1E phuv, so sas diňi prekal o losos le Jozefoskere čhavenge, chudel le Jordanostar paš o Jericho pro vichodos le Jerichoskere paňendar a e hraňica džal dži ke pušťa a upre ko Beteloskere brehi,
2paľis dureder ko Luz, odarik ko Atarot – ke phuv le Arkijengeri –
3mek pro zapados ke phuv le Jafletengeri dži ke phuv ko Teluno Bet-Choron the ko Gezer a zaačhel dži ko moros.
4Kala phuva chudle le Jozefoskere čhave o Menašše the o Efrajim sar ďeďictvos.
5Le kmeňoske Efrajim sas dine pal leskere fameliji kala phuva: Ola phuva chuden le Atarot-Addarostar dži ko Upruno Bet-Choron
6a dureder e hraňica džal ko moros, pro severos le Michmetatostar, paľis pro vichodos andro Taanat-Šilo a pašal leste pro vichodos predžal ko Janoach.
7Khatar o Janoach džal tele andro Atarat the ke Naara a predžal pašes paš o Jericho dži ko Jordan.
8Le forostar Tappuach džal e hraňica ko zapados paš o paňi Kana a zaačhel paš o moros. Kada ďeďictvos chudle o fameliji andral o kmeňos Efrajim.
9The varesave fori le gavenca andral le Menaššengere phuva sas dine le kmeňoske Efrajim.
10Ale o Efrajima na tradle avri le Kanaančanen, save bešenas andro foros Gezir. Avke on ačhile maškar lende dži adadžives, ale ačhile lengere otroka.
