1Yaubada ginauli mahudoꞌina ya ginauli fuyanna Idipi yai Mose yo Isalaela dodogadi ya fofofahidi wasana mate botiyana Detelo, Midiyan edi tau anꞌantalasam, ya atahiyen.
2Mose lahuna, Sipola ma nanatuna tatau luwaga ya fatamali lawedi botiyana lisina mate ya yogaidi ena luma yai. Natuna hesa hesana Gesom paꞌana Mose iyen, Nuꞌu hesa yai E laoma,
4na natuna hesa hesana ya tole Eliyesa paꞌana ya liba iyen, Fuyanna Idipi edi baꞌisa bena ya wunuigu na tamagu ena Yaubada ya saguhigu.
5Detelo yo Mose lahuna Sipola ma nanatuna sa laoma nuꞌu pitapitalina yai, somo yai Mose edi palai aba peidi, Yaubada ena Tuꞌa Fafagabina sadaina yai.
6Liba haꞌa ya fatamali bwaꞌiyen Mose lisina yai mate iti sa laulau lisina.
7Sa mahanoma mate Mose ya lau ya failobahidi. Botiyana nuwanuwana yai ya dulu na ya tamahiti be ya falafu. Ya lautoꞌiyedi habahim sa luhulau palai yai.
8Ginauli mahudoꞌina Yaubada ya ginauli Idipi dodogadi maʼedi edi baꞌisa lebedi yai bena sidohana Isalaela dodogadi ya fofofahidi mate Mose botiyana ena ya liba. Edaꞌeda yai heyaheyaya sa fahoinadi na Guyau sidohana ena fofofahidi hinaga ya falibadi.
9Guyau ginauli loholohodi mahudoꞌidi Isalaela lebedi yai ya ginaulidi be Idipi nimadi yai ya fofofahidi. Detelo ya atahiyen mate nuwana ya amna,
10be iyen, Guyau te fadebasae, in logena Idipi dodogadi nimadi yai yo edi kin, Falo nimana yai ya fofofahimiu.
11Matabahim E siba mate Guyau ya gigibwali wananaha habahim yaubada hudoꞌi - hudoꞌi. Ya ginauli doha ite paꞌana Idipi dodogadi Isalaela sa abi heyayaidi.
12Habahim, Detelo antalasam gabugabuna yo antalasam hahaisa ya leyadima Yaubada lisina na Elon maꞌena Isalaela babadadi mahudoꞌidi sa lau be sa anꞌangogo Yaubada matana yai.
13Bobonna Mose dodoga ya falau fataladi. Sa obiyo fataꞌiꞌili hwalahwalala ya lau ee–, maimailafi. Fuyanna Mose ginauli mahudoꞌina ya ginauli Detelo ya ita mate ya fatiꞌo iyen, Sidohana be doha ite wa ginauli dodoga lisidi yai? Paꞌana somo ibom wa falau fataladi na dodoga mahudoꞌidi sa obiyo fataꞌiꞌilim hwalahwalala ya lau ee–, maimailafi?
15Mose botiyana Detelo alinana ya bui fafuyo iyen, E ginauli doha ite paꞌana dodoga sa laoma lebegu bena Yaubada ena fanufanuha sa sibai.
16Yena edi pilipili, sa ledima lisigu haba E fadosidi yo Yaubada ena laugagayo E fasibadi.
17Habahim Detelo iyen, Hige laulau dudulaina u ginauli.
18Um yo dodoga haba kamnamiu ami faheyayadi paꞌana paisowa ni ya laꞌi, hige gonowam ibom u ginauli.
19Aho te u ataꞌatahima na haba E liba fasibasibam. Yo Yaubada haba maꞌem! Um dodoga edi tau libaliba Yaubada lisina yai yo edi pilipili wa ledima lisina.
20Yaubada ena laugagayo bena wa liba fanuwa tagudi yo miyamiya sidohana, u fatalahadi. Somo bena sa ginauli mate u fatalahadi hinaga.
21Tatau paisowa gonowadi sa ginauli mate u fasinabodi. Iti bena Yaubada tau ꞌwasabuwenna yo dodoga dududulaidi yo bena laulau bwalabwala adi ꞌwaiꞌwaiyoꞌo. Haba dodoga 1000, 100, 50, yo 10 sa ita watanidi.
22Iti haba dodoga sa fafadudulaidi fuya ouꞌouli. Pilipili lalalaꞌi mahudoꞌidi haba sa lediwa lebem na kikiꞌinadi iti ibodi haba sa fadudulaidi. Haba am paisowa begana sa fakufefe be ami faimalamalaha.
23Yena Yaubada ena nuwatuhu wa lau watan be doha wa ginauli, ibege i kamnam i heyaya yo dodoga ni haba ma nuwa taludi sa fuyo edi luma.
24Detelo ena gaimumu Mose ya lau watan
25be Isalaela mahudoꞌidi ganahewanadi yai babaꞌisa paisowa gonowadi sa ginauli, ya lau famwaito be sa famala 1000, 100, 50, yo safuhudohudoꞌi adi tanuwaga.
26Adi paisowa mate dodoga sa fafadudulaidi fuya ouꞌouli. Pilipili lalalaꞌi sa lawedi Mose lisina na kikiꞌina ibodi sa fadudulaidi.
27Habahim Mose botiyana ya lau aiyoniyen be Detelo ya fuyo ena nuꞌu.
