kpàmai ò ma da gɛ̀nↄ tɛ́ lán gbɛ̃ kũ ò wutɛna miran sↄ̀rↄrↄnↄ bà, lán gbɛ̃ kũ ń yã dↄngu doro ń bàka kú kũnworonↄ bà.
6N ma zu wɛ̀ɛ lòkoton ari zĩtɛ tú tↄ̃̀nↄwɛɛ gusiran.
7N pↄfɛ̃ tↄ̃̀ma, a ísↄ̃ dàmala.
8N tò ma gbɛ̃nↄ ma zukũna, n tò ò ye ma kãiro. Ò ma tata, boki kunlo,
9warikɛna ma wɛ́ sira kũ̀. Matɛni n sísi zaa kↄnkↄ ari ↄkↄsi, ma ↄnↄ dↄnanyĩ.
10Gɛ̀nↄn ndì yãbonsarɛ kɛńnɛ yá? Gyãwãndenↄ mɛ́ òdi futɛ ò n sáabu kpá yá?
11Òdi n gbɛ̃kɛ baba mira gũnn yá? Òdi n náanikɛna yã o gyãwãnn yá?
12Ò n daboyãnↄ dↄ̃ gusira gũnn yá? N yãmanakɛnanↄ dↄ̃na kú yãsãnguki gũnn yá?
13Dikiri, matɛn ↄ́ↄ dↄnnɛ, ma aduakɛna kↄnkↄ dì ká n kĩnaa.
14Bↄ́yãi ntɛn gímaii, Dikiri? À kɛ̀ dera n mìkpɛrɛ zùmɛnɛɛ?
15Má kú ga lɛ́i wɛ̃ndawɛ̃nda zaa ma kɛfɛnnakɛgↄrↄa, n yã pãsĩnↄ tↄ̃̀ma, ma gↄ̃ sã̀ii.
16N pↄfɛ̃namai dàmala, n vĩnapↄnↄ ma kakatɛ.
17Ò dàmala lán í bà zaa kↄnkↄ ari ↄkↄsi, ò lìkamai mámmam.
18N tò ma gbɛ̃nↄ kũ ma gbɛ̃nnanↄ ma zukũna, gusira mɛ́ à gↄ̃̀ ma kpàasi ũ.
